Արթուր Մարտիրոսյանն այցելել է Ճամբարակի, Հրազդանի և Ծաղկաձորի երիտասարդական կենտրոններ

Դեկտեմբերի 26, 2025

Լուրեր կազմակերպություններից

ԿԳՄՍ նախարարի տեղակալ Արթուր Մարտիրոսյանը տարեվերջյան շրջայց է կատարել ՀՀ պետական բյուջեի միջոցներով 2025 թվականին Գեղարքունիքի և Կոտայքի մարզերում հիմնված երիտասարդական կենտրոններ՝ ծանոթանալու կատարված աշխատանքների ու կահավորման ընթացքին: Երիտասարդական կենտրոնները ստեղծվել են ԿԳՄՍ նախարարության դրամաշնորհային աջակցությամբ:

Արթուր Մարտիրոսյանը նախ այցելել է «Ճամբարակի արարող երիտասարդներ (ՃամբԱՐԵ)», ապա Հրազդանի «Հրազդան» և Ծաղկաձոր խոշորացված համայնքի Աղավնաձոր բնակավայրի «Ծաղկաձորի ալտերնատիվ» երիտասարդական կենտրոններ: Նախարարի տեղակալին ուղեկցել են Ճամբարակ համայնքի ղեկավարի տեղակալ Ռոբերտ Օհանյանը, Հրազդան համայնքի ղեկավարի տեղակալ Վարուժան Սաֆարյանը, Ծաղկաձոր համայնքի ղեկավար Նարեկ Հարությունյանը և համայնքի ղեկավարի առաջին տեղակալ Ոսկան Եղիազարյանը, ինչպես նաև երիտասարդական կենտրոնների քաղհասարակության ներկայացուցչներ:

Նախարարի տեղակալ Արթուր Մարտիրոսյանը, շրջելով երիտասարդական կենտրոնների տարածքում, կարևորել է, որ 2026 թ. տարեսկզբին կենտրոններն ամբողջությամբ գործեն՝ տեղի երիտասարդության համար ապահովելով համապատասխան միջավայր, որտեղ կիրականացվեն բովանդակային առումով հագեցած միջոցառումներ: Ըստ նախարարի տեղակալի՝ երիտասարդական կենտրոնները պետք է հանդիսանան գրավիչ միջավայր, որտեղ կիրականացվեն երիտասարդական պետական քաղաքականությունից բխող առաջնահերթությունները, երիտասարդների համար կապահովվեն կարողությունների զարգացման հնարավորություն, ինտելեկտուալ ժամանց, և երիտասարդները կզինվեն գիտելիքով՝ գործելու որպես ակտիվ քաղաքացի, կիրականացվեն իրազեկման ակցիաներ, հանրային քաղաքականության մշակմանը երիտասարդների մասնակցությանն ուղղված ծրագրեր:

Արթուր Մարտիրոսյանը հատկապես կարևորել է դրամաշնորհային ծրագրի շրջանակում առկա ավարտական վերջին փուլի աշխատանքների պատշաճ կազմակերպումը։ Նախարարի տեղակալը շեշտադրել է, որ մարզաբնակ երիտասարդներին ուղղված Կառավարության ծրագրի այս միջոցառումը ենթադրում է Կառավարություն-ՏԻՄ-քաղաքացիական հասարակություն արդյունավետ համագործակցություն ինչպես կենտրոնների գործարկման, այնպես էլ դրանց բնականոն գործունեության կազմակերպման առումով։

«Համագործակցության այս եռակողմ ձևաչափը կենտրոնների արդյունավետ գործունեության գրավականն է, և նման մոտեցման մասին է խոսում այն փաստը, որ նախարարություն-հայտատու հարաբերությունները պարզապես դրամաշնորհատու-դրամաշնորհառու հարաբերություններ չեն. պետությունը երիտասարդական ոլորտի քաղաքացիական հասարակության կազմակերպություններին դիտարկում է որպես սոցիալական գործընկերներ և պատրաստակամ է նրանց շարունակաբար աջակցել՝ մեթոդական աջակցություն տրամադրելով, կարողությունների զարգացմանը նպաստելով, ազգային և միջազգային մակարդակներում ցանցային համագործակցության մեջ ներգրավելով։ ՏԻՄ-երից ակնկալվում է աջակցել կենտրոնների ամենօրյա գործունեության կազմակերպմանը՝ երիտասարդական աշխատողի հաստիքների նախատեսմամբ և այլ հնարավոր միջոցներով»,- ասել է նախարարի տեղակալը և հավելել՝ ՏԻՄ-երի պատասխանատվությունն ամրագրված է 2025թ․ մարտին ընդունված «Երիտասարդական քաղաքականության մասին» օրենքում։

Կենտրոնների արդյունավետ մեկնարկի առումով կարևորվել է ԿԳՄՍՆ դրամաշնորհային ծրագրում չընդգրկված՝ կենտրոններին հարակից տարածքների բարեկարգումը, որը կարող է իրականացվել ՏԻՄ և քաղհասարակության համագործակցության շրջանակում:

Շրջայցի ընթացքում նախարարի տեղակալը ՏԻՄ ներկայացուցիչների և երիտասարդական կենտրոնների պատասխանատուների հետ քննարկել է նաև մի շարք այլ ընթացիկ հարցեր։

Նյութի աղբյուրը. ՀՀ կրթության, գիտության, մշակույթի և սպորտի նախարարություն