ԻՄՓԱՔԹ ակումբի ծրագրի շնորհիվ բնակիչները ավելի կիրազեկվեն ՏԻՄ-երի աշխատանքից

Դեկտեմբերի 25, 2017

Դպրոցական անցուդարձ

Տավուշի մարզի Այգեհովիտ համայնքի ԻՄՓԱՔԹ ակումբն արդեն երեք տարի է ինչ ակտիվ գործում է ՝ բարձրացնելով տեղի երեխաների քաղաքացիական գիտակցությունն ու մասնակցության աստիճանը համայնքային կյանքում: Ակումբը ոչ ֆորմալ կրթական միջավայր է, որտեղ ակտիվ քաղաքացիության, առաջնորդության և այլ ոլորտներում երեխաները ձեռք են բերում գիտելիքներ և հզորացնում իրենց կարողությունները, իսկ գործնական գիտելիքները կիրառում համայնքային նախագծեր իրականացնելիս: Մի քանի համայնքային ծրագրեր արդեն իրականացվել են և ակումբը արդեն ունենալով փորձառություն ֆոնդահայթայթման և  գործընկերներ ձեռքբերելու գործում, վերջերս շահեց նաև <<Իջևանի երիտասարդական բանկ>> ծրագրի շրջանակում հայտարարված դրամաշնորհը: Այսպիսով,  ակումբն իրականացրեց իր նոր համայնքային ծրագիրը՝ <<Ավելի իրազեկ համայնք>> անվամբ, որի նպատակն էր համայնքում բարձրացնել բնակիչների տեղեկացվածությունը տեղական ինքնակառավարման մարմնի ընդունած որոշումների մասին և ՏԻՄ որոշումների կայացման մեջ մասնակցության մակարդակը: Ծրագիրն հնարավոր դարձավ ԱՄՆ ՄԶԳ -ի աջակցությամբ իրականացվող <<Իջեւանի Երիտասարդական Բանկ >> (ԻԵԲ) ծրագրի շրջանակներում' Այգեհովիտի համայնքապետարանի (ղեկավար՝ Լյովա Գրիգորյան) և Վորլդ Վիժն Հայաստան միջազգային բարեգործական կազմակերպության անմիջական համաֆինանսավորմամբ: Իջևանում «Երիտասարդական բանկ» ծրագիրը համակարգում է Եվրասիա Համագործակցության Հիմնադրամի հյուսիսային մասնաճյուղը՝ ԱՄՆ ՄԶԳ-ի աջակցությամբ: ԻԵԲ-ի տրամադրված դրամաշնորհով և ՎՎՀ-ի ու համայնքապետարանի համաֆինանսավորմամբ վերանորոգվեցին Այգեհովիտի 2 կանգառները և դրանցից յուրաքանչյուրում կահավորվեցին համապատասխան անկյուններ, որտեղ կտեղադրվեն ՏԻՄ նորությունները՝ ավագանու առաջիկա նիստի վայր, օր, ժամ տեղ,օրակարգ, նաև կայացված որոշումներ, ՏԻՄ-երի օրենսդրական այլ ակտեր ու գործառույթների վերաբերյալ իրավական ակտեր: Այս անկյուններում կտեղադրվեն նաև համայնքում կազմակերպվող այլ իրադարձությունների վերաբերյալ տեղեկատվություն:

Ծրագրի շնորհիվ կբարձրանա Այգեհովիտ համայքի բնակիչների իրազեկվածությունն ու մասնակցությունը համայնքային կյանքին և որոշումների կայացմանը: Ինչպես նաև Այգեհովիտ համայնքի ՏԻՄ-ի աշխատանքը կդառնա ավելի թափանցիկ և մասնակցային: Ակումբի անդամ և ծրագրի մասնակից, 15 –ամյա Մանիկը շատէ  կարևորում համայնքում յուրաքանչյուրի մասնակցությունը խնդիրների լուծման գործում. «Մեր գյուղը մեր տունն է, մեր գյուղը մեր հայրենիքն է  և  որևէ լավ բան անելը ինձ երջանկացնում է:  Մենք իրականացրեցինք  մի կարևոր գործ, որի շնորհիվ բնակիչները տեղեկացված կլինեն համայնքապետարանի ընդունած որոշումների, ավագանիի հանդիպումների ու այլ տեղեկատավության մասին և դրանով կապահովվի բնակիչների մասնակցությունը համայնքի կառավարմանը»: 

Գյուղական համայնքների երիտասարդների գործնական հմտությունները և համայնքների զարգացման գործում ղեկավար դերեր ստանձնելու կարողությունները զարգացնելու նպատակով Եվրասիա համագործակցություն հիմնադրամը (ԵՀՀ) սկսած 2007 թվականից իրականացնում է «Երիտասարդական բանկ» ծրագիրը: Երիտասարդական բանկ ծրագիրը երիտասարդական քաղաքացիական ակտիվության և առաջնորդնորդության ծրագիր է, որի շրջանակներում տարբեր մարզերում ձևավորված և վերապատրաստված Երիտասարդական բանկ կոչվող կոմիտեները փոքրամասշտաբ ծրագրեր են իրականացնում իրենց հասակակից երիտասարդների համար, ինչպես նաև իրենք են իրականացնում կամավորական ծրագրեր՝ իրենց և ուրիշների կյանքում դրական փոփոխություններ ապահովելու համար:

ԻՄՓԱՔԹ  ծրագիրը մշակվել է Ռումինիայում «Նոր Հորիզոններ» հիմնադրամի կողմից և Հայաստանում իրականացվում է Վորլդ Վիժն Հայաստանի կողմից: Նպատակն է համախմբել երիտասարդությանը  ԻՄՓԱՔԹ  խմբերում, աջակցել նրանց ձեռք բերել քաղաքացիական հասարակության և աշխատանքային շուկայում մրցունակ լինելու համար անհրաժեշտ կարողություններ:

ՎՎՀ Իջևանի գրասենյակ