Նոր ծրագրերը բարձրացրել են ՄԿՈՒ ոլորտի գրավչությունը

Հոկտեմբերի 11, 2017

Պաշտոնական

Արմենպրես մամուլի ակումբում հյուրընկալվել էր ՀՀ ԿԳՆ նախնական (արհեստագործական) և միջին մասնագիտական կրթութան վարչության պետ Արտակ Աղբալյանը, ով լրագրողներին է ներկայացրել ՄԿՈՒ ոլորտում իրականացվող բարեփոխումները: Նրա խոսքով` վերջին 1,5 տարվա ընթացքում ՄԿՈՒ ոլորտում մեկնարկել են նոր ծրագրեր, որոնք հիմնականում իրականացվում են դոնոր կազմակերպությունների կողմից: Արտակ Աղբալյանը տեղեկացրել է, որ վերոնշյալ կազմակերպությունների թիվն այս ընթացքում 1-2-ից հասել է արդեն 10-ի: «Ամենակարևոր ծրագրերից մեկը դուալ կրթական համակարգի ներդրումն է, որն իրականացվում է Գերմանիայի տնտեսական համագործակցության և զարգացման նախարարության աջակցությամբ /GIZ/: «Մասնավոր հատվածի զարգացում և մասնագիտական կրթության ուսուցումը Հարավային Կովկասում» ծրագրի շրջանակում այս տարվանից ՀՀ չորս ՄԿՈՒ հաստատություններում ներդրվել է դուալ համակարգի փորձարարական ծրագիր /Վայոց Ձորի տարածաշրջանային քոլեջ` գինեգործություն, Տավուշի տարածաշրջանային  քոլեջ` տուրիզմ և ավտոտեխսպասարկում, Շիրակի տարածաշրջանային քոլեջ` տեղեկատվական տեխնոլոգիաներ և Երևանի հումանիտար քոլեջ` տուրիզմ/: Դուալ համակարգն աշխատանքի ուսուցման վրա հիմնված համակարգ է, այսինքն` ուսումնական գործընթացին զուգահեռ, իրականացվում է աշխատանքի վրա հիմնված ուսուցում: Սա ենթադրում է, որ 5-օրյա ուսուցման ցիկլում 2-3 օր ուսանողը կանցկացնի քոլեջում կամ ուսումնարանում, իսկ մնացած 2 օրը` գործատուի մոտ` պրակտիկ գիտելիքներ ստանալով: 3 տարվա փորձնական ծրագիր է, և ամեն տարի նախատեսում ենք 1-2 մասնագիտություն էլ ավելացնել»,- նշել է Արտակ Աղբալյանը` ընդգծելով, որ դուալ համակարգում ներառված բոլոր չորս քոլեջները գործատուների շրջանում ունեն իրենց գործընկերները. Գյումրիում՚ Գյումրու տեխնոպարկը, Եղեգնաձորում` հայտնի գինեգործական ընկերությունները, Երևանում` «Կոնգրես», «Փարիզ» հյուրանոցները, իսկ Իջևանում` «Ապագա ռեզորթը»: Երկրորդ ծրագիրը, որին անդրադարձել է Արտակ Աղբալյանը, ԵՄ-ի բյուջետային աջակցությամբ իրականացվող ծրագիրն է, որն ուղղված է գյուղատնտեսության զարգացմանը` աշխատանքի վրա հիմնված ուսուցման ձևով: «Քանի որ կառավարության համար  գերակա է գյուղատնտեսության ոլորտի զարգացումը, ուստի, առանց որակյալ կադրերի` ոլորտի զարգացման մասին խոսելն ավելորդ է: Հետևանար, ծրագիրն ուղղված է գյուղատնտեսական մասնագիտությունների գծով որակյալ կադրեր պատրաստելուն: Ծրագրով նախատեսվում են գյուղատնտեսական ՄԿՈՒ հաստատությունների վերանորոգման աշխատանքներ, ժամանակակից սարքավորումների տրամադրում, վերապատրաստումներ, բոլոր գյուղատնտեսական մասնագիտությունների գծով մասնագիտական կրթական չափորոշիչների պատրաստում, կարիերայի կենտրոնների ստեղծում` ընդհուպ մինչև ամենավերջին կետը` կոնկրետ մասնագիտությունների գծով աշխատանքի տեղավորման խնդիրը լուծելը»,-նշել է Արտակ Աղբալյանը` տեղեկացնելով, որ բյուջետային աջակցության ծրագիրը, որը մեկնարկել է հունվարի 1-ից,  կավարտվի 2020 թվականին: Երրորդ ծրագիրը, որին անդրադարձել է բանախոսը, իրականացվում է «Save the children» ՀԿ-ի հետ` ԵՄ աջակցությամբ: Արտակ Աղբալյանի խոսքով` ծրագրով հնարավորություն է ստեղծվում հաշմանդամություն ունեցող անձանց որոշակի մասնագիտություն ձեռք բերել: «Նախորդ տարի արդեն իսկ մի քանի կազմակերպություններ իրականացրել են կարճաժամկետ վերապատրաստումներ հաշմանդամություն ունեցող շրջանավարտների համար: Սա դրամաշնորհային ծրագիր է, որին հայտ ներկայացրած շուրջ 40 հաստատությունից շահել են 4-ը: Ծրագրի շրջանակում քոլեջներում ու ուսումնարաններում կհիմնվեն սոցիալական ձեռնարկություններ, որոնցում հնարավորություն կտրվի հաշմանդամություն ունեցող շրջանավարտներին աշխատել: Առաջին սոցիալական ձեռնարկությունը կբացվի Արմավիրի արվեստի քոլեջում` «Տպագրական գործ» մասնագիտությամբ, Սիսիանում` մեղվաբուծության և Իջևանում` ավտոսպասարկման գծով»,- նշել է Արտակ Աղբալյանը:

Բանախոսն անդրադարձել է Ավստրիայի կառավարության հետ օրգանական գյուղատնտեսության ոլորտում իրականացվող, «Ռազմավարական զարգացման գործակալություն» ՀԿ-ի հետ «ՄԿՈւ զարգացում Սյունիքի մարզում», ինչպես նաև բարերար Անուշավան Աբրահամյանի աջակցությամբ իրականացվող ծրագրերին: «Բարերարի աջակցությամբ 9 հաստատությունների տրամադրվել են Արմաթ լաբորատորիաներ, որոնց շնորհիվ կիրականացվի նաև ոչ ֆորմալ կրթություն:  Բացի այդ, ԿԳՆ-ՊՆ-Անուշավան Աբրահամյան համագործակցության շրջանակում նախատեսվում է հաշմանդամություն ունեցող զինվորների համար կազմակերպել անվճար կարճաժամկետ դասընթացներ: Վերջին ծրագիրը, որին ցանկանում եմ անդրադառնալ, Աշխատանքի միջազգային գործակալության հետ իրականացվող ծրագիրն է, որն ուղղված է որակավորումների  համապատասխանեցմանը»,-նշել է բանախոսը:

Ասուլիսի ընթացքում Արտակ Աղբալյանը պատասխանել է նաև լրագրողների հարցերին, որոնցից մեկը վերաբերել է ՄԿՈՒ ընդունելությանը: «ՄԿՈՒ ոլորտում այս տարի ընդունելության ցուցանիշները բավականին հաջող են եղել.  7374 ուսանող ընդունվել է միջին մասնագիտական հաստատություններ, իսկ 3777 ուսանող` արհեստագործական: 2016 թվականի համեմամատ` 2000-ով ավելացել է ուսանողների թիվը: Եթե նախորդ տարի անգամ թափուր տեղեր էին մնում, այս տարի եղել են ուսանողներ, ովքեր դուրս են մնացել: Ուսանողների թվի ավելացումը պայմանավորված է դիմորդների և ծնողների շրջանում ՄԿՈՒ ոլորտի գրավչության բարձրացմամբ»,- նշել է Արտակ Աղբալյանը` ընդգծելով, որ ԿԳ նախարարությունը լուրջ քայլեր է անում աշխատաշուկա-ուսումնական հաստատություն կապեր ստեղծելու և եղած կապերն ամրապնդելու ուղղությամբ: «Որոշակի մասնագիտությունների գծով մեծ հաջողություններ ունենք, մասնավորապես, սպասարկման ոլորտում, որտեղ աշխատանքի տեղավորման ցուցանիշը հասնում է 90-95 տոկոսի, իսկ, առհասարակ, միջին աշխատանքի տեղավորման ցուցանիշը 45-65 տոկոս է` նայած մասնագիտության գծով: Ցավոք, դեռևս կան «շաբլոն» մասնագիտություններ, որոնք գրավիչ են ուսանողի և ծնողի համար, բայց ավարտելով այդ մասնագիտությամբ` ուսանողն աշխատաշուկայում իր տեղը չի կարողանում գտնել: Մենք գնում ենք նաև այդ ճանապարհով` մասնագիտությունները համապատասխանեցնել աշխատաշուկայի պահանջներին, մանավանդ մարզերում` տվյալ մարզի զարգացման առանձնահատկություններից ելնելով»,-նշել է Արտակ Աղբալյանը:

Ասուլիսին ավարտին բանախոսը տեղեկացրել է, որ ներկայումս ՀՀ կառավարության հաստատմանն է ներկայացվել ՄԿՈՒ բարեփոխումների ռազմավարական նախագիծը, որում նախանշվել են ոլորտի զարգացման հիմնական ուղղությունները և անելիքները:

Նյութի աղբյուրը. ՀՀ կրթության և գիտության նախարարություն