Լեզվական բազմազանությունից մինչև արհեստական բանականություն․ ԵՊՀ-ում անցկացվում է COST-UniDive երկրորդ ձմեռային դպրոցը

Հունվարի 20, 2026

Լուրեր կազմակերպություններից

Երևանի պետական համալսարանում մեկնարկել է COST - UniDive երկրորդ ձմեռային դպրոցը, որը համախմբել է շուրջ 20 երկրի 60 մասնակցի՝ քննարկելու, թե ինչպես են լեզվական տեխնոլոգիաները թույլ տալիս նկարագրել և ներառել լեզվական բազմազանությունն արհեստական բանականության առօրյա գործիքներում։ Ծրագիրը կանցկացվի հունվարի 19-24-ը։

Ողջունելով ձմեռային դպրոցի աշխատանքների մեկնարկը և կարևորելով դպրոցի անցկացումը Հայաստանում՝ ԿԳՄՍՆ լեզվի կոմիտեի նախագահ Սիրանուշ Դվոյանը նշել է, որ չնայած տեխնոլոգիական արագ զարգացումներին՝ բազմաթիվ օգտատերերի համար լեզվական տեխնոլոգիաներն ու արհեստական բանականության գործիքները դեռևս դիտվում են դժվարամատչելի նոր հնարավորություններ։

Այդ համատեքստում Լեզվի կոմիտեի նախագահն առանձնակի ընդգծել է COST-UniDive դպրոցի շրջանակում միավորված մասնագետների համատեղ աշխատանքը։

«Դժվար է հավատալ, որ լեզվական տեխնոլոգիաները և դրանց բերած հնարավորությունները փոխել են և շարունակում են փոխել մեր պատկերացումներն աշխարհի, գործածվող լեզուների, դրանց հարաբերությունների, տեղի ու դերի մասին: Եվ մինչ մենք անհամբեր սպասում ենք, թե մոտակա ժամանակներում է՛լ ինչ հարմարավետություն կպարգևեն մեզ անհավատալի մասշտաբներով տվյալների հետ աշխատող գործիքները, այստեղ հավաքված մասնագետներն իրենց ամենօրյա համբերատար աշխատանքի ու սերտ համագործակցության շնորհիվ հնարավոր են դարձնում դրանց կիրառումը»,- նշել է Սիրանուշ Դվոյանը։

Գործընկերության շրջանակում ԵՊՀ-ում հյուրընկալվել են լեզվական տեխնոլոգիաների և բնական լեզվի մշակման ոլորտի հետազոտողներ և ուսանողներ Եվրոպայի մի շարք բուհերից, այդ թվում՝ Փարիզ-Սակլե (Ֆրանսիա), Կարլի (Չեխիա), Ուփսալայի (Շվեդիա), Սաարլանդի (Գերմանիա), Հայդելբերգի (Գերմանիա) համալսարաններից, Լյուքսեմբուրգի գիտության և տեխնոլոգիաների ինստիտուտից և այլ կառույցներից։

Ձմեռային դպրոցն օրինակ է, թե ինչպես կարող է ԵՊՀ-ի ավելի սերտ ինտեգրումը ԵՄ հետազոտական ենթակառուցվածքներում ու նախագծերում խթանել թվանշային հումանիտար գիտությունների զարգացումը Հայաստանում՝ թիրախային գիտական նախագծերի միջոցով ու պետական գերատեսչությունների հետ նպատակային գործակցությամբ։

ԵՊՀ-ում անցկացվող ձմեռային դպրոցը կազմակերպվել է COST (European Cooperation in Science and Technology) UniDive-«Ընդհանրությունները, բազմազանությունն ու յուրատիպությունը լեզվական տեխնոլոգիաներում» նախագծի շրջանակում։ Նախագծի հայաստանյան գործընկերը Երևանի պետական համալսարանն է՝ ի դեմս «Հայերենի լեզվական տեխնոլոգիաներ» հետազոտական աշխատարանի, որը գործում է ՀՀ ԿԳՄՍՆ լեզվի կոմիտեի երաշխավորությամբ՝ գիտական և գիտատեխնիկական պետական նպատակային դրամաշնորհի շրջանակում։

Նյութի աղբյուրը. ՀՀ կրթության, գիտության, մշակույթի և սպորտի նախարարություն