Ծանրամարտի Մ23 տարեկանների և երիտասարդների ԵԱ. Ալեքսանդրա Գրիգորյանն ու Գառնիկ Չոլակյանը՝ ոսկե մեդալակիրներ

Հոկտեմբերի 30, 2025

Սպորտային լուրեր

Հայաստանն առաջին մեդալներն է նվաճել Ալբանիայի Դյուրես քաղաքում ընթացող ծանրամարտի Եվրոպայի երիտասարդների և մինչև 23 տարեկանների առաջնություններում:

Կանանց հավաքականի անդամ, Եվրոպայի չեմպիոն, աշխարհի առաջնության բրոնզե մեդալակիր, 58 կգ քաշային Ալեքսանդրա Գրիգորյանը Եվրոպայի երիտասարդների առաջնությունում երկամարտի 214 կգ արդյունքով (91+123 կգ) դարձել է ոսկե մեդալակիր: Պոկում վարժությունում երեք հաջող մոտեցմամբ նա բարձրացրել է 85 կգ, 89 կգ, 91 կգ կշռող ծանրաձողերը: Հրում վարժությունում մեր ծանրորդը բարձրացրել է 112 կգ, 116 կգ, 123 կգ կշռող ծանրաձողերը: Առանձին վարժություններում ևս Գրիգորյանն արժանացել է ոսկե մեդալներին:

60 կգ քաշային Գառնիկ Չոլակյանը չեմպիոնի կոչմանն արժանացել է երկամարտի 267 կգ (120+147 կգ) արդյունքով: Առանձին վարժություններում ևս Չոլակյանը ոսկե մեդալներ է նվաճել: Պոկում վարժությունում նա գլխավերևում պահել է նախ 115, ապա 120 կգ կշռող ծանրաձողերը: Հրում վարժությունում նա հաջորդաբար բարձրացրել է 140 կգ, 145կգ ու 147 կգ կշռող ծանրաձողերը:

Այս քաշային կարգում Հայաստանի մյուս ներկայացուցիչ Սեյրան Խուդանյանը պոկում վարժությունում գլխավերևում պահել է 115 կգ կշռող ծարաձողն ու արծաթե մեդալ նվաճել: Հրում վարժությունում Խուդանյանը բարձրացրել է միայն 135 կգ կշռող ծանրաձողը: Երկամարտի 250 կգ արդյունքով Խուդանյանը Եվրոպայի Մ23 տարեկանների առաջնությունում գրավել է 5-րդ տեղը:

Եվրոպայի երիտասարդների և Մ23 տարեկանների առաջնություններում Հայաստանը հոկտեմբերի 30-ին կունենա երեք մասնակից: Երիտասարդների պայքարում Հայաստանը կներկայացնեն 71 կգ քաշային Տիգրան Կարապետյանն ու Նարեկ Գրիգորյանը: Մինչև 23 տարեկանների մրցաշարում մեդալային պայքարի մեջ կմտնի 71 կգ քաշային Գոռ Սահակյանը:

Նյութի աղբյուրը. ՀՀ կրթության, գիտության, մշակույթի և սպորտի նախարարություն