«Նախադպրոցական կրթությունից դուրս մնալն էապես ազդում է երեխաների հետագա կրթական արդյունքի վրա»․ Ժաննա Անդրեասյան

Մարտի 17, 2026

Լուրեր կազմակերպություններից

ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նիստում քննարկվել է «Նախադպրոցական կրթության մասին» օրենքում և հարակից օրենքներում լրացումներ և փոփոխություններ կատարելու մասին նախագիծը։

Հարցը զեկուցել է ԿԳՄՍ նախարար Ժաննա Անդրեասյանը՝ նշելով, որ երկու հիմնական ուղղությամբ փոփոխություններ են առաջարկվում։ Առաջին ուղղությունը վերաբերում է հավաստագրման գործընթացի միասնականացմանը կամ ստանդարտացմանը։ Ինչպես հայտնի է, թե՛ նախադպրոցական, թե՛ հանրակրթության, և թե՛ մասնագիտական կրթության և ուսուցման համակարգերում հաստատությունների ղեկավարման համար պահանջվում է հավաստագիր։ «Կրթության մասին» օրենքում արդեն իրականացվել են համապատասխան փոփոխություններ, որոնցով միասնական ձևով սահմանվում են հավաստագրման պահանջները, ինչպես նաև հավաստագրի դադարեցման դեպքերն ու ընդհանուր մոտեցումները։

Ներկայացված փոփոխությունների փաթեթը նպատակ ունի ամբողջացնելու այս միասնական մոտեցումը։ Մինչ այս՝ յուրաքանչյուր ոլորտային օրենքում առանձին էին ամրագրված տվյալ ոլորտին վերաբերող հավաստագրման պահանջները։ Հաշվի առնելով, որ «Կրթության մասին» օրենքում արդեն ամրագրվել է միասնական մոտեցում, առաջարկվում է ոլորտների օրենքներում ևս վերանայել հավաստագրման պահանջները։

«Այս փոփոխությունը հնարավորություն կտա վարել միասնական քաղաքականություն՝ հաշվի առնելով, որ հաստատությունների կառավարումը պահանջում է ոչ միայն տվյալ կրթական մակարդակին բնորոշ հատուկ հմտություններ, այլև ընդհանուր կառավարման կարողություններ։ Առաջարկվող մոդելով հնարավոր կլինի ներդնել այնպիսի համակարգ, որի արդյունքում հավակնորդը կկարողանա մեկ քննությամբ ստանալ մի քանի կրթական մակարդակի ղեկավարման հավաստագիր։ Սա կընդլայնի հավաստագիր ունեցողների շրջանակը և կարող է բարձրացնել մրցակցությունը հաստատությունների տնօրենների ընտրության գործընթացում, ինչը կարևոր քայլ է կառավարման որակի բարելավման առումով»,- նշել է Ժաննա Անդրեասյանը։

Երկրորդ ուղղությունը վերաբերում է բացառապես «Նախադպրոցական կրթության մասին» օրենքին։ Մասնավորապես՝ Կառավարության քաղաքականության կարևոր բաղադրիչ է 500 մանկապարտեզների ծրագրի իրականացումը, որը ներառում է նաև նախակրթարանների ստեղծում հիմնականում դպրոցներում և կրթահամալիրներում։ Դրանք ուղղված են հինգ տարեկանից բարձր երեխաների ծառայությունների տրամադրմանը։

Նախարարը նշել է, որ միջազգային հետազոտությունները, այդ թվում՝ Հայաստանում իրականացված ուսումնասիրությունները, ցույց են տալիս, որ նախադպրոցական կրթությունից դուրս մնալն էապես ազդում է երեխաների հետագա կրթական արդյունքների վրա։ Այդ պատճառով Կառավարության ծրագրի կարևոր թիրախներից են նախադպրոցական կրթության հասանելիության բարձրացումը և ծածկույթի ընդլայնումը։

Ժաննա Անդրեասյանը տեղեկացրել է՝ այս համատեքստում առաջարկվում է վերանայել տարիքային շեմը և նախակրթարաններ նախատեսել ոչ միայն 5, այլև 4-6 տարեկանների համար։ Սա հատկապես կարևոր է այն բնակավայրերում, որտեղ նախակրթարանը միակ նախադպրոցական հաստատությունն է։ Այդ դեպքում երեխաները հնարավորություն կունենան ավելի վաղ ընդգրկվելու կրթական գործընթացում։

«Մասնավորապես, եթե բնակավայրում առկա է միայն դպրոց, որի շրջանակում նաև նախակրթարանն է գործում, ապա հնարավոր կլինի երեխաների ընդգրկումն ապահովել ավելի վաղ տարիքից։ Մյուս կողմից՝ քաղաքային բնակավայրերում ևս հաճախ մանկապարտեզները ծանրաբեռնված են, և ոչ բոլոր երեխաներն են կարողանում ընդգրկվել համակարգում։ Առաջարկվող փոփոխությամբ նման երեխաները հնարավորություն կունենան ավելի վաղ ընդգրկվել նախադպրոցական կրթության մեջ, պատրաստվել դպրոցին և սոցիալականացվել»,- նշել է ԿԳՄՍ նախարարը։

Այսպիսով, առաջարկվում է սահմանել երկու տարբեր տարիքային շեմ։ Ընդհանուր կանոնով նախակրթարանները նախատեսվում են 4-6 տարեկանների համար, իսկ այն բնակավայրերում, որտեղ նախակրթարանը միակ նախադպրոցական ծառայությունն է, հնարավոր կլինի կազմակերպել կրթություն 3-6 տարեկան երեխաների համար։

Հարցի վերաբերյալ ծավալվել է քննարկում։ Հանձնաժողովը դրական եզրակացություն է տվել օրենքի նախագծին՝ առաջարկելով այն ներառել լիագումար նիստերի օրակարգում։

Նյութի աղբյուրը. ՀՀ կրթության, գիտության, մշակույթի և սպորտի նախարարություն