Ամփոփվել են ՀՀ ուսանողական մարզական 26-րդ խաղերը

Դեկտեմբերի 13, 2025

Սպորտային լուրեր

Ավարտվել են ՀՀ կրթության, գիտության, մշակույթի և սպորտի նախարարության աջակցությամբ անցկացվող ՀՀ ուսանողական մարզական 26-րդ խաղերը, որոնց ծրագրում ընդգրկված էին 11 մարզաձևի 14 առաջնություն, ինչպես նաև ֆուտզալի մրցումներ՝ լիգայի և գավաթի ձևաչափերով:

Աշնանային փուլում կայացել են «Ֆուտզալի համալսարանական գավաթ» մրցաշարը, սպորտային ժայռամագլցման և պարանի ձգման առաջնությունները, վոլեյբոլի, բասկետբոլի և բադմինթոնի մրցումները:

«Ֆուտզալի համալսարանական գավաթ» մրցաշարը, որին 8 համալսարանի ներկայացուցիչներ են մասնակցել, անցկացվել է ԵՊՀ մարզադահլիճում: Մրցաշարի հաղթող է ճանաչվել Շիրակի պետական համալսարանի թիմը, որը եզրափակչում 5:1 հաշվով առավելության է հասել Գ․Վ․ Պլեխանովի անվան Ռուսաստանի տնտեսագիտական համալսարանի Երևանի մասնաճյուղի թիմի նկատմամբ: Լավագույն եռյակը եզրափակել է Հայաստանի ֆիզիկական կուլտուրայի և սպորտի պետական ինստիտուտի թիմը, որն այս գարնանը կայացած Ֆուտզալի համալսարանական լիգայի հաղթողն էր: Գավաթի ռմբարկու է դարձել Շիրակի պետական համալսարանի ուսանող Յուրա Խաչատրյանը, իսկ լավագույն դարպասապահի մրցանակին արժանացել է Գ․Վ․ Պլեխանովի անվան Ռուսաստանի տնտեսագիտական համալսարանի Երևանի մասնաճյուղի թիմի ներկայացուցիչ Ալեքսանդր Սերովը:

Պարգևատրման արարողությունն իրականացրել են Հայաստանի ուսանողական մարզական ֆեդերացիայի նախագահ Հովհաննես Գաբրիելյանը և ՀՊՏՀ Գյումրու մասնաճյուղի տնօրեն Կարեն Պետրոսյանը:

ՀՀ ուսանողական մարզական 26-րդ խաղերի շրջանակում ԵՊՀ մարզահամալիրում կայացել են նաև սպորտային ժայռամագլցման և պարանի ձգման առաջնությունները: Պարանի ձգման առաջնությունում հաղթող է ճանաչվել Հայաստանի պետական տնտեսագիտական համալսարանի թիմը, երկրորդ տեղը զբաղեցրել է Երևանի պետական համալսարանի թիմը, իսկ լավագույն եռյակը եզրափակել է Հայաստանի Եվրոպական համալսարանը: Սպորտային ժայռամագլցման տղաների պայքարում հաղթող է ճանաչվել Եվրասիական համալսարանի ուսանող Զավեն Պետրոսյանը, իսկ աղջիկների պայքարում՝ ԵՊՀ ուսանող Մարիա Սահակյանը:

ՀՀ ուսանողական մարզական 26-րդ խաղերի շրջանակում անցկացված վոլեյբոլի տղաների և աղջիկների առաջնություններին, որոնք կայացել են ՀՊՏՀ-ի մարզադահլիճում, մասնակցել է համալսարանական 14 թիմի շուրջ 200 ուսանող: Աղջիկների և տղաների պայքարում առաջին տեղը զբաղեցրել են ՀՖԿՍՊԻ թիմը:

Պարգևատրումն իրականացրել են ՀՈւՄՖ նախագահ Հովհաննես Գաբրիելյանը և Հայաստանի վոլեյբոլի ֆեդերացիայի գլխավոր քարտուղար Կարեն Ասմարյանը:

Բասկետբոլի տղաների և աղջիկների առաջնությունները կայացել են ԵՊՀ-ի մարզադահլիճում. մասնակցել է 12 համալսարանական թիմի շուրջ 200 ուսանող: Աղջիկների պայքարում հաղթող է ճանաչվել ՀՊՏՀ, իսկ տղաների պայքարում՝ ՀՖԿՍՊԻ թիմը: Պարգևատրումն իրականացրել են ՀՈւՄՖ նախագահ Հովհաննես Գաբրիելյանը և Հայաստանի բասկետբոլի ֆեդերացիայի մրցավարական հանձնաժողովի ղեկավար, առաջնության գլխավոր մրցավար Դրաստամատ Մուրադյանը:

Ուսանողական մարզական 26-րդ խաղերի շրջանակում Երևանի թենիսի և բադմինթոնի մանկապատանեկան մարզադպրոցում էլ անցկացվել են բադմինթոնի տղաների և աղջիկների առաջնությունները, որոնց 10 համալսարանի շուրջ 35 ուսանող է մասնակցել՝ այդ թվում Հնդկաստանի և ԻԻՀ քաղաքացիներ: Աղջիկների պայքարում հաղթող է ճանաչվել ԵՊՀ ուսանող Էլեն Տիրատուրյանը, իսկ տղաների պայքարում՝ Էրիկ Կրբաշյանը (ԵՊԲՀ): Խառը զուգախաղում առաջին տեղը զբաղեցրել են Մխիթար Գոշ համալսարանի ուսանողներ Իդրիսն ու Ջայան: Պարգևատրումն իրականացրել են ՀՈւՄՖ նախագահ Հովհաննես Գաբրիելյանը, Հայաստանի բադմինթոնի ֆեդերացիայի գլխավոր քարտուղար, մրցաշարի գլխավոր մրցավար Հրաչյա Պողոսյանը:

Խաղերն անցկացվել են գարնանային՝ մարտ - մայիս և աշնանային՝ հոկտեմբեր - նոյեմբեր փուլերով: Մրցումներին ավելի քան 20 պետական և մասնավոր բուհերի հազարից ավելի ուսանողներ են մասնակցել:

Նյութի աղբյուրը. ՀՀ կրթության, գիտության, մշակույթի և սպորտի նախարարություն