Հայաստանի բնության պետական թանգարանը հրավիրում է միասին բացահայտելու Հայաստանի բնաշխարհի գաղտնիքները

Նոյեմբերի 10, 2017

Մշակութային լուրեր Լուրեր կազմակերպություններից

Հայաստանի բնության պետական թանգարանում «բնակվող» կենդանիները անհամբեր սպասում են Ձեզ՝ միասին բացահայտելու Հայաստանի բնաշխարհի գաղտնիքները:

21-րդ դար, երբ աշխարհը կանգնած է մի շարք բնապահպանական խնդիրների առջև, էլ ավելի արդիական է դառնում բնության պահպանության թեման, և  մեծանում է բնապահպանություն քարոզող կառույցների դերն աշխարհում: Այդպիսի կառույց է հանդիսանում «Հայաստանի բնության պետական թանգարանը», որը գտնվում է քաղաքամայր Երևանի հենց սրտում`  Տիգրան Մեծի  34 հասցեում:

Ծնված լինելով 1952 թվականին` տարածաշրջանում իր տեսակի մեջ եզակի այս թանգարանը ծանրակշիռ քայլեր է կատարում բնակչության բնապահպանական դաստիարակության և բնապահպանական կրթության, ինչպես նաև բնապահպանական քարոզչության իրականացման գործում:

Թանգարան մտնող յուրաքանչյուր այցելու, ամենակրտսերից մինչև ամենատարեցը, կարող է ծանոթանալ Հայաստանի՝ իր փոքր տարածքի համար չափազանց հարուստ ու ինքնատիպ կենսաբազմազանությանը:

Թանգարանում այցելուները կարող են տեսնել իրենց ծանոթ ու սիրելի կենդանիներին` ներկայացված խրտվիլակների տեսքով, ինչպես նաև ՀՀ Կարմիր գրքում ընդգրկված կենդանատեսակներին և բուսատեսակներին: Թանգարանում ներկայացվող բոլոր ցուցանմուշները բնական են:

Թանգարանում ներկայացված է նաև ակվարիումային ձկնատեսակների մշտապես գործող  ցուցադրություն:

Թանգարանում կազմակերպվում են բնապահպանական թեմաներով հետաքրքրաշարժ և ուսանելի ժամանակավոր ցուցահանդեսներ, միջոցառումներ, մրցույթ-վիկտորինաներ, շնորհանդեսներ, ժամանցային ծրագրեր և խաղեր:

Թանգարանի գիտաշխատողների կողմից անցկացվող էքսկուրսիաների շնորհիվ այցելուները ոչ միայն տեսնում, հիանում և բացահայտում են բնության գաղտնիքները, այլև դառնում բնության իրական պաշտպաններ:

Հարգելի հայրենակիցներ` այցելելով Հայաստանի բնության պետական թանգարան, հուսով ենք, որ այդուհետ Ձեզանից յուրաքանչյուրը հետամուտ կլինի  խնամքով և սրտացավությամբ վերաբերվել մեր բնությանը, պահպանել այն:

Մաքուր պահենք շրջակա միջավայրը և մեր քաղաքամայր Երևանը:

Հայաստանի բնության պետական թանգարան
Մեր հասցեն՝ ՀՀ, Երևան, Տիգրան Մեծի  34,
Հեռախոսահամարները՝ 011542516,  011527942
Կայքը՝ www.smn.am