Անկախությունը սկսվում է ազատությունից

Հոկտեմբերի 4, 2016

Դպրոցական անցուդարձ

Անկախության օրը նշեցին նաև Մեծ Մասրիկի միջնակարգ դպրոցում:
Բացման խոսքով հանդես եկան կազմակերպիչներ Ռ. Բարսեղյանը և Մ. Խլոյանը: Նրանք տեսանյութին զուգահեռ՝ հակիրճ ներկայացրեցին մեր պատմության էջերը՝ սկսած 1915թ. եղեռնից մինչև մեր օրերը: Նրանք վստահեցրեցին, որ 25 տարվա հեռավորությունից մենք կարող ենք հպարտանալ մեր մեծ նվաճումներով, մեր փայլուն հաղթանակներով, հայոց խրոխտ բանակով, մեր հզոր հայրենիքով: Որից հետո բեմը տրամադրեցին միջոցառման մասնակիցներին:Մեծ Մասրիկի միջնակարգ դպրոցի սաները քայլերթով բեմ բարձրացան և ներկայացրեցին 25 տարիների ընթացքում տեղի ունեցած կորուստներն ու ձեռքբերումները:Նրանք նշեցին, որ այսօր տոն է մեր երկրի համար, քանի որ ուղիղ 25 տարի առաջ մեր պատմության մեջ կատարվեց շրջադարձ, որի արդյունքում այսօր մենք աշխարհին ներկայանում ենք մեր սեփական պետականությամբ:Դպրոցի <<Մասրիկ>> համույթը իր պարերով էլ ավելի գեղեցկացրեց և շունչ հաղորդեց միջոցառմանը: Մեծ ոգևորություն էր տիրում դահլիճում. Աշակերտները ևս միացել էին նրանց պարերին ու երգերին:Այնուհետև հարց ուղղվեց դահլիճում ներկա գտնվողներին.
«Անկախության 25 տարին ի՞նչ տվեց մեր երկրին ու ժողովրդին»:
Դպրոցի տնօրինությունը, ուսուցիչները, աշակերտները իրենց կարծիքները հայտնեցին, որից հետո միջոցառումը դարձյալ շարունակվեց: Խոսեցին Արցախյան ազատամարտից, հայոց բանակից, հիշեցին նաև մերօրյա հերոսներին:
Ողջ միջոցառման ընթացքը ուղեկցվում էր տեսանյութերով: Վերջում մասնակիցները կոչ արեցին, որ պետք է միասնական լինեն, որ կարողանան իրենց պապերի կորցրած հողերը ետ բերեն, կարողանան արժանին հատուցել ցեղասպաններին, կարողանան աշխարհին ստիպել ընդունելու հայերի ցեղասպանությունն ու դատապարտելու ոճրագործներին:
«Պիտի գնանք» երգը նրանց շուրթերից այնքան հուզիչ, բայց միաժամանակ այնքան խրոխտ էր հնչում, որ համոզված ենք, որ մեր հողերը, այո՛, հետ ենք վերցնելու:
Վերջում Իրինան «Դու պիտի ապրես» բանաստեղծությամբ հավատացրեց, որ Հայաստանը կա ու կլինի հավիտյան:
Միջոցառումը ավարտվեց ազգագրական պարով:

Թ.Մկրտչյան