Հատկացումներ մշակույթի ոլորտին

Դեկտեմբերի 19, 2025

Մշակութային լուրեր

Կառավարության այսօրվա նիստում հաստատվել է պետական բյուջեի վերաբաշխմամբ Հայաստանի պետական սիմֆոնիկ նվագախմբի հիմնադրման 20-ամյակի միջոցառումների շրջանակում աշխարհահռչակ դաշնակահար-վիրտուոզ Լանգ Լանգի համերգի իրականացման, մեծանուն հայ պոետ, հասարակական-քաղաքական գործիչ Վահան Տերյանի ծննդյան 140-ամյա հոբելյանի կապակցությամբ գրողին նվիրված խաղարկային-վավերագրական ֆիլմի ստեղծման, Ջերմուկում հեղինակ-կատարողների հանրապետական մրցույթ-փառատոնի գալա-համերգի և «Ֆեստիվառ Ջերմուկ» երաժշտական փառատոնի կազմակերպման նպատակով լրացուցիչ ֆինանսական միջոցների հատկացման մասին որոշումը:

Սիմֆոնիկ նվագախմբի 20-ամյակ

Հայաստանի պետական սիմֆոնիկ նվագախումբը 2026 թվականին նշում է հիմնադրման 20-ամյակը՝ ներկայացնելով երկու տասնամյակների ընթացքում արձանագրված համերգային և միջազգային հաջողությունները։ Հոբելյանական համերգը նախատեսվում է 2026 թվականի ապրիլի 14-ին՝ Կարեն Դեմիրճյանի անվան մարզահամերգային համալիրում։

Համերգին կմասնակցի չինական ծագում ունեցող ամերիկացի աշխարհահռչակ դաշնակահար Լանգ Լանգը, որը համարվում է ժամանակակից ամենապահանջված և ազդեցիկ երաժիշտներից։ Նրա այցը բացառիկ իրադարձություն է ոչ միայն Հայաստանի, այլև տարածաշրջանի մշակութային դաշտի համար։

Ֆիլմ՝ Վահան Տերյանի 140-ամյակի շրջանակում

Վահան Տերյանի ծննդյան 140-ամյա հոբելյանին նվիրված խաղարկային-վավերագրական ֆիլմում նոր տեխնոլոգիական գործիքների կիրառմամբ ընդգրկվելու են տարբեր ժամանակաշրջաններ և իրադարձություններ, որոնք պատմելու են Վահան Տերյանի կյանքի տարբեր դրվագների, նշանակալի դեպքերի, նրա բացառիկ գործունեության մասին՝ լույս սփռելով մեր գրականության և պատմության բազմաթիվ անհայտ էջերի վրա։ Այս նախաձեռնությամբ առաջին անգամ փորձ է արվում լայն կտավի ստեղծագործություն ունենալ մեծանուն հայ պոետի մասին, որը հնարավորություն կստեղծի պահպանել, արժևորել և սերունդներին փոխանցել Վահան Տերյանի ժառանգությունը:

«Հեղինակային երգի» հանրապետական մրցույթ-փառատոն

«Հեղինակային երգի» հանրապետական մրցույթ-փառատոնն անցկացվում է ԿԳՄՍ նախարարության աջակցությամբ և միտված է բացահայտելու երգարվեստի ոլորտում ստեղծագործող անհատ-կատարողներին, որոնք հեղինակում են երգեր հեղինակային երգի, ռոմանսի և աշուղական երգի ժանրերում։ Փառատոնին մասնակցելու հնարավորություն ունեն հանրապետության 10-35 տարեկան պատանիներն ու երիտասարդները՝ որպես ուսումնական հաստատությունների սովորողներ և անհատ ստեղծագործողներ։ Փառատոնն անցկացվում է ՀՀ մարզերում, իսկ փակման արարողությունն ամեն տարի անցկացվում է Ջերմուկ քաղաքում՝ «Ջերմ ամանոր Ջերմուկում» մշակութային ծրագրի շրջանակում։

Փառատոնն իր բազմաթիվ միջոցառումներով խթանում է դպրոցների միջև փորձի փոխանակումը, ստեղծարարությունը, ձևավորում է պատանիների գեղարվեստական ճաշակը: Միջոցառումը նաև նպաստում է ՀՀ մարզերի երաժշտական և արվեստի դպրոցներում ուսանող տաղանդավոր սաների բացահայտմանը և ինքնադրսևորմանը, նրանց հմտությունների ու կարողությունների կատարելագործմանը:

«Ֆեստիվառ Ջերմուկ» երաժշտական փառատոն

«Ֆեստիվառ» երաժշտական փառատոնի մեկնարկը տրվել է 2023 թվականին. այն հաջողությամբ իրականացվել է ՀՀ մի շարք մարզերում (յուրաքանչյուր տարի 3 մարզում): «Ֆեստիվառ Ջերմուկ» երաժշտական փառատոնի անցկացմամբ կարևորվում է Ջերմուկ քաղաքում ժամանցային միջոցառումների իրականացումը, զբոսաշրջային ուղղությունների, ինչպես նաև մարզային տնտեսության զարգացման խթանումը: Ծրագիրը նպաստում է մարզերում մշակութային կյանքի աշխուժացմանը, մշակույթի ապակենտրոնացմանը, մշակութային զբոսաշրջության շրջանակի ընդլայնմանը: Ծրագրի շահառուներ են նաև սոցիալական խոցելի խմբերը:

Որոշման ընդունմամբ՝ վերը նշված միջոցառումների իրականացմանը ՀՀ կառավարության պահուստային ֆոնդից, ընդհանուր առմամբ, կհատկացվի 179 մլն 378,6 հազար դրամ:

Նյութի աղբյուրը. ՀՀ կրթության, գիտության, մշակույթի և սպորտի նախարարություն