COP17-ի «Կանաչ գոտում» ներկայացվել են երիտասարդության ոլորտի ծրագրերը

Հոկտեմբերի 23, 2026

Լուրեր կազմակերպություններից

COP17-ի «Կանաչ գոտում» գործող ԿԳՄՍ նախարարության տաղավարն այսօր երիտասարդական էր:

ԿԳՄՍ նախարարի տեղակալ Քրիստինա Թաթարյանն այցելել էր Կարեն Դեմիրճյանի անվան մարզահամերգային համալիր՝ ծանոթանալու տաղավարային միջոցառումներին:

Տաղավարում, մասնավորապես, ներկայացվել է Գյումրու երիտասարդական կենտրոնի «Թղթի երկրորդ կյանքը» նախաձեռնությունը, որի առանցքում Հայաստանի էնդեմիկ բույսերն ու կենդանիներն էին: Տաղավարի այցելուները հնարավորություն ունեն նաև ծանոթանալու ԿԳՄՍՆ «100 գաղափար Հայաստանի համար» մրցույթի հաղթող նախագծերից երկուսին՝ «Մեղրամոմե բուժիչ վիրակապեր» և «Գազատար խողովակի գազի արտահոսք հայտնաբերող ռոբոտ» նախագծերին:

Նախարարի տեղակալ Քրիստինե Թաթարյանը երիտասարդ հեղինակներից հետաքրքրվել է ծրագրերի իրականացման ընթացքով, դրանց շարունակականության ապահովման հնարավորություններով՝ ընդգծելով, որ նախագծերը կարևոր դեր կարող են ունենալ նաև հանրային կյանքում:  

Նախարարի տեղակալը հետևել է նաև «Արարատ» երիտասարդական կենտրոնի «I promise…» նախագծին, ծանոթացել «Մատնահետք թիմ» սոցիալական ձեռներեցության ծրագրին, որի շրջանակում  երիտասարդները թղթի և կտորի թափոններից տարբեր իրեր են պատրաստում, ինչպես նաև Մարիամ Մկրտչյանի՝ թափոններից մագնիսների պատրաստման սոցիալական ձեռներեցության ծրագրին:

Տաղավարում իրենց ծրագրերն են ներկայացրել նաև Արթիկի և Արմավիրի երիտասարդական կենտրոնները:  

Օրվա շրջանակում ԿԳՄՍ նախարարի տեղակալ Քրիստինա Թաթարյանը ՀՀ-ում Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Ալեքսանդրա Քոուլի հետ հետևել է նաև «Հզորացնելով հաջորդ սերնդին. երիտասարդական առաջնորդություն՝ սահմաններից դուրս» պանելային քննարկմանը, որին մասնակցում էին տարբեր բուհերի ուսանողներ, հետազոտողներ:

Նշենք, որ ԿԳՄՍ նախարարության տաղավարում երիտասարդության թեման կներկայացվի նաև հոկտեմբերի 28-ին: Ծրագիրն ամբողջությամբ՝ https://escs.gov.am/articles/news/478: 

Նյութի աղբյուրը. ՀՀ կրթության, գիտության, մշակույթի և սպորտի նախարարություն