Հրաժեշտ տարրական դպրոցին

Մայիսի 22, 2019

Դպրոցական անցուդարձ

Այսօր կարծես նրանց հոգում խինդ ու թախիծ միասին են, արցունքի միջից նայում, ջերմ ժպտում էին իրար: 
Հրաժեշտի օր էր, բայց և տոն էր մի նոր հանդիպման Կապանի N13 հիմնական դպրոցի IVա դասարանի աշակերտների համար: /Դասվար Լարիսա Խաչատրյան/
Սաներն իրենց ելույթներով,բանաստեղծություններով շնորհակալություն հայտնեցին կյանքը կառուցող հայրերին, այն ջերմացնող մայրերին ու ուսուցիչներին: 
Երգեր, շնորհակալության խոսքեր, պարային համարներ, ուր արժևորվեցին հարազատ կրթօջախում ստացած գիտելիքները, ուսուցիչների դերն ու նշանակությունն իրենց կրթության, դաստիարակության գործում: Աշակերտները խոստովանեցին՝ առաջին ուսուցչից ստացած ամենակարևոր՝ բարեկրթության դասն իրենց ուղեկցելու է ողջ կյանքում: 

Դպրոց-մայր-ուսուցիչ-հայրենիք գաղափարների մասին խոսելիս աշակերտները անկեղծանում են՝ դպրոցն իրենց ուսում է տվել,մայրերն ու ուսուցիչներն՝ աչքերին փայլ, հայրենիքը՝ խաղաղ երկինք, և դիմելով ժամանակին՝ փոքրիկները նշեցին. 
Կանգ առ ժամանակ պետք է ետ գնամ:
Խոսքս ասելուց տառերն եմ խառնել, բառերն եմ կորցրել,
Ամեն տողի մեջ մի սխալ եմ արել:
Անհամար բառեր որ պետք չէր ասել
Կանգ առ ժամանակ թող որ ետ գնամ 
Մի նոր թուղթ վերցնեմ ու նորից սկսեմ,
Ամեն ինչ նորից նոր մաքուր էջից 
Մի նոր գրիչով առանց դողալով
Կանգ առ ժամանակ... 
Կանգ առ, ժամանակ, մի վազիր, թույլ տուր մի քիչ էլ մեր ուսուցչուհու համար լինեմ փոքրիկ աշակերտ՝ հուզված, ամոթխած, մի քիչ շփոթված:

Երախտիքի խոսքեր հնչեցին ծնողների ու այն աշակերտների կողմից,ովքեր եղել են Լարիսա Խաչատրյանի նախկին սաները: Աշակերտական խորհրդի նախագահ Լիլիթ Մկրտչյանի խոսքը հուզեց բոլոր ներկաներին.
Այնքան արագ է անցնում ամեն բան, 
Որ չեմ հասցնում վայրկյաններն հաշվել, 
Եվ երբ նայում եմ ես օրացույցին, 
Հասկանում եմ, որ տարին է անցել…
Աչք դեռ չթարթած օրերն սլանում, 
Սրտումս անհագ կարոտ են վառում, 
Քո ներկայությունն զգալու տենչին, 
Սիրտս ոչ մի կերպ էլ չի դիմանում… 
Երբ կողքիս ես դու, ընկեր Խաչատրյան:

Լարիսա Խաչատրյանը արդեն 47 տարի աշխատում է դպրոցում: Փորձառու ուսուցչուհին միջին դպրոց է ճանապարհել արդեն 15 դասարան, սակայն յուրաքանչյուրի հետ ունենում նույն հուզմունքը, հրաժեշտի դժվարին պահերն ու մշտապես սաների հետ ամուր կապը պահելու ցանկությունը: 
Կապանի N13 հիմնական դպրոցի տնօրեն Զավեն Ստեփանյանը շնորհավորեց ուսուցիչներին, աշակերտներին և ծնողներին կրտսեր դպրոցը պատվով ավարտելու առթիվ և մաղթեց հաջողություններ, ձեռքբերումներ միջին դպրոցում:
«Մի բան հստակ է՝ կա սեր, նվիրում և համոզված ենք, որ այդ ջերմությունը կտանեք ձեզ հետ ողջ կյանքի ընթացքում»,- հավելեց տնօրենը:

ՄԿԱ գծով փոխտնօրեն Ժաննա Վարդանյան