«Ընտանիք» կենտրոն. Գյումրին ապրում է... հոգևոր երգերը վերհառնում...մարդասիրությունն արմատանում

Դեկտեմբերի 7, 2017

Դպրոցական անցուդարձ

Դեկտեմբերի 6-ին կրթության և գիտության նախարարության «Ընտանիք» մանկապատանեկան ստեղծագործական կենտրոնի երգարվեստի խմբակը մասնակցեց ՀՀ Շիրակի մարզպետարանի կողմից կազմակերպված Հոգևոր երգերի մարզային 4-րդ փառատոնին՝ նվիրված 1988 թվականի երկրաշարժի անմեղ զոհերին: Միջոցառումն անցկացվեց Գյումրու Սուրբ Հակոբ Մծբնեցի եկեղեցում` մարզի երաժշտական և արվեստի դպրոցների, մանկապատանեկան կենտրոնների երգչախմբերի և այլ անհատ կատարողների մասնակցությամբ: 

Փառատոնին մասնակցելու նպատակն էր սաներին հաղորդակից դարձնել հոգևոր ստեղծագործություններին, նպաստել մասնագիտական փորձի ձեռքբերմանը, հարգանքի տուրք մատուցել 1988թ. աղետյալ երկրաշարժի նահատակներին:

Հնչեցին բազմաթիվ հոգեցունց կատարումներ, որոնց ականջալուր դարձավ հավատավոր ժողովուրդը: Փառատոնի ընթացքում «Ընտանիք» կենտրոնի երգարվեստի խմբակը և ղեկավար Արևիկ Թանաշեանը հանդես եկան «Մայր և կույս», «Գոհար վարդն», «Այսօր ցնծան» հոգևոր երգերով: Սաների ելույթը տպավորիչ էր և ազդեցիկ:

Շիրակի մարզպետի խորհրդական, ՀՀ մշակույթի վաստակավոր գործիչ Հասմիկ Կիրակոսյանի ձեռամբ ՀՀ Շիրակի մարզպետարանի կողմից պատվոգրեր շնորհվեցին ՀՀ ԿԳՆ «Ընտանիք» մանկապատանեկան ստեղծագործական կենտրոնի երգարվեստի խմբակին և օպերային երգչուհի,  բազմաթիվ միջազգային մրցույթների դափնեկիր, «Ընտանիք» կենտրոնի երգարվեստի խմբակի ղեկավար Արևիկ Թանաշեանին:

Հասմիկ Կիրակոսյանն առանձնակի գովեստով անդրադարձավ  «Ընտանիք» կենտրոնի նորաստեղծ երգարվեստի խմբակի կատարմանը:

Միջոցառումից հետո կենտրոնի սաները, մանկավարժական հանրույթը Սպիտակի երկրաշարժի 29-րդ տարելիցի առիթով եկեղեցում աղոթք մրմնջացին, մոմեր վառեցին և ծաղիկներ խոնարհեցին «Վերածնունդ» հուշակոթողի առջև:  

Սաները տուն դարձան վերաիմաստավորված ուխտով՝ հիշելու, աղոթելու, ապրելու և արարելու, վեր հառնելու ձգտումով:

Դեկտեմբերի 7-ի նախօրեին հնչած բոլոր կատարումները դարձան ձոն՝ հիշատակ անմեղ զոհերի...: 

 

Ս. Էլբակյան