Ժաննա Անդրեասյանը մասնակցել է «Ղարաբաղից տեղահանված հայերի սոցիալ-տնտեսական ներառման գործընթացը» թեմայով պանելային քննարկմանը

Մարտի 19, 2026

Լուրեր կազմակերպություններից

Այսօր կայացել է «Ներառական զարգացում. ձեռքբերումներ և անելիքներ» խորագրով համաժողովը, որին մասնակցել են ՀՀ վարչապետ Նիկոլ Փաշինյանը, ԿԳՄՍ նախարար Ժաննա Անդրեասյանը, Կառավարության այլ անդամներ։

Համաժողովը նվիրված էր Ղարաբաղից տեղահանված մեր հայրենակիցների հիմնախնդիրներին և դրանց լուծման քայլերին։ Միջոցառման շրջանակում անցկացվել է պանելային քննարկում՝ «Ղարաբաղից տեղահանված հայերի սոցիալ-տնտեսական ներառման գործընթացը» թեմայով, որին մասնակցել է նաև ԿԳՄՍ նախարար Ժաննա Անդրեասյանը։

Նախարարն իր ելույթում կարևորել է նման ձևաչափով քննարկումների անցկացումը՝ ընդգծելով, որ դրանք հնարավորություն են տալիս տեսնել ընդհանուր պատկերը, բարելավել իրականացվող աշխատանքը և ամրապնդել համագործակցությունը։ Նրա խոսքով՝ արդեն իսկ արձանագրված արդյունքները հենց համագործակցության արդյունք են։

Ժաննա Անդրեասյանի դիտարկմամբ՝ հենց առաջին օրերից կրթական համակարգը կարողացել է ապահովել տեղահանված երեխաների կրթության շարունակականությունը՝ միաժամանակ ստեղծելով կարևոր հոգեբանական և սոցիալական միջավայր։

«Երեխաները տեղահանումից անմիջապես հետո արդեն դպրոցներում էին, և կրթական միջավայրը ոչ միայն ապահովեց կրթության իրավունքի շարունակությունը, այլև դարձավ անվտանգության և հոգեբանական աջակցության կարևոր հարթակ»,- ասել է նա։

Նախարարը նշել է, որ ներկայում Հայաստանի դպրոցներում սովորում է շուրջ 20 200 տեղահանված երեխա, որոնք հաջողությամբ ինտեգրվել են կրթական համակարգում։ Ժաննա Անդրեասյանը նաև ընդգծել է, որ նրանց հաջողություններն արդեն տեսանելի են, այդ թվում՝ տարբեր մրցույթներում և օլիմպիադաներում։
Բարձրագույն և մասնագիտական կրթության ոլորտում, նախարարի խոսքով, Կառավարությունը դարձյալ արձագանքել է օպերատիվ կերպով։ Նա հիշեցրել է, որ արդեն հոկտեմբերին ընդունվել են Կառավարության որոշումներ, որոնք կարգավորել են ուսանողների կրթության շարունակականության հարցերը։

«Ներդրվել է կրթաթոշակի համակարգ, որով ամբողջությամբ փոխհատուցվում է ուսման վարձը, ինչպես նաև պարզեցվել են փաստաթղթային գործընթացները, որպեսզի որևէ ուսանող դուրս չմնա կրթությունից», — նշել է Ժաննա Անդրեասյանը։

Այս պահին, նրա տվյալներով, Հայաստանի բուհերում և քոլեջներում սովորում է ավելի քան 3200 տեղահանված ուսանող։ Ընդգծվել է, որ աջակցությունը շարունակվել է նաև հաջորդ տարիներին՝ ընդգրկելով նոր ընդունված առաջին կուրսեցիներին։ Միաժամանակ, նախարարն անդրադարձել է առաջադիմության չափանիշներին՝ նշելով, որ կրթաթոշակի տրամադրումը հետագայում պայմանավորվում է ուսանողների առաջադիմությամբ։

«Մեզ համար կարևոր է ոչ միայն ուսանողի ներգրավվածությունը, այլև նրա սովորելու արդյունքը, քանի որ դիպլոմը միայն փաստաթուղթ չէ, այլև գիտելիքների և հմտությունների ամբողջություն, որը պետք է ապահովի մրցունակություն և զբաղվածություն»,- ընդգծել է նա։

Ժաննա Անդրեասյանը նաև տեղեկացրել է՝ լուծումներ են մշակվել այն քաղաքացիների համար, որոնք կորցրել են իրենց կրթական մակարդակը հավաստող փաստաթղթերը։ Արդյունքում՝ ավելի քան հազար մարդ արդեն ստացել է դիպլոմների և այլ փաստաթղթերի կրկնօրինակներ, ինչը նպաստել է նրանց զբաղվածությանը:
Ժաննա Անդրեասյանը կարևորել է նաև ուսուցչական ներուժի պահպանումը։ Նշվել է, որ 2023 թվականի հոկտեմբերից ներդրվել է արտամրցութային կարգ, որի շնորհիվ տեղահանված ուսուցիչները կարողացել են աշխատանքի անցնել դպրոցներում։ Այսօր արդեն ավելի քան 600 ուսուցիչ աշխատում է Հայաստանի դպրոցներում, և նրանց տրամադրվում է նաև լրացուցիչ ֆինանսական աջակցություն՝ ներառյալ հավելավճարներ։

Բացի այդ՝ դպրոցներում իրականացվել են հոգեբանական և սոցիալական աջակցության ծրագրեր, վերապատրաստումներ ուսուցիչների և հոգեբանների համար, ինչպես նաև փոխհատուցվել են դասագրքերի վարձավճարները 5–12-րդ դասարաններում սովորողների համար։

Ելույթի ավարտին նախարարը նշել է, որ թեև առկա են խնդիրներ, այնուամենայնիվ, ձևավորված համակարգը և կուտակված փորձը բավարար հիմք են դրանց լուծման համար։

«Մենք ունենք խնդիրներ, բայց ունենք նաև բավարար ռեսուրսներ դրանք լուծելու և առաջ շարժվելու համար՝ արդեն խոսելով ավելի շատ դրական զարգացումների մասին»,- եզրափակել է նախարարը՝ այնուհետև պատասխանելով մեր հայրենակիցների հարցերին։

Նյութի աղբյուրը. ՀՀ կրթության, գիտության, մշակույթի և սպորտի նախարարություն