Դպրոցը բոլորեց 110-ամյակը

Դեկտեմբերի 20, 2017

Դպրոցական անցուդարձ

Գեղարքունիքի մարզի Լճաշեն գյուղի Ա.Տեր-Գրիգորյանի անվան միջնակարգ դպրոցը, ուսած պատկառելի տարիք, բոլորեց հիմնադրման 110-ամյակը, որին նվիրված տեղի ունեցավ ցերեկույթ: Բացման խոսքով հանդես եկավ դպրոցի տնօրեն Աիդա Մուրադյանը, որը ներկայացրեց դպրոցի անցած 110-ամյա ճանապարհը՝ փաստելով, որ դպրոցի դեմքը նրա սաներն են, որոնք 110-ամյա պատմության ընթացքում դարձել են գիտության ականավոր գործիչ, դոկտոր-պրոֆեսոր, անվանի նկարիչ, զինվորական, շինարար ու մանկավարժ, բոլորն էլ հանրության համար արժանավոր մարդիկ:

Գեղարքունիքի մարզպետարանի աշխատակազմի ԿՄՍ վարչության պետ Գարիկ Բադալյանը շնորհավորեց ներկաներին, ընթերցեց մարզպետի որոշումը, դպրոցի 110-ամյակի կապակցությամբ տնօրեն Աիդա Մուրադյանին, ուսուցիչներ Սալվինազ Սիմոնյանին, Քրիստինե Շհոյանին և Անյա Թովմասյանին հանձնեց շնորհակալագրեր:

Ցերեկույթի ընթացքում շնորհավորանքի խոսք ասաց Լճաշենի համայնքի ղեկավար Կորյուն Մարգարյանը և մի շարք ուսուցիչների շնորհակալագրեր հանձնեց:

Իրենց բարեմաղթանքի խոսքն ասացին Աշոտ Տեր-Գրիգորյանի  դուստրեր Լիլիթ և Ռուզաննա Տեր-Գրիգորյանները, Սևանի Սուրբ Հրեշտակապետաց եկեղեցու քահանա Տեր-Ստեփանոս Իգնաթևոսյանը, ԵՊՀ իրավաբանական ֆակուլտետի «Պետություն և իրավունքի» ամբիոնի վարիչ Արթուր Վաղարշյանը, դպրոցի շրջանավարտ Պապին Մուրադյանը, ովքեր գրադարանին նվիրեցին գրքեր:

Շնորհավորանքի խոսքերին միացան Սևանի հացի գործարանի տնօրեն Աշոտ Ավետիսյանը, Սևանի զինվորական կոմիսար Տիգրան Աթայանը, որը դպրոցի տնօրենին, տնօրենի տեղակալին ու զինղեկին հանձնեց ՀՀ Պաշտպանության նախարարության շնորհակալագրեր:

Դպրոցի մի շարք  ուսուցիչներ պարգևատրվեցին Հայաստանի ԿԳ  աշխատողների արհեստակցական  կազմակերպությունների ճյուղային  հանրապետական միության նախագահության  պատվոգրերով և դպրոցի տնօրենի շնորհակալագրերով:

Գավառի պետական համալսարանի ռեկտորի ուղերձը ներկայացրեց համալսարանի որակի ապահովման բաժնի վարիչ Անուշ Մայիլյանը, ելույթ ունեցավ աշակերտական խորհրդի նախագահ Մարիամ Ղուկասյանը:

Հնչում էին երգն ու ասմունքը, պարն ու բարեմաղթանքները,  հանդես եկան դպրոցի աշակերտները, «Պատանի երկրապահ» ակումբի սաները /ղեկավար՝ Գ.Մանուկյան/, «Փոքրիկ երգիչներ» /ղեկավար՝ Մ.Վարդանյան/ և «Մանկունք» /ղեկավար՝ Ք.Քոչարյան/ երգչախմբերը, կատարեցին  «Հայկական Այբուբեն», «Արևներ, զինվորի երդում», «Եկեղեցին հայկական», «Իմ ուսուցիչ», «Մեր դպրոցը» երգերը:

«Տիկնիկային թատրոն»  արտադասարանական խմբակը /ղեկավար՝ Հ.Առաքելյան/, բեմականացրեց Հ.Թումանյանի «Ոսկու կարասը» հեքիաթը: Կապրի դպրոցը, կապրեցնի Հայաստան երկիրը:

Միջոցառմանը ներկա էին կրթօջախի նախկին շրջանավարտներ, վաստակած հանգստի անցած ուսուցիչներ, կառավարման խորհրդի անդամներ, ուսուցիչներ, աշակերտներ, հյուրեր Գավառի պետական համալսարանից:

 

Ն.Դավթյան
Տնօրենի՝ մասնագիտացված կրթական աջակցությունների գծով տեղակալ