Թումանյանական տոնակատարությունները վերածենք համազգային տոնախմբության. Ա. Հարությունյան

Փետրվարի 18, 2019

Մշակութային լուրեր Պաշտոնական

ՀՀ ԳԱԱ նախագահության նիստերի դահլիճում այսօր տեղի է ունեցել «Թումանյանագիտության արդի հիմնախնդիրները» թեմայով գիտագործնական համաժողով` նվիրված մեծանուն գրող, Ամենայն հայոց բանաստեղծ Հովհաննես Թումանյանի 150-ամյա հոբելյանին: Համաժողովի մասնակիցներին ողջունել է ՀՀ կրթության և գիտության նախարար Արայիկ Հարությունյանը. «Երբ ստանձնեցի կառավարական հանձնաժողովի նախագահի պարտականությունները, թերթում էի միջոցառումների ծրագիրը և հասկացա, որ ցանկացած ոք այն թերթելիս կգիտակցի, թե ինչ մեծ հայրենակից ենք ունեցել: Պատահական չէ, որ շատ գիտնականներ, հասարակական գործիչներ նրան համարում են հայ ազգի ամենահզորներից մեկը»: Նրա խոսքով՚ Թումանյանի ասելիքը ուղղված է  ինչպես երեխաներին, այնպես էլ երիտասարդներին ու մեծահասակներին: ԿԳ նախարարը, շեշտելով Հովհաննես Թումանյանի  հրապարակախոսական նյութերի արդիականությունը, հավելել է. «Այսօր Թումանյանի տուն-թանգարանի տնօրենն ինձ ցույց տվեց հին տպագրության մի տուփ, որը կոչվում էր աստղերի խաղ: Գիտեք, որ երեխաների համար Թումանյանը մի շարք խաղեր է ստեղծել, որոնք, ի պատիվ տուն-թանգարանի, վերականգնվում են: Սա ևս մեկ անգամ փաստում է, որ Թումանյանն ամբողջությամբ 21-րդ դարի քաղաքացի է, որովհետև դրանք արդիական են: Հիմա մեծ պատվով մտնում ենք հոբելյանական միջոցառումների փուլ, և մենք մեկ նպատակ ունենք, որ այս տոնակատարությունները վերածվեն համազգային տոնախմբության»: Արայիկ Հարությունյանն ընդգծել է, որ արդեն  քաղաքի ընդհանուր թումանյանական տեսքը և այլ միջոցառումները վկայում են այն մասին, որ պետությունն այս իրադարձությանը շատ մեծ կարևորություն է տալիս: Նախարարը նաև վստահություն է հայտնել, որ գիտանականներն էլ Թումանյանի վերաբերյալ իրենց ուրույն ասելիքն ունեն, և որ այս համաժողովն ու դրա արդյունքները մեծ նշանակություն կունենան հոբելյանական տարվա համար:

Մեծ գրողի կյանքի և ստեղծագործության վերաբերյալ ելույթներով են հանդես եկել ՀՀ գիտաուսումնական տարբեր հաստատությունների ներկայացուցիչներ: Ներկայացվել է Թումանյան գրողի գրական-հասարակական գործունեությունը պատմագիտական առումով,  նրա կերպարի և ստեղծագործության արտացոլումը արվեստի բնագավառում, Թումանյանի կապը համաշխարհային գրականության հետ: 

Միջոցառման ընթացում ներկայացվել է նաև ՀՀ ԳԱԱ Մանուկ Աբեղյանի անվան գրականության ինստիտուտի կողմից վերջին մեկ տարում հրատարակված Հովհաննես Թումանյանի կյանքին ու գործունեությանը նվիրված գիտական աշխատությունները:

Նյութի աղբյուրը. ՀՀ կրթության և գիտության նախարարություն