Անվնաս սնունդ՝ առանց հավելումների

Նոյեմբերի 2, 2017

Դպրոցական անցուդարձ

Սեպտեմբերյան աշխատանքային մի օր Երևանի Մ.Գալշոյանի անվան հ.148 ավագ դպրոց փոխտնօրեն Ա. Գևորգյանը ուսումնադաստիարակչական աշխատանքները համակարգելիս առաջարկեց կազմակերպել գիտական կոնֆերանս «Կենսաբանություն» և «Քիմիա» առարկաներից։ 
Առաջարկությունը ողջունվեց, իսկ ուսուցչուհիներ՝ Ն. Կոստանյանը (քիմիայի ուսուցչուհի) և Գ. Հակոբյանը (կենսաբանության ուսուցչուհի) սկսեցին նախապատրաստական աշխատանքները։
Ա. Գևորգյանի առաջարկած թեման՝ «Գենոմոդիֆիկացված օրգանիզմներ (ԳՄՕ), դրանց նպատակները, լավ և վատ կողմերը» հետաքրքրեց շատ դպրոցների, որի մասին տեղյակ պահեցին համացանցում մասնակցության հայտարարություն տալով, և չուշացան արձագանքները։
Թվով չորս դպրոցներից ուղարկված խմբեր իրենց շնորհանդես-տեսանյութերով մասնակցեցին կոնֆերանսին (հ. 94 դպրոց, հ. 128 դպրոց, հ. 151 դպրոց, Հերացու անվան ավագ դպրոց)։
Այս մտահաղացման նպատակն էր հանրությանը ծանոթացնել ԳՄՕ-ի հետ, տեղեկացնել, թե ինչպես կարելի է ճանաչել ԳՄՕ պարունակող սննդամթերքը, հասկանալ դրանց վնասակար ազդեցությունը օրգանիզմի վրա։
Թիվ 148 ավագ դպրոցի աշակերտները տեսանյութով ներկայացրին իրենց կատարած հարցումը բնակչության շրջանում, որից հանդիսատեսը եզրակացրեց, որ մարդկանց 62,5%-ը տեղյակ չէ, թե ի՞նչ է ԳՄՕ-ն։
Կոնֆերանսի հյուրերն էին Սպառողների միության նախագահ Արմեն Պողոսյանը, մասնակից դպրոցների ուսուցիչներ՝ Ա. Ղուկասյանը (հ. 128 դպրոց), Շ. Ղազարյանը (հ. 94 դպրոց), Հ. Հովսեփյանը (հ. 151 դպրոց), Հ. Ղազարյանը (Հերացու անվան ավագ դպրոց)։ Պարոն Պողոսյանը ողջունեց նախաձեռնությունը՝ մաղթելով, որ այն շարունակական լինի, իսկ ուսուցիչները արտահայտեցին իրենց գոհունակությունը։
Դպրոցի տնօրեն Հ. Դավթյանը շնորհակալություն հայտնեց մասնակից դպրոցների տնօրեններին, ուսուցիչներին և աշակերտներին կոնֆերանսում ակտիվ և բովանդակալից նյութերով մասնակցելու համար և նրանց հանձնեց շնորհակալագրեր։
Միջոցառումը ուսանելի էր, խիստ արդիական և ծառայեց իր նպատակին։