Մեկնարկում է «ՀՀ 2027 թվականի երիտասարդական մայրաքաղաք» մրցույթի հայտերի ընդունման փուլը

Հոկտեմբերի 17, 2025

Լուրեր կազմակերպություններից

ԿԳՄՍ նախարարությունը մեկնարկում է ՀՀ 2027 թվականի երիտասարդական մայրաքաղաքի ընտրության մրցույթը:
 

Մրցույթի նպատակներն են`

 

• աջակցել մարզային երիտասարդական կյանքի ակտիվացմանը, երիտասարդների կարողությունների բացահայտմանը և համակողմանի զարգացմանը, երիտասարդների՝ որպես ՀՀ ակտիվ և պատասխանատու քաղաքացիների ինքնադրսևորմանն ու կայացմանը,
• խթանել տեղական ինքնակառավարման մարմինների կողմից երիտասարդական քաղաքականության ոլորտում իրականացվող աշխատանքների և ծրագրերի ծավալների մեծացումը,
• նպաստել համայնքային երիտասարդական ենթակառուցվածքների ստեղծմանը և զարգացմանը (համայնքային երիտասարդական կենտրոններ և երիտասարդական տարածքներ (միջավայրեր), քաղաքացիական հասարակության կառույցներ և այլն),
• նպաստել միջհամայնքային երիտասարդական կենտրոնների և երիտասարդական տարածքների (միջավայրերի) ցանցի ստեղծմանն ու համագործակցության զարգացմանը,
• խրախուսել տեղական երիտասարդական աշխատանքի կազմակերպումն ու զարգացումը, երիտասարդական նորարարական գաղափարների կյանքի կոչումը,
• օժանդակել միջազգային համագործակցության հաստատմանն ու զարգացմանը։

Մրցույթին կարող են մասնակցել քաղաքային բնակավայր ունեցող համայնքները կամ դրանց կազմում ներառված առանձին քաղաքային բնակավայրերը։

Մրցույթի արդյունքում հաղթող ճանաչված և երիտասարդական մայրաքաղաք հռչակված քաղաքը կհամարվի 2027 թվականին կազմակերպվող երիտասարդական միջոցառումների և նախաձեռնությունների իրականացման հիմնական վայր։

Մրցույթն իրականացվում է հետևյալ փուլերով՝

• հայտերի ընդունում և գնահատում մրցութային հանձնաժողովի կողմից,
• հայտերի փորձագիտական գնահատում փորձագետների կողմից,
• ՀՀ բնակչության շրջանում կարճ հաղորդագրությամբ SMS քվեարկություն,
• մրցույթի արդյունքների ամփոփում և երիտասարդական մայրաքաղաքի հռչակում։

Հայտը ԿԳՄՍ նախարարություն է ներկայացվում համայնքապետարանի կողմից՝ համայնքում երիտասարդության ոլորտում գործունեություն ծավալող առնվազն երկու հասարակական կազմակերպությունների հետ համագործակցությամբ։

Հայտը պետք է բաղկացած լինի հետևյալ փաստաթղթերից՝

• համայնքի ղեկավարի գրություն մրցույթին մասնակցելու պատրաստակամության մասին.
• համահայտատու կազմակերպությունների հանձնառությունը հավաստող գրություններ.
• հայտադիմում.
• հայտադիմումին կից անհրաժեշտ տեղեկատվության և փաստաթղթերի ցանկ.
• ծրագիր, ընդ որում՝ ներկայացվող ծրագիրը պետք է ուղղված լինի մրցույթի նպատակներից առնվազն մեկի իրականացմանը:

Մրցույթին մասնակցության հայտերն ընդունվում են հոկտեմբերի 17-ից մինչև նոյեմբերի 20-ը ներառյալ։ Հայտերը պետք է ուղարկել ՀՀ կրթության, գիտության, մշակույթի և սպորտի նախարարին հասցեագրված գրությամբ՝ secretariat@escs.am էլ. փոստի միջոցով: Նախանշված ժամկետից ուշ ներկայացված հայտերը չեն դիտարկվի։

Կից ներկայացվում է ՀՀ ԿԳՄՍ նախարարի 08.08.2023թ. 1415-Ա/2 հրամանով հաստատված «Հայաստանի Հանրապետության տարվա երիտասարդական մայրաքաղաք» մրցույթի իրականացման կանոնակարգը և փորձագիտական գնահատման չափանիշները։

Հարցերի և հավելյալ տեղեկատվության համար զանգահարել` 010 599 643 հեռախոսահամարով:

Նյութի աղբյուրը. ՀՀ կրթության, գիտության, մշակույթի և սպորտի նախարարություն