Միջազգային հեղինակավոր բուհերն ավարտողների ներուժը՝ ի նպաստ պետության զարգացման

Մարտի 4, 2026

Լուրեր կազմակերպություններից

ԱԺ հերթական նիստում երկրորդ ընթերցմամբ քննարկվել է «Զինվորական ծառայության և զինծառայողի կարգավիճակի մասին» օրենքի փոփոխության նախագիծը։ Հարցը զեկուցել է ԿԳՄՍ նախարար Ժաննա Անդրեասյանը՝ տեղեկացնելով, որ առաջինից երկրորդ ընթերցման ընթացքում ստացված առաջարկները հիմնականում խմբագրական բնույթի են։

Նախարարի խոսքով՝ դրանք վերաբերել են առաջարկվող կարգավորումների հստակեցմանը և ձևակերպումների՝ առավել միանշանակ մեկնաբանությանը։ Հաջորդաբար, ենթաօրենսդրական ակտի մշակման փուլում ևս ընթացակարգերը կհստակեցվեն, և այս ուղղությամբ աշխատանքները կշարունակվեն Ազգային ժողովի հետ համագործակցությամբ։

Ժաննա Անդրեասյանն ընդգծել է, որ նախագծի նպատակը մարդկային կապիտալի զարգացման ուղղությամբ Կառավարության քաղաքականության շարունակականության ապահովումն է։ Առաջարկվող փոփոխությամբ նախատեսվում է Շանհայի վարկանիշավորման սանդղակի առաջին 50 տեղերում ընդգրկված համալսարաններում ներկայում սովորող և ապագայում ուսումնառություն իրականացնող ուսանողներին հնարավորություն տալ ուսումնառությունն ավարտելուց, համապատասխան կրթական աստիճան ստանալուց հետո վերադառնալ Հայաստան, առնվազն երեք տարի աշխատել Կառավարության սահմանած կարգով և համապատասխան ոլորտներում, այնուհետև ստանալ զինվորական ծառայությունից ազատման հնարավորություն։

«Նախագծի նպատակը ձևավորված որակյալ մարդկային ներուժի նպատակային օգտագործումն է՝ ի նպաստ մեր երկրի զարգացման օրակարգի։ Այդ համալսարաններում ուսումնառությունը տալիս է գիտելիքի և հմտությունների պաշար, որը վստահաբար կարող է ծառայել տարբեր ոլորտներում պետության զարգացմանը՝ նպաստելով իրական արդյունքի ձևավորմանը և հանրային ու տնտեսական կյանքի առաջընթացի։ Վստահ եմ՝ այս նախաձեռնությանը սպասում են հազարավոր քաղաքացիներ։ Այդ պատճառով էլ ենթաօրենսդրական ակտի մշակման համար սահմանվել է առավելագույնս կարճ ժամկետ», - նշել է նախարարը։

Նրա խոսքով՝ օրենքի ընդունումից հետո երկամսյա ժամկետը բավարար կլինի Կառավարության համապատասխան որոշումն ընդունելու համար, որպեսզի օրենքն ուժի մեջ մտնի և կիրառվի ուսումնառությունը շարունակող և ավարտական կուրսերում սովորող ուսանողների նկատմամբ։

«Հաշվի առնելով քննարկման շրջանակը և ենթաօրենսդրական ակտի շուրջ արդեն կատարված աշխատանքը՝ կարծում եմ՝ հասել ենք այն փուլին, երբ կարող ենք լիարժեք հաստատել այս մեխանիզմը՝ ձևավորելով ևս մեկ ինստիտուցիոնալ խողովակ մեր երկրի մարդկային կապիտալի զարգացման համար», - եզրափակել է Ժաննա Անդրեասյանը։

Նա նաև տեղեկացրել է՝ այս պահին Շանհայի վարկանիշավորման սանդղակի առաջին 50 տեղերում ընդգրկված բուհերում շուրջ 570 ՀՀ քաղաքացի է ուսանում, և այս որոշումը նրանց ևս կառնչվի։ «Կարգը գործում է 2018 թվականից, իսկ այս պահին արդեն ավելի քան 50 քաղաքացիներ ավարտել են իրենց ուսումնառությունը։ Վերադարձի ցուցանիշները բավարար չեն, և կարելի է ասել, որ ձևավորված մարդկային կապիտալը չի ծառայում իր նպատակին»:

Նյութի աղբյուրը. ՀՀ կրթության, գիտության, մշակույթի և սպորտի նախարարություն