Օգտաշահ հանդիպում

Դեկտեմբերի 10, 2018

Դպրոցական անցուդարձ

Օրերս Խաչատուր  Աբովյանի  անվան  հայկական  պետական  մանկավարժական  համալսարանի  սկզբնական   կրթության  ֆակուլտետի   Ա.Տեր-Գրիգորյանի  անվան մայրենիի  և նրա  դասավանդման   մեթոդիկայի  ամբիոնի  վարիչ, դոկտոր-պրոֆեսոր  Ջուլիետա Գյուլամիրյանը,  ամբիոնի  դասախոս, դոցենտ, Լիլիթ  Տեր-Գրիգորյանը և 13  դասախոս   հյուրընկալվեցին  Լճաշեն գյուղի  Ա.Տեր-Գրիգորյանի  անվան  միջնակարգ դպրոցում:

Հյուրերը  ներկա գտնվեցին  1-ին ա  դասարանի  դասվար  Վարսիկ Կարապետյանի վարած «Ա» հնչյուն-տառի ուսուցման  դասին, դիտեցին  դպրոցում գործող  տիկնիկային  թատրոնի Հ.Թումանյանի «Անխելք  մարդը» տիկնիկային ներկայացումը:

 Համակարգչային  կաբինետում  կազմակերպվեց հանդիպում  տարրական  կրթության մեթոդական  միավորման  անդամների, «Հայոց լեզու և գրականություն», «Մաթեմատիկա»   առարկաների  ուսուցիչների  հետ,  անցկացվեց  ազատ ու անկաշկանդ քննարկում, մտքերի փոխանակություն  1-4-րդ  դասարանների դասագրքերի, դասավանդման  ժամանակակից  մեթոդների, միջոցների, խմբային  աշխատանքի, դպրոց-համալսարան  համագործակցության, կրտսեր դպրոցականների կրթության   տարիքային առանձնահատկությունների,  նախաայբբենական   շրջանում  տառուսուցման, քերականական  նյութերի, վայելչագրության, սովորողների  սոցիալականացման, ուսուցչի  արտադասարանական  աշխատանքների  կազմակերպման  հարցերի շուրջ:

    Ամբիոնի  դասախոս, դոցենտ  Լիլիթ Տեր-Գրիգորյանը  զրուցեց  աշակերտների հետ, ուսուցիչներին  ներկայացրեց  իր  և դոցենտ Լ.Ավագյանի հեղինակած «Աշխատանք բնագրի  շուրջ>> ուսումնական  ձեռնարկը,  որը  նպատակաուղղված  է  սովորողների խոսքի  զարգացմանը, լեզվա-ոճական  կարողությունների  մշակմանն  ու  խորացմանը:

   Հանդիպման  ընթացքում  քննարկվեցին  համընդհանուր  ներառական  կրթությանն  անցնելու  շուրջ  հարցեր,  ներկայացվեց  մանկավարժական  գիտությունների  թեկնածու Ա.Միքայելյանի  «Հայերենի   ուղղագրության  ուսուցման առանձնահատկությունները  ներառական կրթության պայմաններում»  մենագրությունը,որն օգտակար է լինելու մտավոր  զարգացման  խնդիրներ  ունեցող երեխաների և նրանց ծնողների համար:

    Մանկավարժական  գիտությունների  թեկնածու, դոցենտ  Ա.Բալայանը  նշեց, որ  ներառականության գաղափարը կարևոր է ոչ միայն կրթության առանձնահատուկ  պայմանների  կարիք  ունեցող  երեխաների, այլ  իբրև հանդուրժողականություն, հասարակության  մեջ  ցանկացած փոքրամասնության  նկատմամբ  հարգալից  վերաբերմունք  դրսևորելու  տեսանկյունից:

    Մաթեմատիկայի և տարրական  ուսուցման մեթոդիկայի  ամբիոնի վարիչի տեղակալ,մանկավարժական գիտությունների թեկնածու Քնարիկ Հովհաննիսյանը ներկայացրեց  «Մաթեմատիկական տերմինների բացատրական բառարան 1-6-րդ դասարաններում»   ձեռնարկը, որը կօգնի մաթեմատիկայի ծրագրային նյութերի յուրացմանը՝ հաշվի առնելով աշակերտների տարիքային առանձնահատկությունները:

     10-12-րդ դասարանների աշակերտների շրջանում    հանդիպում կազմակերպվեց  մասնագիտական  կողմնորոշման  խնդիրների  շուրջ, անցկացվեց  քննարկում,որը վարեցին  դասախոս  Կ.Աղաբաբյանը  ,ամբիոնի ասիստենտ  Ա.Բաբաջանյանը: 

    Հանդիպումն  անցավ  ջերմ,  անմիջական մթնոլորտում: Դասախոսների և աշակերտների  միջև ստեղծված կապը միանշանակ կարևոր էր.այդ պահին 12-րդ   դասարանի աշակերտուհիներ  Օֆելյա Միրաքյանը, Սյուզի  Առաքելյանը, Աննա Սահակյանը, Անի Սիմոնյանը և Մերինե  Սիմոնյանը ցանկություն  հայտնեցին   դիմելու մանկավարժական  համալսարան՝ ստանալու  աշխարհի  ամենագեղեցիկ՝ ուսուցչի մասնագիտությունը:       

    Աշակերտներն ստացան իրենց հուզող հարցերի պատասխանները:

    Հանդիպման ավարտին  ամբիոնի վարիչ  Ջ.Գյուլամիրյանը   պատրաստակամություն հայտնեց մշտապես լինելու ուսուցիչների կողքին, նրանց աջակցելու ուսուցման գործընթացում նոր, փոխներգործուն մեթոդների,խմբային աշխատանքի, նախաայբբենական շրջանում տառուսուցման կազմակերպման և դպրոց-համալսարան կապի ամրապնդման գործում:

     Դպրոցի  տնօրինությունը ողջունեց հյուրերին՝ ընդգծելով նման օգտաշահ հանդիպումներն ուսուցիչների և աշակերտների հետ, քննարկվող թեմաների կարևորությունը, արդիականությունը և անհրաժեշտությունը,որոնք նոր, թարմ շունչ ու աշխուժություն են  հաղորդում ուսումնադաստիարակչական աշխատանքների արդյունավետ կազմակերպմանը:

   Հանդիպման ավարտին հյուրերը դպրոցի գրադարանին նվիրեցին գեղարվեստական գրքեր, հեքիաթների  ժողովածու, մուլտֆիլմերի սկավառակ, մասնագիտական գրականություն, ուսումնական ձեռնարկներ ու բառարաններ:

                                                                                                                                 

Ա.Մուրադյան
Գեղարքունիքի մարզի  Լճաշեն գյուղի Ա.Տեր-Գրիգորյանի անվան միջնակարգ դպրոցի  տնօրեն