Վիկտորինա` նվիրված Տիգրան Չուխաճյան 180-ամյակին

Հոկտեմբերի 27, 2017

Դպրոցական անցուդարձ

Հոկտեմբերի 18-ին Վանաձորի Սուրբ Գ. Նարեկացի եկեղեցու դահլիճում տեղի ունեցավ վիկտորինա նվիրված «Մեր մեծերը» շարքից` Տ. Չուխաճյանի 180-ամյակին:

Վիկտորինան կազմակերպել էր Վանաձորի ծովակալ Իսակովի անվան թիվ 23 հիմնական դպրոցի երաժշտության ուսուցչուհի Գայանե Ղազարյանը: Վիկտորինային հրավիրված էին դպրոցի ուսուցիչները, ծնողները, ինչպես նաև Սուրբ Գ. Նարեկացի եկեղեցու հոգևոր հովիվ տեր Վահան քահանա Ազարյանը: Միջոցառմանը մասնակցում էին 5-8-րդ դասարանների աշակերտները:

Վիկտորինան անցկացվեց «Պարադիզ» (VIIIադաս.) և «Վիրտուոզ» (VIIIբ դաս.)թիմերի միջև:

Միջոցառումն ուներ տեղեկատվական և ուսուցողական նպատակ.

-սովորողներին ծանոթացնել Չուխաճյան կոմպոզիտորի, դիրիժորի, մանկավարժի, երաժշտահասարակական գործչի, հայկական օպերային արվեստի հիմնադրի, եվրոպական երաժշտական ստանդարտներով առաջին հայ ստեղծագործողի կյանքին և ստեղծագործական գործունեությանը,

- իրազեկել հայ ազգային երաժշտության տիտաններից մեկի` Տ. Չուխաճյանի երաժշտական ժառանգությանը, որպես արևմտահայ երաժշտական ստեղծագործության գագաթ, ով ստեղծագործեց արևմտահայ դասական ստանդարտներով,

- սովորողների մեջ ձևավորել ազգային և համաշխարհային գեղարվեստական արժեքները ճանաչելու և արժեվորելու կարողություններ և հմտություններ:

Դահլիճը մեծ հետաքրքրությամբ դիտեց Տ. Չուխաճյանի կենսագրական համառոտ ֆիլմը, որը համեմված էր թե' օպերաներից հատվածներով և թե' նկարներով: Վիկտորինայի հարցերը ընտրում էին սովորողները, որոնք ցուցադրվում էին մեծ էկրանին: Միջոցառումն անցավ ջերմ և մի քիչ էլ թեժ մթնոլորտում, քանի որ ուսուցչուհին դահլիճի համար էլ էր նախապատրաստել հարցեր: Վիկտորինայի երաժշտական հարցերի ներքո հնչեցին Չուխաճյանի գրչին պատկանող օպերաներից ու օպերետներից` «Արշակ II», «Ինդիանա», «Զեմիրե», «Լեբլեբիջի» և այլն:

Վիկտորինայում հաղթեց «Պարադիզ» թիմը, որը պարգևատրվեց պատվոգրով: Իսկ որպես ակտիվ մասնակից «Վիրտուոզ» թիմից պատվոգրով պարգևատրվեց Շահանե Խաչատրյանը:

Վիկտորիայի վերջում ելույթ ունեցան մեր շնորհալի սաներից նրանք, ովքեր սովորում էին Վանաձորի Տ. Չուխաճյանի անվան արվեստի կրթադաստիարակչական ուսումնական հաստատությունում: Այն ավարտվեց «Մենք քաջ տոհմի զավակներն ենք» միասնական երգով: