Հրաժեշտ Այբբենարանին

Ապրիլի 17, 2019

Դպրոցական անցուդարձ

Ապրիլի 15-16-ը Կապանի N13 հիմնական դպրոցում տեղի ունեց միջոցառում՝ նվիրված Հայոց գրերին ու նրա հանճարեղ Արարչին՝ Մեսրոպ Մաշտոցին /Iա և I.բ. Դասվարներ՝ Աստղիկ Դանիելյան, Ռոզա Թևանյան/։
Մեսրոպ Մաշտոցն ամենուր է. մեր մանուկների շուրթերին, մեր սրտերում և, իհարկե, Օշականի Սուրբ դամբարանում, որի առաջ սերունդներ են խոնարհվել և խոնարհվելու են՝ որպես մեր գոյության և առաջընթացի Լուսարար Փարոսի: Աշակերտներն իրենց թոթովախոս լեզվով ներկայացրին Մաշտոցի կատարած «հոգևոր հրաշքի» անբացատրելի իմաստն ու խորհուրդը ՝ փառաբանության ներբողներ ձոնելով նրան…Երգ ու պարի գեղեցիկ կատարումներով փոքրիկները հրաժեշտ են տվեցին Այբբենարանին՝ իրենց հետ տանելով անմոռաց հուշեր: 

Մենք կայինք, այո՛, Նրանից առաջ:
Սակայն Նա ծնվեց,
Որ գա ու դառնա ինչ¬որ նոր Սկիզբ:
…Այո՛, մենք կայինք նրանից առաջ,
Հզոր, թե տկար՝
Մարմին էինք մենք:
Սակայն նա եկավ, որ Հոգի դառնա,
Շոշափվող հոգի,
Եվ անմեռ հոգի:

Այո՛, Մաշտոցի ստեղծած Գիրը մեր մեջ պետք է ապրի կենսատու Արյան նման, ամեն վայրկյան, լուսեղեն ուժ դառնա մեր սրտերում: Աշխարհ եկող ամեն հայ մանուկ պետք է իր ծնողներից առած շնչին հյուսի նաև Մաշտոցյան գրի ոգին ու շունչը: Դա մեր ազգային Միասնության ամենազոր զենքն է, մեր հավերժության առհավատչյան: Բարի երթ ենք մաղթում այս հրաշալի մանուկներին դեպի գիտելիքների, իմացության անսահման աշխարհ:

ՄԿԱ գծով փոխտնօրեն Ժաննա Վարդանյան