ԻՄՓԱՔԹ ակումբի բարեգործական ծրագիրը Նոյեմբերյանում

Հունիսի 5, 2018

Լուրեր կազմակերպություններից

Հետաքրքիր նախաձեռնությամբ են հանդես եկել Նոյեմբերյան համայնքում արդեն երկու տարի ակտիվ գործունեություն ծավալող ԻՄՓԱՔԹ ակումբը:  Ակումբը, որի անդամ են Դովեղ և Նոյեմբերյան համայնքների մոտ 17 երեխա, ամեն տարի  իրականացնում է երկու համայնքային ծրագիր, որը հնարավորություն է տալիս առաջին հերթին երեխաներին գործնականում կիրառելու իրենց գիտելիքներն ու կարողությունները: Իսկ տարվա ընթացքում այդ գիտելիքները ձեռք են բերում շաաբթական հանդիպումների ընթացքում, երբ ուսումնասիրում են կրթական մոդուլներ ոչ ֆորմալ  մեթոդներով: Ուսումնասիրելով և ավարտելով  «Աշխատունակություն» ձեռնարկը, այս անգամ երեխաներն իրենց առաջնորդներ Ֆելիցա Աբովյանի և Գայանե Գիշյանի գլխավորությամբ  որոշեցին համայնքային ծրագրին տալ սոցիալական ձեռնարկատիրության ուղղվածություն, իսկ դրա շրջանակում ստեղծված իրերի վաճառքից ստացված հասույթով գնել փայտագործության գործիքների հավաքածուներ: Այդ հավաքածուները երեխաները որոշել են նվիրել  Տավուշի թեմի Նոյեմբերյանի  սոցիալ-կրթական կենտրոնի ձեռքի աշխատանքների խմբակներին: Իրենց ձեռքի աշխատանքների վաճառքը երեխաները շարունակեցին նաև հունիսի 1-ին՝ երեխայի իրավունքների պաշտպանության օրը: Բազմաթիվ այցելուներ հետաքրքրությամբ էին դիտում երեխաների աշխատանքները և գնումներ կատարում, որն էլ շատ է ոգևորել ակումբականներին: Ակումբի անդամ Ժաննան տպավորված է իրենց աշխատանքների հանդեպ մարդկանց ուշադրությունից և ասում է հպարտությամբ. «Մասնակցում եմ ԻՄՓԱՔԹ  ակումբին և ամեն տարի մենք մի ծրագիր ենք իրականացնում, իսկ այս տարի որոշեցինք կազմակերպել ցուցահանդես-վաճառք` բարեգործական նպատակով։ Մենք փորձում ենք օգնել մեր հասակակիցներին։ Այս իրերը  պատրաստել ենք մեծ հաճույքով։ Այս ծրագիրը ինձ տվել է թիմում աշխատելու կարողություն, ուսուցանել աշխատասիրություն, բարձրացրել պատասխանատվությունը ։ Ինչ որ տեղ նաև մտածեցի իմ սեփական բիզնեսը հետագայում բացելու մասին»:

ԻՄՓԱՔԹ  ծրագիրը մշակվել է Ռումինիայում «Նոր Հորիզոններ» հիմնադրամի կողմից և Հայաստանում իրականացվում է Վորլդ Վիժն Հայաստանի կողմից: Նպատակն է համախմբել երիտասարդությանը  ԻՄՓԱՔԹ  խմբերում, աջակցել նրանց ձեռք բերել քաղաքացիական հասարակության և աշխատանքային շուկայում մրցունակ լինելու համար անհրաժեշտ կարողություններ: Հայաստանի Լոռի, Տավուշ, Արագածոտն, Շիրակ, Սյունիք, Գեղարքունիք մարզերում և Երևան քաղաքում գործում են  63 ԻՄՓԱՔԹ ակումբներ:

ՎՎՀ Իջևանի գրասենյակ