Հասմիկ Ավագյանը մասնակցել է «Սպորտում դոպինգի դեմ պայքարի մասին» միջազգային կոնվենցիայի 20-ամյակին նվիրված համաժողովին

Հոկտեմբերի 24, 2025

Սպորտային լուրեր

ՀՀ կրթության, գիտության, մշակույթի և սպորտի նախարարի տեղակալ Հասմիկ Ավագյանը Փարիզում տեղակայված ՅՈՒՆԵՍԿՕ-ի կենտրոնակայանում մասնակցել է «Սպորտում դոպինգի դեմ պայքարի մասին» միջազգային կոնվենցիայի կողմերի խորհրդաժողովին (COP10)՝ նվիրված կոնվենցիայի 20-ամյակին:

Խորհրդաժողովի ընթացքում ներկայացվել են վերջին 20 տարիների ընթացքում կատարված աշխատանքները, դրանց արդյունքներն ու ձեռքբերումները, ինչպես նաև քննարկվել են հետագա բարելավման ուղղությունները։ Միջոցառման հիմքում եղել են էթիկայի, ազնվության և արդար խաղի սկզբունքների շուրջ քննարկումները՝ շեշտադրելով սպորտում այդ արժեքների կարևորությունը։

Միջոցառմանը մասնակցել է շուրջ 500 ներկայացուցիչ՝ ավելի քան 150 երկրից։

Խորհրդաժողովի շրջանակում ԿԳՄՍ նախարարի տեղակալ Հասմիկ Ավագյանն առանձնազրույց է ունեցել Համաշխարհային հակադոպինգային գործակալությունում (WADA) կառավարության հետ հարաբերությունների տնօրեն Դարրեն Մալալիի հետ, ներկայացրել է վերջին տարիներին ՀՀ կառավարության հակադոպինգային քաղաքականությունը և վերահաստատել գործադիրի՝ մաքուր սպորտին աջակցելու հանձնառությունը:

Հանդիպման ընթացքում նախարարի տեղակալը Դարրեն Մալալիին է փոխանցել նաև WADA-ի նախագահ Վիթոլդ Բանկայի՝ ՀՀ այցելելու հրավերը: Քննարկվել են համագործակցության ընդլայնման հնարավորությունները՝ հատկապես հաշվի առնելով 2027 թվականին Հայաստանում անցկացվելիք Ֆրանկոֆոնիայի 10-րդ խաղերը, ինչպես նաև ծանրամարտի և սպորտային մարմնամարզության Եվրոպայի առաջնությունները։

«Սպորտում դոպինգի դեմ պայքարի մասին» միջազգային կոնվենցիայի 20-ամյակին նվիրված եռօրյա խորհրդաժողովին քննարկվել են նաև մի շարք իրավական փոփոխություններ, որոնք հիմնականում վերաբերել են երկրների գործառնական անկախությանը։ Թեև մի շարք երկրներում այդ անկախությունը դեռ լիարժեք ապահովված չէ, Հայաստանում այն ամրագրված է օրենքով՝ սկսած 2023 թվականից։ Ըստ այդմ՝ Հայաստանի հակադոպինգային գործակալությունը գործում է որպես ինքնուրույն մարմին՝ օրենքով սահմանված լիազորություններով։

Քննարկվել են նաև վերապատրաստումների, հետազոտությունների և կառուցվածքային բարելավումների հարցեր։

«Սպորտում դոպինգի դեմ պայքարի մասին» միջազգային կոնվենցիային Հայաստանն անդամակցում է 2010 թվականից: WADA-ն մշակում է հակադոպինգային ընդհանուր ստանդարտներ և հակադոպինգային օրենսգիրք, որոնք ենթակա են պարտադիր կատարման անդամ բոլոր պետությունների կողմից: Միայն պետությունների կողմից WADA-ի օրենսգրքի համապատասխանության և անդամավճարի վճարման պայմանով են Միջազգային օլիմպիական կոմիտեն (ՄՕԿ) և Միջազգային մարզական ֆեդերացիաները թույլ տալիս պետությունների մարզական պատվիրակություններին մասնակցել Օլիմպիական խաղերին:

Նյութի աղբյուրը. ՀՀ կրթության, գիտության, մշակույթի և սպորտի նախարարություն