«Հայաստան-Ինժեներական շաբաթ» միջոցառումների շարքը կներկայացնի Հայաստանի ինժեներական ներուժը

Հունիսի 28, 2019

ՏՀՏ նորություններ

Հունիսի 24-ին Երեւանում մեկնարկել է ՀՀ կառավարության, «Ձեռնարկությունների ինկուբատոր» հիմնադրամի եւ Ինժեներական ասոցիացիայի նախաձեռնությամբ կազմակերպված >«Հայաստան - Ինժեներական շաբաթ» խորագրով միջոցառումների շարքը:

Երեւանում եւ Վանաձորում hունիսի 24-28-ը անցկացվող միջոցառումների ընթացքում նախատեսվում է կազմակերպել բարձր տեխնոլոգիաների ոլորտի եռօրյա մասնագիտական սեմինարներ, ցուցադրություններ եւ փորձի փոխանակմանն ուղղված միջոցառումներ։

Շաբաթը կհամախմբի շուրջ 500 մասնակցի՝ աշխարհի տարբեր երկրների պետական, գիտահետազոտական, կրթական կազմակերպություններից, նորաստեղծ եւ կայացած ինժեներական ընկերություններից։ Երեւանում եւ Վանաձորում կազմակերպվող ցուցահանդեսային հատվածներում տեղական եւ միջազգային 30 կազմակերպություններ կներկայացնեն իրենց արտադրանքը, լուծումներն ու ծառայությունները:

Ձեռնարկությունների ինկուբատոր հիմնադրամի (ՁԻՀ) տնօրեն Բագրատ Ենգիբարյանի խոսքով, «Հայաստան Ինժեներական շաբաթ»-ը կդառնա եզակի միջազգային հարթակ, որը կմիավորի տարբեր երկրների տեխնոլոգիական ձեռներեցներին, ինժեներներին, գիտնականներին, առաջատար փորձագետներին, ուսանողներին, կառավարության ու բիզնեսի ներկայացուցիչներին։

«Նմանատիպ միջոցառումները կարեւոր են, քանի որ դիրքավորում են Հայաստանը որպես աշխարհին բարդ եւ ամբողջական ճարտարագիտական լուծումներ առաջարկող երկիր: Հպարտությամբ պետք է նշեմ, որ ինժեներական ոլորտի համաշխարհային առաջատարները Հայաստանում գտնում են համալիր լուծումներ։ Չէ՞ որ տեխնոլոգիական ու ինժեներական զարգացման խթանը հենց ինքը մարդն է, իսկ Հայաստանում ապրում ու գործում են ստեղծագործ մարդիկ, որոնց շնորհիվ կարող ենք մեր երկիրը առաջատար դիրքերի բերել տնտեսական ժամանակակից մարտահրավերների պայմաններում»,- նշել է նա:

«Կարեւորում եմ այն, որ «Հայաստան - Ինժեներական շաբաթ» խորագրով միջոցառումների շրջանակում հանդես եկող խոսնակների 90 տոկոսից ավելին հայ ինժեներներն են, որոնք կստանան հնարավորություն ցուցադրելու այն ամենը, ինչ ստեղծվել է Հայաստանում: Այսպիսով, մեր նպատակն է արտերկրից ժամանած հյուրերին ցույց տալ, թե ինչպիսի ինժեներական ներուժ կա Հայաստանում, ինչ պրոդուկտներ են արտադրվում»,- ընդգծել է «Ինժեներական ասոցիացիա»-ի տնօրեն Վարդան Ալեքսանյանը:

«Հայաստան - Ինժեներական շաբաթ»-ի միջոցառումներին մասնակցում են Աֆրիկայի ՄԱԿ-ում ՏՀՏ եւ նորարարության բաժնի տնօրենի պաշտոնակատարը, Տիեզերական գործունեության անդամների միջազգային ասոցիացիայի նախագահն ու բարձր տեխնոլոգիական ոլորտի հանրահայտ ընկերությունների ներկայացուցիչներ։

Հունիսի 24-ից 26-ը կայանալիք մասնագիտական քննարկումները, որոնց մասնակիցների թվում մեծամասնություն են կազմում Հայաստանի լավագույն ինժեներները, նվիրված կլինեն ինքնակառավարվող տրանսպորտային միջոցներին, կիսահաղորդիչների նախագծմանն ու թեստավորմանը, 5G-ին, արդյունաբերական IOT-ին, արհեստական բանականությանը եւ այլն: Զուգահեռ՝ հունիսի 26-ին կկայանա նաեւ աշխատաժողով՝ Հայաստանի գիտահետազոտական ինստիտուտների ներկայացուցիչների մասնակցությամբ:

«Հայաստան - Ինժեներական շաբաթ»-ի ամփոփումը տեղի կունենա հունիսի 28-ին՝ Վանաձորի տեխնոլոգիական կենտրոնում, որտեղ կկայանա Շաբաթվա արդյունքների քննարկում՝ պետական ու մասնավոր կառույցների ներկայացուցիչների եւ փորձագետների ներգրավմամբ։

Վանաձորյան առաջին պանելային քննարկման շրջանակում հայ եւ արտերկրի խոսնակները կխոսեն Հայաստանում ճարտարագիտական ապագայի հնարավորությունների մասին: Մեկ այլ քննարկում նվիրված կլինի Վանաձորի բիզնես եւ ներդրումային գրավչությանը: Զուգահեռաբար կանցկացվի նաեւ ինժեներական լուծումների ցուցահանդեսը։ Շաբաթը կեզրափակվի ռոք համերգով:

«Հայաստան-Ինժեներական շաբաթ» միջոցառումների գործընկերներ՝ Վանաձորի տեխնոլոգիական կենտրոն (ՎՏԿ), YEA Engineering, PMI Science, Ինժեներական քաղաք (EC), Նեյշընըլ Ինսթրումենթս (NI), Նորարարական լուծումների եւ տեխնոլոգիաների կենտրոն (ՆԼՏԿ), Գյումրու տեխնոլոգիական կենտրոն (ԳՏԿ), Գյումրու տեղեկատվական տեխնոլոգիաների կենտրոն (GITC), Հայ-հնդկական ՏՀՏ գերազանցության կենտրոն (AITC), Մոբայլ լուծումների ԵԿԱ տարածաշրջանային լաբորատորիա (mLab ECA), Հայաստանի ազգային պոլիտեխնիկական համալսարան (ՀԱՊՀ), Հայաստանի ազգային ինժեներական լաբորատորիաներ (ANEL), Մայքրոսոֆտ ինովացիոն կենտրոն (MIC), Փրայմ (Prime):

Նյութի աղբյուրը. https://itel.am/am/news/10927