Կամերային երաժշտության ազգային կենտրոնը ԿԳՄՍ նախարարության աջակցությամբ երաժշտական նոր գործիքներ է ձեռք բերել

Դեկտեմբերի 18, 2025

Մշակութային լուրեր

ԿԳՄՍ նախարարության աջակցությամբ և ֆինանսավորմամբ Կամերային երաժշտության ազգային կենտրոնը 2025 թվականին ձեռք է բերել 6 բարձրակարգ երաժշտական գործիքներ։

ԿԳՄՍ նախարարի տեղակալ Դանիել Դանիելյանը Կամերային երաժշտության ազգային կենտրոն այցի ընթացքում ծանոաթացել է կառույցի՝ նոր գործիքներով համալրմանը։ ԿԱԵԿ տնօրեն Գարեգին Սարգսյանը և գեղարվեստական մասով տնօրենի տեղակալ Արմեն Սուքիասյանը նախարարի տեղակալին են ներկայացրել ձեռք բերված երաժշտական գործիքները։

Մասնավորապես՝ շեշտվել է, որ Կամերային երաժշտության ազգային կենտրոնի կազմում գործում են Հայաստանի լավագույն վեց կամերային երաժշտախմբերը, որոնց արդյունավետությունն ու կատարողական բարձր որակի ապահովումը էապես պայմանավորված են նաև որակյալ երաժշտական գործիքների առկայությամբ։

Դանիել Դանելյանը շնորհավորել է կենտրոնի տնօրինությանն ու անձնակազմին կարևոր ձեռքբերման համար և նշել, որ նախարարության առաջնահերթություններից է շարունակաբար նորացնել թատերահամերգային կազմակերպությունների ենթակառուցվածքները, տեխնիկան, գույքը:

«Որակի բարձրացման գործընթացում կան մի քանի կարևոր բաղադրիչներ, որոնք անհրաժեշտ է հաշվի առնել․ առաջին հերթին՝ մեր արվեստագետների որակյալ կրթությունը, ելույթներն արտերկրում, ինչպես նաև Հայաստանում բարձրարվեստ համերգների իրականացումն ու հետաքրքիր ծրագրերի ներկայացումը։ Սակայն նույնիսկ այն պարագայում, երբ ունենք բարձրակարգ արվեստագետներ, առանց որակյալ երաժշտական գործիքների՝ անհնար է ապահովել կատարողական բարձր մակարդակ։ Երաժշտական գործիքների համալրումը զգալիորեն հեշտացնում է կատարումը, հատկապես այն դեպքում, երբ դրանք բարձր որակի են և ձեռք են բերվում հեղինակավոր ապրանքանիշերից։ Այդ ընկերությունները տարիների փորձի շնորհիվ հստակ ճանաչում են երաժիշտների պահանջներն ու ակնկալիքները, և գործիքները ստեղծվում են հենց այդ չափորոշիչներին համապատասխան»։

Նախարարի տեղակալը հավելել է, որ յուրաքանչյուր տարի մի քանի տասնյակ միլիոն դրամի ներդրում է կատարվում երաժշտախմբերի համար նոր գործիքներ ձեռք բերելու նպատակով. «Այսօր ներկայացված գործիքները՝ տավիղը, կոնտրաբասները, գոնգը, հարվածային գործիքները, վիբրաֆոնը, այն տեսակներից են, որոնք վերջին տարիներին չեն թարմացվել»։

ԿԵԱԿ-ի գործիքների ֆոնդը համալրվել է՝

• Իտալիայում արտադրված «AURORA» մակնիշի տավիղով՝ արտադրող՝ «SALVI ընկերություն
• Հարվածային գործիքների հավաքածու՝ արտադրող՝ ամերիկյան «GRETSCH» ընկերություն
• Վիբրոֆոն՝ արտադրող՝ հոլանդական «ADAMS» ընկերություն
• Տամ-տամ (գոնգ)՝ արտադրող՝ ամերիկյան «ZILDJIAN» ընկերություն
• Գերմանական արտադրության «HÖFNER» մակնիշի երկու կոնտրաբաս

Կամերային երաժշտության ազգային կենտրոնի տնօրեն Գարեգին Սարգսյանը նշել է, որ ԿԵԱԿ-ում իրականացվում են բազմաթիվ և բազմաբովանդակ ծրագրեր՝ վեց երաժշտախմբերի մասնակցությամբ, սակայն հաճախ որոշ երաժշտական գործիքների բացակայության պատճառով երբեմն ստիպված են լինում փոփոխություններ կատարել համերգային ծրագրերում, երբեմն էլ՝ ընդհանրապես հրաժարվել դրանց իրականացումից։

«Ուզում եմ առանձնահատուկ շնորհակալություն հայտնել ՀՀ կրթության, գիտության, մշակույթի և սպորտի նախարարությանը՝ մեր դիմումին արագ արձագանքելու և երաժշտական գործիքների ձեռքբերման հարցում աջակցելու համար: Նախորդ տարի կենտրոնը ձեռք է բերել «Steinway» մակնիշի համերգային ռոյալ, հիմնովին վերանորոգվել է դահլիճի «Flentrop» մակնիշի երգեհոնը, իսկ այս տարի գործիքների ֆոնդը համալրվել է ևս վեց նոր գործիքով։ Կարող եմ վստահեցնել, որ այսօր Կամերային երաժշտության ազգային կենտրոնը լրացրել է այն հիմնական գործիքների պակասը, որոնք անհրաժեշտ են կամերային երաժշտախմբերին՝ բազմաժանր և բազմաբովանդակ համերգային ծրագրեր իրականացնելու համար»,- նշել է կենտրոնի տնօրեն Գարեգին Սարգսյանը:

Նոր գործիքների ձեռքբերումը կնպաստի ԿԵԱԿ-ի երաժշտախմբերի կատարողականության բարձրացմանը և հնարավորություն կընձեռի իրականացնել ավելի բազմաժանր համերգային ծրագրեր։

Երաժշտական գործիքների համալրման պետական քաղաքականությունը կլինի շարունակական։

Նյութի աղբյուրը. ՀՀ կրթության, գիտության, մշակույթի և սպորտի նախարարություն