Հայկական պատվիրակությունն արժանացել է հատուկ դիպլոմի

Հունիսի 18, 2019

Մշակութային լուրեր Միջազգային լուրեր

Ռուսաստանի Դաշնության ՅՈՒՆԵՍԿՕ-ի ազգային հանձնաժողովի հրավերով Հայաստանի Հանրապետությունից ՅՈՒՆԵՍԿՕ-ի ասոցացված դպրոցների ցանկում ընդգրկված Երևանի Հ. Հայրապետյանի անվան թիվ 78 հիմնական դպրոցի կերպարվեստի ուսուցիչ Արտակ Բարսեղյանը և 9-րդ դասարանի սովորող Դավիթ Կավկասյանը «Փրկել և պաշտպանել» միջազգային բնապահպանական ակցիայի շրջանակում ՌԴ Խանտի-Մանսիյսկ քաղաքում հաջողությամբ մասնակցել են «Մեկ մոլորակ-մեկ ապագա» խորագրով միջազգային երիտասարդական բնապահպանական ֆորումին:

Ֆորումի շրջանակում կազմակերպված միջոցառումների ընթացքում Հայաստանի ներկայացուցիչներն ազգային երգ ու պարի, ուտեստների, հատուկ միջոցառումների համար պատրաստված տեսահոլովակների միջոցով ներկայացրել են Հայաստանն ու մեր երկրի առանձնահատկությունները:

9-րդ դասարանի սովորող Դավիթ Կավկասյանն իր ելույթում ներկայացրել է Հայաստանում ՅՈՒՆԵՍԿՕ-ի Համաշխարհային ժառանգության ցանկում ընդգրկված արժեքները: Հատուկ անդրադարձ է եղել Սևանա լճի էկոլոգիական նշանակությանը և խնդիրներին:

Միջազգային երիտասարդական բնապահպանական ֆորումի 3-րդ օրը նախատեսված մրցույթի շրջանակում ուսուցիչ Արտակ Բարսեղյանը ներկայացրել է Հայոց Մեծ Եղեռնի զոհերի հուշահամալիրի մոտ ապրիլի 26-ին անցկացված ծաղկահավաքը, որի ընթացքում Երևանի թիվ 78 հիմնական դպրոցի սովորողներն ու դպրոցի էկոխմբակի անդամները  մասնակցել էին բուսական թափոնների վերամշակման աշխատանքներին:

Հայկական պատվիրակությունը հայրենիք է վերադարձել հատուկ դիպլոմով:

Նյութի աղբյուրը. ՀՀ կրթության, գիտության, մշակույթի և սպորտի նախարարություն