Նշվել է Լեզուների եվրոպական օրը

Սեպտեմբերի 27, 2025

Լուրեր կազմակերպություններից

Հայաստանի ազգային գրադարանի բակում այսօր նշվել է Լեզուների եվրոպական օրը։ Միջոցառումը նախաձեռնել են ԵՄ անդամ 10 պետությունների դիվանագիտական ներկայացուցչությունները Հայաստանի Հանրապետությունում` նպատակ ունենալով ընդգծել լեզվական ու մշակութային բազմազանությունը։

Միջոցառմանը ներկա են եղել և ողջույնի խոսքով հանդես եկել Լեզվի կոմիտեի նախագահ Սիրանուշ Դվոյանը, Հայաստանի ազգային գրադարանի տնօրեն Աննա Չուլյանը, ՀՀ-ում հավատարմագրված դեսպաններ, միջազգային կազմակերպությունների ներկայացուցիչներ:

Լեզվի կոմիտեի նախագահ Սիրանուշ Դվոյանի նշմամբ՝ արդեն 25 տարի է, որ սեպտեմբերի 26-ը նշվում է որպես Լեզուների եվրոպական օր: Այն անցկացվում է յուրաքանչյուր տարվա համար ընտրված կարգախոսով: «Այս տարվա կարգախոսն է՝ «Լեզուները բացում են սրտերն ու մտքերը»:

Լեզուների եվրոպական օրն այս ձևաչափով` եվրոպական երկրների առանձին տաղավարներով, ընթերցումներով և միջոցառումներով, Հայաստանում առաջին անգամ է անցկացվում: Լեզուների եվրոպական օրը նշվում է երեք հիմնական գաղափարների շուրջ՝ լեզվական բազմազանության պահպանման, լեզուների ուսումնառության խթանման և միջմշակութային հաղորդակցության և փոխըմբռնման։ «Եթե այս ամենը կապենք միմյանց՝ վերջից սկիզբ դասավորությամբ, կստացվի, որ միջմշակութային հաղորդակցության և փոխըմբռնման կարևորմամբ լեզվական կրթությունը կարող է ապահովել աշխարհի մշակութային բազմազանությունը:

Ներկայումս Հայաստանի Հանրապետությունում իրականացվող հանրակրթության, բարձրագույն կրթության ու գիտության, մշակույթի և լեզվական բնագավառներում տեղի են ունենում բարեփոխումներ, որոնք, ըստ էության, արձագանքում են այս օրակարգին և այս գաղափարներին։ Բարեփոխումներն ընթանում են կոնկրետ ծրագրերի միջոցով, որոնք միտված են երկխոսական մշակույթի ամրապնդմանը, հաղորդակից միջավայրի ձևավորմանը և առավել հանդուրժող հասարակության ստեղծմանը: Լեզուներնը, ընդհանրապես, միտված են իրենց վրա կրելու այս առաքելությունը»,– նշել է Սիրանուշ Դվոյանը:

Նրա խոսքով՝ ընթացքի մեջ է հայերենի ստուգման և գնահատման միասնական համակարգը, որը մշակվում է եվրոպական ընդհանուր ստանդարտների համատեքստում: Ընթացիկ աշխատանքներ են տարվում նաև՝ ապահովելու համար Հայաստանում բնակվող ազգային փոքրամասնությունների, ՀՀ֊ ում բնակվող ժամանակավոր կամ ոչ ժամանակավոր կացության իրավունքով օտարների լեզվական մատչելիությունը:

Նշենք, որ Լեզուների երոպական օրը նպատակ ունի խթանելու և պաշտպանելու Եվրոպայի լեզվական բազմազանությունը: Այն ներառում է ինչպես մեծ, այնպես էլ փոքր և վտանգված լեզուների պահպանմանն ուղղված միջոցառումներ։ Օրվա կարևորագույն նպատակներից մեկն էր խրախուսել մարդկանց, անկախ տարիքից, լեզուներ սովորել։ Այս նպատակը ոչ միայն ներառում է հիմնական եվրոպական լեզուների (ինչպես անգլերեն, ֆրանսերեն, գերմաներեն) ուսումնառությունը, այնպես էլ տեղական և տարածաշրջանային լեզուների ճանաչումն ու ուսումնառությունը։

Լեզուները կարևոր են միջմշակութային հաղորդակցության համար, և օրվա նպատակներից մեկն էր նպաստել մարդկանց միջև փոխըմբռնմանը և համերաշխությանը։

Լեզուների եվրոպական օրվա ընթացքում կազմակերպվում են տարբեր միջոցառումներ՝ լեզվական սեմինարներ, մրցույթներ, դասընթացներ, մշակութային փառատոներ և այլն։ Այս միջոցառումները նպատակ ունեն խթանելու մարդկանց հետաքրքրությունը լեզուների նկատմամբ և ստեղծելու հնարավորություններ լեզվական ունակությունների զարգացման համար։

Նյութի աղբյուրը. ՀՀ կրթության, գիտության, մշակույթի և սպորտի նախարարություն