Երեխաներն աջակցում են հոգևոր-պատմական արժեքների պահպանմանը

Հոկտեմբերի 8, 2016

Դպրոցական անցուդարձ

Երեխաների քաղաքացիական դաստիրակությանն է ուղղված Բերդի թիվ 3 հիմնական դպրոցում 2016 թ. ապրիլից ստեղծված գործում է ԻՄՓԱՔԹ ակումբները: Նախատեսված էր ունենալ մեկ ակումբ, սակայն ակումբում անդամագրվել ցանկացող երեխաների թիվը զգալի էր, հետևաբար որոշվեց բացել երկու ակումբ: Ակումբում ոչ ֆորմալ կրթությամբ երեխաներին տրվում է առաջնորդության, ակտիվ քաղաքացիության, աշխատունակության եւ սոցիալական ձեռներեցության ոլորտների գիտելիքներ, ձևավորվում են անհրաժեշտ հմտություններ տեսական ու գործնական գիտելիքը կիրառելու համար: «Ակտիվ քաղաքացիություն» ուսումնական մոդուլի ուսումնասիրությունից հետո երեխաներն իրականացնում են իրենց մշակած համայնքային ծրագիրը՝ բացահայտված որևէ խնդրի լուծման նպատակով:

Բերդի ԻՄՓԱՔԹ-1 ակումբը (առաջնորդ՝ Լիանա Քոսակյան) իրականացրեց իր առաջին համայնքային ծրագիրը «Չենք մոռացել դարերի պատմությունը» անվամբ: Երեխաները մեծ խանդավառությամբ էին սպասում իրենց կողմից առաջին անգամ համայնքում իրականացվող նախագծի մեկնարկին: Ծրագրի նպատակն էր խթանելլ քաղաքի բնակչության հետաքրքրությունը սեփական ծննդավայրի պատմության նկատմամբ: Նաև խնդիր էր դրված վերաարժևորել պատմամշակութային հուշարձանների նկատմամբ առավել հոգատար և գիտակից վերաբերմունքը: Ծրագրի իրականացման և հոգևոր-մշակութային կոթողների մասին ճշգրիտ տեղեկատվություն հավաքագրելու նպատակով երեխաները հանդիպել են դպրոցի տնօրեն Ռ.Թումանյանի և Պատմական միջավայրի պահպանության Տավուշի մարզային ծառայության ղեկավար` Ռաֆիկ Մուրադյան հետ: Ամփոփ տեղեկատվությունը մշակելուց հետո պատրաստվեցին նաև պաստառները:

Ծրագրի շրջանակներում ակումբականները Տավուշի մարզի Բերդ համայնքի տարածքում գտնվող 10-րդ դարից կիսավեր պահպանված «Ցլիկ Ամրամի» բերդի և 12-13-րդ դարերից պահպանված Մայրի վանքի մոտ տեղադրեցին հայերեն, ռուսերեն ու անգլերեն լեզուներով պատմական ակնարկ պարունակող ցուցանակներ, որոնց միջոցով զբոսաշրջիկները և տեղացիները կտեղեկացվեն հուշահամալիրների պատմությանը: Մինչ այդ նման հնարավորությունը բացակայում էր: Երեխաները սանիտարական մաքրություն իրականացրեցին այդ վայրերում: Դպրոցի տնօրեն Ռ.Թումանյանը ևս մասնակցելով երեխաների այս ծրագրի իրականացմանը, բարձր գնահատեց ակումբի ակտիվությունը և առաջին նախաձեռնությունը, նշեց.<< Երեխայի հոգատարությունը հայրենի ծննդավայրի հոգևոր-մշակութային արժեքների պահպանման գործում բավականին դրական փոփոխություն է բերում յուրաքանչյուրի քաղաքացիական վարքագծում և նպաստում է հոգևոր-մշակութային արժեքների պահպանմանը>>: Ծրագրին նաև աջակցել է Բերդի քաղաքապետարանը:

ԻՄՓԱՔԹ ծրագիրը Ռումինիայում մշակվել է «Նոր Հորիզոններ» հիմնադրամի կողմից եւ Հայաստանում իրականացվում է Վորլդ Վիժն Հայաստանի աջակցությամբ: 2016 թ. դրությամբ 33 ԻՄՓԱՔԹ ակումբներ են գործում Հայաստանի 6 մարզերում, որոնք ունեն ավելի քան 500 անդամ: Ակումբների կողմից իրականացվել են 60-ից ավելի համայնքային ծրագրեր:

ՎՎՀ Իջևանի գրասենյակ