Ազգային երգ ու պարը` Արցախում․ կայացավ Արցախի ուսուցիչների առաջին վերապատրաստումը

Օգոստոսի 18, 2017

Լուրեր կազմակերպություններից

Այս ուստարվանից սկսած՝ Արցախի դպրոցների 5-7-րդ դասարաններում կներդրվի և կդասավանդվի դպրոցական ծրագրի ամենահայրենասիրական առարկաներից մեկը՝ ազգային երգ ու պարը։

Այս նպատակով Արցախում երկու փուլով մեկնարկեցին ուսուցիչների վերապատրաստումներ, որոնք իրականացվեցին «Ազգային երգ ու պարի ակադեմիա» կրթամշակութային հիմնադրամի կողմից։

Վերապատրաստումների առաջին փուլին մասնակցեց Ստեփանակերտի և Արցախի տարբեր շրջանների դպրոցների 17 ուսուցիչ՝ ծանոթանալով ազգային երգ ու պարի նրբություններին և ձեռք բերելով առարկան դասավանդելու նոր ու օգտակար հմտություններ։ Վերապատրաստման ծրագիրը ներառում էր ութական երգ և պար, այդ թվում՝ պարերգեր։ Վերապատրաստումների երկրորդ փուլը կմեկնարկի օգոստոսի 26-ին և կավարտվի օգոստոսի 30-ին:

«Ազգային երգ ու պար» առարկայի ծրագիրը կներառվի Արցախի այն դպրոցներում, որոնց ներկայացուցիչները հաջողությամբ կհաղթահարեն քննությունները:

Նշենք, որ բացի արցախյան վերապատրաստումներից՝ օգոստոսի 14-18-ը Երևանում անցկացվեցին հավելյալ վերապատրաստումներ՝ ուղղված 6-7-րդ դասարանների ծրագիրը դասավանդող ուսուցիչների մասնագիտական զարգացմանն ու որակի բարձրացմանը: Այս հավելյալ ծրագիրը ամբողջությամբ «Ազգային երգ ու պարի ակադեմիա» կրթամշակութային հիմնադրամի նախաձեռնությունն էր, որին մասնակցեց 60 ուսուցիչ (25-ը՝ Երևանից, 35-ը՝ ՀՀ մարզերից)։

Նյութի աղբյուրը. «Այբ» կրթական հիմնադրամ