Բազմակողմ համագործակցության արդյունքում համայնքն ունի բարեկարգ մարզադաշտ

Փետրվարի 9, 2018

Լուրեր կազմակերպություններից

Տավուշի մարզի Ազատամուտ համայնքի ԻՄՓԱՔԹ ավագ ակումբն արդեն 4-րդ տարին է ինչ համայնքում համախմբել է երեխաներին՝ ընձեռելով հնարավորություն զարգացնելու իրենց կարողություններն ու հարստացնելու գիտելիքները ակտիվ քաղաքացիության, առաջնության և այլ ոլորտներում, որոնք գործնականում կիրառում են համայնքային ծառայության ուսումնական ծրագրեր իրականացնելիս:

Համայնքում ակումբն իրականացրել է մի քանի նախագծեր, սակայն այս մի ծրագիրը որ կրում էր «Սպորտը՝ որպես համայնք-ՏԻՄ համագործակցության խթան» խորագիրը, բացառիկ էր և  կյանքի կոչվեց Վորլդ Վիժն Հայաստանի, Ազատամուտի համայնքապետարանի՝ ի դեմս համայնքի ղեկավար Ժորա Մարտիրոսյանի և Եվրասիա համագործակցության հիմնադրամի Հյուսիսային մասնաճյուղի «Իջևանի Երիտասարդական բանկ ծրագրի» համագործակցության շրջանակում: Ակումբը մասնակցել էր Եվրասիա համագործակցության հիմնադրամի Հյուսիսային մասնաճյուղի Իջևանի Երիտասարդական բանկ ծրագրի շրջանակներում հայտարարված դրամաշնորհային մրցույթին և արժանացել 87 000 ՀՀ դրամ մրցանակի։ Ծրագրի բաղադրիչներից էր  ՏԻՄ-երի հետ լայն համագործակցության խթանումը տեղական խնդիրների լուծման նպատակով և  համայնքի ղեկավարությունը պատրաստակամություն էր հայտնել համաֆինանսավորել ծրագիրը: Ծրագրի շրջանակներում բարեկարգվեց համայնքի ֆուտբոլի դաշտը, տեղադրվեցին նստարաններ և աղբամաններ, որոնք գունազարդվեցին, տեղադրվեցին  վոլեյբոլի ցանց, ֆուտբոլի դարպասերին ևս ցանցեր անցկացվեցին: Աշխատանքներին աջակցում էին նաև  համայնքի փոքրիկները, ինչպես նաև այլ երիտասարդներ ու մեծահասակներ, ովքեր իրենց ջանասիրությամբ նպաստ բերեցին ընդհանուր աշխատանքին։ Աշխատանքներն ավարտելուց հետո կազմակերպվեց վոլեյբոլի մրցույթ։ Ակումբի առաջնորդ, 21 –ամյա Անի Միրզոյանը նշում է.«Կարևորում եմ այս ծրագիրը, քանի որ ակումբը կարողացավ առաջին անգամ դրամաշնորհային մրցույթի մասնակցել և ստանալ այն, որն էլ դարձավ համայնքային ծառայության ուսումնական ծրագրի հիմնաքարը։ Մարզադաշտը կարևոր նշանակություն ունի համայնքի համար, ուստի ակումբականները որոշեցին ձեռնամուղ լինել այս ծրագրի իրականացմանը։ Երեխաները հերթական անգամ ապացուցեցին, որ կարող են առաջ քաշել և լուծել համայնքային խնդիրներ համագործակցելով նաև տեղական իշխանությունների հետ»: Այս ծրագիրը վկայում է, որ սերտ համագործակցության ու գործընկերային կայուն շրջանակների առկայությամբ կարելի է ապավովել զարգացում և լուծել տեղական խնդիրները:

ԻՄՓԱՔԹ  ծրագիրը մշակվել է Ռումինիայում «Նոր Հորիզոններ» հիմնադրամի կողմից և Հայաստանում իրականացվում է Վորլդ Վիժն Հայաստանի կողմից: Նպատակն է համախմբել երիտասարդությանը  ԻՄՓԱՔԹ  խմբերում, աջակցել նրանց ձեռք բերել քաղաքացիական հասարակության և աշխատանքային շուկայում մրցունակ լինելու համար անհրաժեշտ կարողություններ:Հայաստանի Լոռի, Տավուշ, Արագածոտն, Շիրակ, Սյունիք, Գեղարքունիք մարզերում և Երևան քաղաքում գործում են  63 ԻՄՓԱՔԹ ակումբներ, որոնց անդամներ են 1,151 երեխա: 

ՎՎՀ Իջևանի գրասենյակ