Ինչու՞ ենք քննարկում այս նովելը

Մարտի 12, 2018

Դպրոցական անցուդարձ

Ֆրանկոֆոնիայի միջազգային օրվան նվիրված, ՀՀ Սյունիքի մարզային հանրակրթական ուսումնական հաստատություններում նախատեսված միջոցառումների համատեքստում մարտի 7-ին Կապանի N 5 հիմնական դպրոցի գրադարանում կազմակերպվեց ֆրանկոֆոն հերթական միջոցառումը, այն է` գրքի քննարկում: Քննարկման նյութը Գի դը Մոպասանի «Զարդը» նովելն էր, իսկ գրադարանի հյուրը 9-րդ «ա» դասարանը:

Աշակերտների վերլուծությունից և, «Ինչու՞ ենք քննարկում այս նովելը», հարցի պատասխանից պարզ դարձավ, որ ստեղծագործության ընտրությունը ճիշտ էր, արդիական, ուսուցողական, պահանջված: Միջոցառումն անցկացվեց հայոց լեզվի ու գրականության ուսուցչուհի Ա. Ծատրյանի, գրադարանավարուհի Ն. Ասատրյանի և ԴԱԿ Հ. Մեսրոպյանի ջանքերով:

Օրվա խորհուրդն իր ներկայությամբ պատվել էր Սյունիքի մարզպետարանի աշխատակազմի կրթության մշակույթի և սպորտի վարչության կրթության բաժնի առաջատար մասնագետ Նելլի Կարապետյանը, ով գրադարան մուտք գործեց` արդեն իսկ հիացած դպրոցում կատարված Ֆրանկոֆոն աշխատանքներով (անհատական նկարների ցուցահանդես, դասարանական պատի թերթերի ցուցահանդես «Ֆրանկոֆոնիան հայկական տարրերով» ցուցահանդես: Ներդպրոցական էքսկուրսիան ուղեկցվեց Էդիթ (Ջովաննա Գասսիոն) Պիաֆի աստվածային կատարումների ներքո:

Մարզային պատասխանատուն բարձր գնահատեց կատարված աշխատանքները, շնորհակալություն հայտնեց դպրոցի տնօրեն Սիրանուշ Հարությունյանին, տնօրենությանը և ուսուցչական համակազմին:

 

Կապանի N 5 հիմնական դպրոց