Մասնագիտությունների աշխարհում

Մարտի 22, 2018

Դպրոցական անցուդարձ

«Մասնագիտական կրթություն և ուսուցում, համագործակցություն» ծրագրի շրջանակներում Կապանի N13 հիմնական դպրոցի IX դասարանի աշակերտները ճանաչողական այց կազմակերպեցին Սյունիքի տարածաշրջանային պետական քոլեջ, որն ուղղված էր սովորողների մասնագիտական կրթության ընտրության խթանմանը և աշխատաշուկայում նրանց մրցունակության բարձրացմանը: Այցելությունը ղեկավարում էր դպրոցի ՄԿԱ գծով փոխտնօրեն Ժ.Վարդանյանը, ԴԱԿ Ռ.Մկրտչյանը,Դասղեկ Ս.Օհանջանյանը:
Քոլեջն ունի բուռն ստեղծագործական կյանք և հարուստ կենսագրություն: Փոքր մի տուն, սակայն մեծ նվաճումներ, մեծ հաղթանակներ, այս էր ուսումնական հաստատության նշանաբանը: Քոլեջում աշխատում են վաստակաշատ և երիտասարդ դասախոսներ, ինչպես նաև վարչական հմուտ աշխատակազմ, որոնք ջանք ու եռանդ չեն խնայում ուսանողներին հաղորդելու համապատասխան գիտելիքներ, կյանքի նոր մարտահրավերներին ընդառաջ գնալու և աշխատաշուկայում մրցունակ լինելու:
Հենց նրանք էլ ներկայացրին քոլեջի պատմությունը, աշխատաշուկայում մեծ պահանջարկ ունեցող մասնագիտությունները,ծանոթացրին արհեստանոցներին և լաբորատորիաներին, ուսուցանվող մասնագիտություններին: Խոսվեց իրականացվող կրթական ծրագրերի և դիմորդների ընդունելության կանոնների , պրակտիկաների, շարունակական կրթության, բարձրագույն ուսումնական հաստատություններում ուսումը շարունակելու հնարավորությունների մասին: 
Նախնական պայմանավորվածություն ձեռք բերվեց առաջիկայում «Բաց դռների օր» միջոցառումների շրջանակներում հյուրընկալվել դպրոց և հանդիպել մասնագիտական կողմնորոշում անցած աշակերտներին ու նրանց ծնողներին: Այցը հիշարժան էր նաև քոլեջի և դպրոցի միջև տարիներ առաջ կնքված համագործակցության պայմանագրի թարմացումով:
Միջոցառման կայացմանը նպաստեց Սյունիքի տարածաշրջանային պետական քոլեջի տնօրեն՝ Անժելա Մաքյանը: Էքսկուրսիայից հետո հանդիպեցինք տնօրենին, որի հետ ի թիվս ընթացիկ հարցերի՝ քննարկեցինք մասնագիտական կողմնորոշմանը վերաբերող մի շարք հիմնախնդիրներ և ապագայում նախատեսվող միջոցառումներ:

ՄԿԱ գծով փոխտնօրեն Ժաննա Վարդանյան