Դասասենյակների անվանակոչում ամենայն հայոց բանաստեղծ Հովհ.Թումանյանի և երգի մեծ արքա Կոմիտասի անուններով

Մայիսի 10, 2019

Դպրոցական անցուդարձ

      2019թ. ապրիլի 7-ին Գեղարքունիքի մարզի Լճաշեն գյուղի Ա.Տեր-Գրիգորյանի անվան միջնակարգ դպրոցում տեղի ունեցավ գրական-երաժշտական ցերեկույթ « Գործն է անմահ…» խորագրով՝ նվիրված Ամենայն հայոց բանաստեղծ Հովհ.Թումանյանի և Հայ երգի արքա Կոմիտասի հոբելյանական 150-ամյակին:

     Հայոց մեծերի շունչն ու հոգին էր թևածում դպրոցում: Ամեն ինչ թումանյանական էր՝ պարզ, հյուրասեր և մարդամոտ՝ Կոմիտասի երգերի ախորժալուր հնչյուններով ողողված: Թումանյանական հայրենասիրություն, թումանյանական մարդասիրություն և լավատեսություն` ազգային մաքրամաքուր երգերի ներքո:

      Հնչում են երգեր Թումանյանի բառերով, բանաստեղծություններ, քառյակներ, հատվածներ պոեմներից:

     Հանդիսավար Անահիտ Տեր-Գրիգորյանը ըստ դասարանների ներկայացնում  է կատարումները: Բեմականացվում են «Գիքորը»,  «Նեսոյի քարաբաղնիսը» պատմվածքները, «Բարեկենդանը» և «Անբան Հուռին» հեքիաթները, Լճաշենի բարբառով 5-րդԱ դասարանի աշակերտ Սպարտակ Պետրոսյանն առանձնակի սիրով ներկայացնում է «Ոսկու կարասը» հեքիաթը, տիկնիկային թատրոնը /ղեկավար՝ Հ.Առաքելյան/ բեմականացնում է «Անխելք մարդը» հեքիաթը:

    Դպրոցի «Մանկունք» երգչախումբը /ղեկավար՝ Ք.Քոչարյան/ կատարեց Կոմիտասի «Սոնա յար», «Երկինքն ամպելա» երգերը, իսկ «Փոքրիկ երգիչներ» երգչախումբը  /ղեկավար՝ Մ.Վարդանյան/ կատարեց հատված «Անուշ» օպերայից «Ամպի տակից …»:

   Դպրոցի տնօրեն Ա.Մուրադյանն իր խոսքում ներկայացնում է Թումանյան մարդու, գրողի և հասարակական գործչի կերպարը:

    Թումանյանը ժողովրդական հանճարի փայլատակումն է: Ծնվելով հողից, ունենալով լեռնեցու մեծ սիրտ ու պայծառ երևակայություն՝ նա իր ստեղծագործության մեջ խտացրեց  ժողովրդի ազգային նկարագիրը, նրա ճակատագիրը և պատմական գոյատևման վիթխարի ուժը:

    Դպրոցի 1-12-րդ դասարանի աշակերտները, Հովհ.Թումանյանի ծննդյան 150ամյակին նվիրված ասմունքի հանրապետական մանկապատանեկան 12-րդ մրցույթ-փառատոնի տարածքային փուլի հաղթող, «Հայ գրականություն» և ՀԵՊ առարկաների օլիմպիադաների հանրապետական փուլի Iկարգի դիպլոմի մրցանակակիր Նարե Խանդանյանը սահուն ներկայացրին անմահ լոռեցու և երգի մեծ արքայի կյանքը, ստեղծագործական ուղին ու գողտրիկ գործերը:

   - Եվ Թումանյանն է մեր բանաստեղծներից ավելի հայոցը, ամենից ավելի բնաշխարհիկը,- հնչում է Պ.Սևակի բնորոշումը:

      Մեծերի կյանքը նրանց գրքերում է, նրանց պատգամներում, նրանց գործերում: Նրանք սերունդներին դաստիարակում  են իրենց լուռ, բայց և միաժամանակ, խոսուն ներկայությամբ:

    Դպրոցի մանկավարժական խորհրդի որոշումներով դասասենյակներ անվանակոչվեցին հայ ժողովրդի երկու լավագույն զավակների անուններով:  6-րդԱ դասարանը հետայսու կոչվելու է  Անմահ լոռեցու, իսկ 7-րդԲ դասարանը՝ Մեծ երգահանի անունով:

    Օրվա առիթով բարեմաղթանքի խոսքեր հղեցին Լճաշեն համայնքի ղեկավար Կ.Մարգարյանը, Գեղարքունիքի մարզպետարանի աշխատակազմի կրթության, մշակույթի և սպորտի վարչության պետ Կ.Զազյանը, գրողների միության Գեղարքունիքի մարզի բաժանմունքի նախագահ, ,,Հայաստան,, թերթի գլխավոր խմբագիր Տ.Նիկողոսյանը,   Մահապարտների գնդի նվիրյալ, Արցախյան ազատամարտի մասնակից Ս.Մաթևոսյանը և դպրոցի «Հայոց պատմություն» առարկայի ուսուցչուհի Լ.Հովհաննիսյանը:

   Գրական- երաժշտական ցերեկույթը կազմակերպել էին հայոց լեզվի, գրականության, գրաբարի առարկայական, տարրական կրթության մեթոդական միավորման անդամները, դաստիարակչական աշխատանքների կազմակերպիչ Ծ.Կարապետյանը, «Կերպարվեստ» առարկայի ուսուցչուհի Ա.Գյուրջյանը:

   Բոլորը հեռացան թումանյանական  մարդասիրությամբ ու կոմիտասյան լավատեսությամբ՝ ազգային մաքրամաքուր երգերի ներքո:

 

Ս.Սիմոնյան
«Հայոց լեզու և գրականության» առարկայի ուսուցչուհի