Կայուն զարգացման նպատակները և երեխաները

Հունիսի 28, 2018

Լուրեր կազմակերպություններից

Մարդկության առջև ծառացած գլոբալ խնդիրները հաղթահարելու նպատակով,  Դեռևս 2015 թ. ՄԱԿ-ի կողմից ընդունվել են Կայուն զարգացման 17 նպատակները (ԿԶՆ): Կլիմայի փոփոխությունների դեմ պայքարի, սովի , աղքատության և անհավասարությունների կրճատման, որակյալ կրթության ապահովման և մաքուր միջավայրի պահպանության  ու այլ խնդիրներ պարունակող ոլորտների բարելավմանն ուղղված այս համաշխարհային նպատակներն ընդունել է նաև մեր երկիրը՝ ստանձնելով պարտավորություններ հնարավորինս  քայլեր ձեռնարկել դրանց մինչև 2013 թ. հասնելու համար: Կարևորելով հանրային իրազեկման անհրաժեշտությունը ԿԶՆ-երի վերաբերյալ, Վորլդ Վիժն Հայաստանի կողմից գործող ԻՄՓԱՔԹ երիտասարդական ակումբները ներգրավվեցին դրանց լուսաբանման քաորզարշավին: Տավուշի մարզում ԿԶՆ-երի վերաբերյալ երեխաների շրջանում իրազեկումը բարձրացնելու նպատակով հինգ համայնքների ԻՄՓԱՔԹ ակումբներ նախաձեռնեցին «Կայուն զարգացման նպատակները և երեխաները» ծրագիրը, որոնց շրջանակում Այգեհովիտ, Ազատամուտ, Բերդ, Խաշթառակ և Սարիգյուղ համայնքների դպրոցներում սովորողների շրջանում իրականացրեցին ԿԶՆ-երի ծանոթացման հանդիպումներ,  թեմատիկ շնորհանդեսներ, տրամադրեցին տեղեկատվական պաստառներ, օրացույցեր, նպատակների նշմամբ թևնոցներ և շապիկներ: Խմբային աշխատանքների արդյունքում նաև վեր հանվեցին համայնքային խնդիրներ, որոնք տեղական մակարդակում ինչ որ չափով առնչվում են ԿԶՆ-երի հետ: Ակումբների կողմից մշակվեցին ու իրականացվեցին համայնքային նախագծեր, որոնց ամբողջական արդյունքները ներկայացվեցին ամփոփիչ միջոցառմանը: Մասնակցում էին հինգ համայնքների մոտ 130 երեխա  և ՏԻՄ-երի, դպրոցների ու հասարակական կազմակերպությունների ներկայացուցիչներ: Միջոցառմանը ՎՎՀ Տավուշի երիտասարդական ծրագրերի համակարգող Արարատ Ալիխանյանը նշեց, որ երեխաների դերը հանրային ուշադրոթյունը  ԿԶՆ-երի հանդեպ հրավիրելու ուղղությամբ  կարևոր է, քանի որ ապագայի խաղաղ ու կայուն զարգացման համար հիմքերը ներկայում է դրվում: Ամեն մի ակումբ ներկայացրեց իր համայնքում կատարված աշխատանքները, արդյունքները, որից հետո ելույթ ունեցան նաև  հյուրերը: Ազատամուտի միջնակարգ դպրոցի տնօրեն Լարիսա Հակոբյանը նշեց. «ԻՄՓԱՔԹ ակումբների դերը նման նախաձեռնությունների կազմակերպման ու համախմբման գործում զգալի է, քանի որ քաղաքացիական ակտիվության շնորհիվ տեղական խնդիրների վրա քաղաքացիների ուշադրություն է հրավիրվում, երեխաները տեղեկանում են իրենց միջավայրին սպառնացող վտանգների մասին և մտածում են դրանք հաղթահարելու ուղղությամբ»: Իսկ նույն դպրոցի 17-ամյա աշակերտուհի Հրաչուհին ուրախությամբ արձանագրում է. «Տավուշի մարզի շատ երեխաներ արդեն  գիտեն, թե ինչ են կայուն զարգացման նպատակները և ինչու են դրանք կարևոր մարդկության առաջընթացի համար, և կարծում եմ, որ բոլոր երկրների ղեկավարությունները պետք է միավորեն իրենց ջանքերը մեր մոլորակի խաղաղությունն ու անվտանգությունը, կայուն զարգացումը ապահովելու համար: Ինձ համար կարևոր է ԿԶ 4-րդ նպատակի՝ որակյալ կրթության իրացումը, քանի որ կրթությունն է մարդկության քաղաքակիրթ զարգացման  կարևորագույն գործոնը»:

Նշենք, որ ԿԶՆ-երի վերաբերյալ հանրային լուսաբանման քարոզարշավներ են իրականացվել նաև Շիրակ և Գեղարքունիք մարզերում ՝ ԻՄՓԱՔԹ ակումբների կողմից:

ՎՎՀ Իջևանի գրասենյակ