Այցեր Արագածոտնի և Շիրակի մարզերի մի շարք ուսումնական հաստատություններ

Հոկտեմբերի 20, 2025

Լուրեր կազմակերպություններից

Վարչապետ Նիկոլ Փաշինյանն այսօր այցելել է Արագածոտնի և Շիրակի մարզեր՝ ծանոթանալու մի շարք ուսումնական հաստատությունների կառուցման, վերանորոգման և հիմնանորոգման աշխատանքներին:

Նիկոլ Փաշինյանին ուղեկցել են փոխվարչապետ Տիգրան Խաչատրյանը, ԿԳՄՍ նախարար Ժաննա Անդրեասյանը, պաշտոնատար այլ անձինք։

Առաջին կանգառը եղել է Սասունիկի միջնակարգ դպրոցում, որտեղ ներկայացվել են նորակառույց դպրոցում իրականացված աշխատանքներն ու ստեղծված պայմանները: Ծրագրի ընդհանուր արժեքը կազմում է շուրջ 2 մլրդ 157 մլն դրամ։ Արդյունքում՝ Սասունիկ բնակավայրն ունի նոր դպրոց՝ 432 աշակերտ հզորությամբ։ Աշխատանքներն իրականացվել են 2023-2025թթ.:

Արագածոտնի մարզի Լուսակնի միջնակարգ դպրոց այցելության ընթացքում ևս պաշտոնատար անձինք ծանոթացել են իրականացված շինարարական աշխատանքներին: Ծրագրի ընդհանուր արժեքը կազմում է շուրջ 766 մլն դրամ: «22 համայնքներում փոքրաքանակ երեխաներով համալրված մոդուլային տիպի դպրոցների կառուցում» ծրագրի իրականացման արդյունքում կառուցվել է նոր միջնակարգ դպրոց: Աշխատանքներն իրականացվել են 2020-2025թթ.:

Դպրոցաշինության ծրագրի շրջանակում կառուցվել է նաև Ազատանի միջնակարգ դպրոցը, որտեղ Նիկոլ Փաշինյանին ներկայացվել են ստեղծված շենքային պայմաններն ու ենթակառուցվածքները: Ծրագրի ընդհանուր արժեքը կազմում է շուրջ 1 մլրդ 691 մլն դրամ: Աշխատանքներն իրականացվել են 2022-2025թթ.: Ազատանի միջնակարգ դպրոցում իրականացվել են նաև վերանորոգման աշխատանքներ: Ծրագրի ընդհանուր արժեքը կազմում է շուրջ 165 մլն դրամ: Աշխատանքներն իրականացվել են 2025թ. օգոստոս-սեպտեմբեր ամիսներին: Ծրագրերի իրականացման արդյունքում Ազատան բնակավայրն ունի նոր դպրոց 576 աշակերտի համար։

Վերանորոգված դպրոցների շարքում է նաև Գյումրիի թիվ 28 հիմնական դպրոցը, որտեղ իրականացված աշխատանքների ընդհանուր արժեքը կազմում է շուրջ 192 մլն դրամ: Վարչապետին ներկայացվել է, որ ծրագրի իրականացման արդյունքում Գյումրի համայնքը կունենա վերանորոգված դպրոց 435 աշակերտի համար։

Շիրակի մարզում Նիկոլ Փաշինյանն այցելել է նաև Ախուրյանի թիվ 2 հիմնական դպրոց, որտեղ իրականացվել են վերանորոգման աշխատանքներ: Վարչապետը շրջել է դպրոցում և ծանոթացել իրականացված վերանորոգման աշխատանքներին: Ծրագրի ընդհանուր արժեքը կազմում է շուրջ 186 մլն դրամ: Ծրագրի իրականացման արդյունքում Ախուրյան համայնքն ունի վերանորոգված դպրոց 362 աշակերտի համար։

Վարչապետ Փաշինյանի վերջին կանգառը եղել է Գյումրու թիվ 38 հիմնական դպրոցում, որտեղ երկրի ղեկավարին ներկայացվել են կրթական հաստատությունում իրականացված վերանորոգման աշխատանքները և ստեղծված պայմանները: Ծրագրի ընդհանուր արժեքը կազմում է շուրջ 228 մլն դրամ: Ծրագրի իրականացման արդյունքում Գյումրի համայնքը կունենա վերանորոգված դպրոց 235 աշակերտի համար։

Սասունիկի, Ազատանի, Գյումրիի թիվ 28 և թիվ 38, Ախուրյանի թիվ 2 դպրոցների կառուցումն ու վերանորոգումը ներառված են ՀՀ կառավարության «Մինչև 2026 թվականը կառուցվող, հիմնանորոգվող կամ վերակառուցվող 300 դպրոցներ» ծրագրում ընդգրկված հաստատությունների ցանկում։

Նյութի աղբյուրը. ՀՀ կրթության, գիտության, մշակույթի և սպորտի նախարարություն