Մեկնարկում է «Դպրոցական սնունդ» ծրագրի նոր փուլը. հանդիպում Տավուշի մարզում

Փետրվարի 25, 2026

Լուրեր կազմակերպություններից

ՀՀ կառավարությունը ՄԱԿ-ի Պարենի համաշխարհային ծրագրի և գործընկերների հետ համատեղ շարունակում է դպրոցական սննդի կայուն համակարգի զարգացումը:

Ծրագրի նոր փուլի մեկնարկին և «Վերափոխվող դպրոցական սնունդ՝ հիմնված տեղական արտադրանքի վրա» մոդելի ներդրմանն ընդառաջ՝ հանրապետության հինգ մարզում՝ Տավուշում, Վայոց ձորում, Գեղարքունիքում, Լոռիում և Սյունիքում, անցկացվում են խորհրդատվական հանդիպումներ։ Տավուշի մարզի Ներքին Ծաղկավանի դպրոցում տեղի ունեցած հերթական հանդիպմանը ներկա են եղել ԿԳՄՍ նախարարի տեղակալ Արաքսիա Սվաջյանը, Տավուշի փոխմարզպետ Նարեկ Ղուշչյանը, ՊՀԾ հայաստանյան գրասենյակի ներկայացուցիչներ։

Ծրագրի նոր փուլով նախատեսվում է հանրապետության մարզերի 159 դպրոցում հիմնել դպրոցամերձ ջերմատներ, ինտենսիվ պտղատու և հատապտղային այգիներ: Այս մոտեցումը ոչ միայն թույլ է տալիս դպրոցներին ինքնուրույն ապահովել թարմ, առողջարար սննդամթերք, այլև ծառայում է որպես գործնական կրթական հարթակ աշակերտների համար:

Ողջունելով ներկաներին՝ ԿԳՄՍ նախարարի տեղակալ Արաքսիա Սվաջյանը շեշտել է «Դպրոցական սնունդ» ծրագրի բացառիկությունն ու կրթական կարևորությունը. «Ծրագիրը վաղուց դուրս է եկել սովորողներին սնունդ տրամադրելու շրջանակից և դարձել կրթության և դաստիարակության բաղադրիչ, որի շնորհիվ երեխաները փոքր տարիքից գիտելիք են ստանում առողջ սննդի վերաբերյալ։ Միջազգային փորձն ու այլ երկրների օրինակներն ուսումնասիրելիս տեսնում ենք, որ ՀՀ դպրոցներում իրականացվող ծրագիրն իր տեսակի մեջ բացառիկ է և հետաքրքրություն է առաջացնում հենց իր փոխակերպող բաղադրիչով: Հատկապես հետաքրքիր է ծրագրի գյուղատնտեսական բաղադրիչը, որը հնարավորություն է ստեղծում դպրոցում ունենալ ագրոկրթության ուսումնական տարածք, որտեղ երեխաները ծանոթանում են գյուղատնտեսական ոլորտի նորարարական տեխնոլոգիաներին և նոր մեթոդներին, ինչը նպաստում է նրանց մասնագիտական կողմնորոշմանը։ Այդ տարածքները նաև հետազոտական և նախագծային աշխատանքների և ծրագրերի իրականացման միջավայր են դառնում, որը մեզ համար շատ կարևոր է՝ հատկապես Հանրակրթության նոր չափորոշչի ներդրման շրջանակում: Մեզ համար առանցքային նշանակություն ունի, որ ծրագիրը նաև նպաստի կրթության որակի բարձրացմանը»։

Նախարարի տեղակալը նաև կոչ է արել դպրոցներին ակտիվորեն համագործակցել մասնագետների հետ՝ ծրագրի իրականացման ընթացքում տրամադրված փորձագիտական խորհրդատվությունը դարձնելով դպրոցի առօրյայի անբաժանելի մաս։

«Դպրոցական սնունդ» ծրագիրը լիովին ազգայնացվել է և պետական բյուջեի ֆինանսավորմամբ ամենօրյա տաք սննդով է ապահովում ՀՀ բոլոր 10 մարզերի բոլոր դպրոցների տարրական դասարանների ավելի քան 100000 աշակերտի: Հաջողված փորձի հիման վրա ծրագիրը նախատեսվում է ընդլայնել՝ ընդգրկելով նաև դեպի մայրաքաղաք Երևանի դպրոցները՝ տարրական դասարանների աշակերտներին ապահովելով առողջ, տաք սննդով:

Ենթակառուցվածքների ստեղծումից հետո ծրագրի շարունակականությանն աջակցելու է «Դպրոցական սնունդ և երեխաների բարեկեցություն» (ԴՍԵԲ) հիմնարկը: Խոսելով նոր ենթակառուցվածքների և գործառույթների մասին՝ ԴՍԵԲ հիմնարկի տնօրեն Սաթենիկ Մկրտչյանը նշել է. «Մեր հիմնարկն իրականացնում է ամենօրյա մշտադիտարկում և օպերատիվ աջակցություն դպրոցներին: Այս նոր փուլում, երբ ընդլայնվում է ծրագրի փոխակերպող բաղադրիչը և համալրվում նորարարական գյուղատնտեսական ենթակառուցվածքներով, մեր գլխավոր խնդիրն է ապահովել դրանց անխափան, նպատակային շահագործումը, ինչպես նաեւ աջակցել, որ ենթակառուցվածքները վերածվեն կրթական հարթակի: Օրինակ՝ նորարար ագրոխմբակների միջոցով աշակերտները գործնականում սովորում են սննդի ստեղծման ողջ շղթան»։

Հանդիպման ընթացքում դպրոցների ներկայացուցիչները կիսվել են կրթական բաղադրիչի և վերաներդրման մոդելի կիրառման հաջողված փորձով, տեղի է ունեցել քննարկում և հարցուպատասխան, որին հաջորդել է համագործակցության հուշագրերի ստորագրումը ծրագրին նոր միացող դպրոցների հետ: Պաշտոնական արարողությունն ամփոփվել է դպրոցի տնօրենի առաջնորդությամբ ճանաչողական այցով դեպի ինտենսիվ և հատապտղային այգիներ, որտեղ ներկաները ծանոթացել են տեղական արտադրանքի վրա հիմնված դպրոցական սննդի նորարարական մոդելին:

Նյութի աղբյուրը. ՀՀ կրթության, գիտության, մշակույթի և սպորտի նախարարություն