Երեխաներն ընդդեմ բռնության

Նոյեմբերի 22, 2018

Դպրոցական անցուդարձ

Նոյեմբերի 19-ին աշխարհում նշվում է Երեխայի հանդեպ բռնության կանխարգելման միջազգային օրը: Բռնության բոլոր տեսակները՝ ֆիզիկական, հոգեբանական, անտեսման և սեռական, տարածված են աշխարհի բոլոր երկրներում և  որևէ տեսակի  գործածման ծավալը կախված է նաև տվյալ երկրի սոցիալ-տնտեսական կամ քաղաքական իրողություններից: Հայաստանում նշյալ տարատեսակները ևս առկա են, սակայն ամենատարածվածը  ֆիզիկական, հոգեբանական  բռնության  կիրառումն է, որոնք արգելակում են  երեխայի բնականոն զարգացումն ու սոցիալականացումը : Բռնարարքներ հանդիպում են տանը, համայնքում, դպրոցում  և այլուր: Բռնության ձևերի տարածումը նաև մարդկանց մոտ նշյալ վատ դրսևորումների մասին անտեղյակության պատճառ է: Եվ սխալ է մտածել, որ բռնության ցանկացած տեսակ միայն կիրառվում է  սոցիալապես անապահով ընտանիքի երեխայի նկատմամբ: Օրինակ, անտեսված երեխա կարող է լինել նաև ապահով ընտանիքում, երբ ծնողները բացի երեխայի լավ սննդի կամ հագուստի բավարարումից, չեն մտահոգվում երեխայի  այլ կարևոր կարիքների բավարարման ուղղությամբ, ինչպիսիք են կրթության կամ առօրյա դաստիարակության նկատմամբ  անբավարար ուշադրությունը: Ամեն դեպքում ամեն ոք պետք է ճանաչի բռնության տեսակները և առօրյայում կանխարգելիչ  քայլերով արտամատախիլ անի այդ չարիքը:

Ազատամուտի ԻՄՓԱՔԹ  ակումբները Երեխայի հանդեպ բռնության կանխարգելման  օրվան նվիրված համատեղ իրականացրեցին  համայնքային ծրագիր՝ <<Բռնությունը փոխարինենք սիրով>> խորագրով,որին մասնակցեց մոտ 150 երեխա: Ակումբների անդամները  ներկայացրեցին բռնության ու դրա ձևերի սահմանումները, բնորոշ հատկանիշներն ու հնարավոր բացասական հետևանքները: Օրինակ ֆիզիակական բռնության ձևեր նշվեցին ծեծը, թափահարումը, թունավորելը, խեղդելը, հարվածները, իսկ հոգեբանականը՝ երեխայի կարիքները չկարևորելը, մեկուսացումը, ահաբելումը ստորացնելն ու վախեցնելը, հակասոցիալական վարքագծի հրահրելը: Այնուհետև երկուական խմբերով ակումբականները պայմանական ֆոտոպատմությունների օգնությամբ ներկայացրեցին  բռնության գործադրման առօրեական(ընտանեկան, դպրոցում կամ համայնքում պատահող) պատմություններ և այդ իրավիճակներն իրենց պատճառահետևանքային կապերով՝ տալով դրական լուծումներ: Ամեն պատմություն ավատվում էր խմբի կողմից հնչեցվող  բռնության կանխմանն ուղղված կոչերով: Ներկաները նաև դիտեցին բռնության դրսևորումների ու դրանց վատ հետևանքների մասին տեսանյութ, այնուհետև երեխաների համար կազմակերպվեց շախմատի ու շաշկիի մրցաշարեր: «Մենք ենք պատասխանատու մեր վարքի և արարքների համար: Մի  չմտածված քայլից կարող են տուժել շատ անմեղ երեխաներ: Չենք կարող փոխել անցյալը, սակայն կարող ենք փոխել ներկան։», ասում է 15ամյա Դիանան: Իսկ 16 ամյա Էդիտայի կարծիքով աղքատությունը համամարդկային հիմնախնդիր է, և դրա վերացումը ՄԱԿ-ի Կայուն զարգացման կարևոր և առաջնային նպատակներից է: «Ցավով պետք է նշել, որ աշխարհում շատ երեխաներ ապրում են աղքատության մեջ` զուրկ լինելով բարեկեցության տարրական պայմաններից:» ,ասում է Դիանան:

ԻՄՓԱՔԹ ծրագիրը մշակվել է Ռումինիայում «Նոր Հորիզոններ» հիմնադրամի կողմից և Հայաստանում իրականացվում է Վորլդ Վիժն Հայաստանի կողմից՝ 6 մարզերում և Երևանում: Նպատակն է համախմբել երիտասարդությանը ԻՄՓԱՔԹ խմբերում, աջակցել նրանց ձեռք բերել քաղաքացիական հասարակւթյան և աշխատանքային շուկայում մրցունակ լինելու համար անհրաժշտ կարողություններ:

ՎՎՀ Իջևանի գրասենյակ