Ավելի քան 22 մլրդ դրամ՝ կրթական, մշակութային և մարզական հաստատությունների շինարարության, նախագծման և գույքի համար

Սեպտեմբերի 4, 2025

Լուրեր կազմակերպություններից

 ՀՀ կառավարության որոշմամբ ավելի քան 22 մլրդ 887 մլն դրամ կհատկացվի մի շարք կրթական, մշակութային և մարզական հաստատությունների շինարարական և նախագծման աշխատանքների իրականացման, ինչպես նաև գույքային ապահովման համար:

Հարցը զեկուցել է ՀՀ կրթության, գիտության, մշակույթի և սպորտի նախարարի տեղակալ Արաքսիա Սվաջյանը:

ԿԳՄՍ նախարարի տեղակալի խոսքով՝ հատկացված միջոցներից 21.8 մլրդ դրամը նախատեսված է կրթական հաստատություններում կապիտալ աշխատանքների իրականացման համար, որը հիմնականում ուղղված է դպրոցաշինության ծրագրերին։

Մասնավորապես՝ 9 մլրդ դրամ հատկացվում է դպրոցների կառուցման ծրագրին՝ ընթացող շինարարությունների տարեկան հատկացումների ավելացման նպատակով, 2,5 մլրդ դրամ՝ կրթահամալիրների կառուցման ծրագրին՝ ընթացող շինարարությունների տարեկան հատկացումների ավելացման նպատակով, 9,3 մլրդ դրամ՝ դպրոցների հիմնանորոգման/վերանորոգման ծրագրին՝ ընթացող շինարարությունների տարեկան հատկացումների ավելացման, ինչպես նաև նոր օբյեկտների շինարարության մեկնարկի նպատակով:

Միաժամանակ, ավելի քան 430 մլն դրամ կհատկացվի մանկապարտեզների կառուցման ծրագրին՝ Լեռնավանի մոդուլային մանկապարտեզի կառուցման համար 2025թ-ի բյուջեով հատկացումների, ինչպես նաև Ակնաշենի մանկապարտեզի կառուցման աշխատանքների ծավալների ավելացման նպատակով։ Երկու մանկապարտեզներում էլ նախատեսվում է աշխատանքներն ավարտել մինչև տարեվերջ:

Ավելի քան 400 մլն ՀՀ դրամ կհատկացվի դպրոցների մասնակի նորոգման ծրագրին՝ 12 դպրոցներում ենթակառուցվածքների և սանիտարահիգիենիկ պայմանների ապահովման նպատակով:

Որոշմամբ ավելի քան 200 մլն դրամ հատկացվում է բուհերի շենքային պայմանների և գույքային հագեցվածության ծրագրերին՝ Ազգային ագրարային համալսարանի և Թատրոնի և կինոյի պետական ինստիտուտի մի շարք մասնաշենքերի բարեկարգման և ուսումնական պրոցեսի կազմակերպման պայմանների բարելավման նպատակով:

Մշակույթի ոլորտում նախատեսվող կապիտալ աշխատանքներին կհատկացվի շուրջ 1 մլրդ 2 մլն դրամ, որը կտրամադրվի թատերահամերգային կազմակերպությունների գույքով ապահովմանը և մշակութային ժառանգության պահպանմանը: Կատարված հատկացումների շրջանակում կարևորագույն նշանակություն ունեն նաև Մատենադարանի թանգարանի ճակատային մասի արձանախմբի վերանորոգումը, Արթիկի Տիգրան Մանսուրյանի անվան մշակույթի տան հիմնանորոգումը: Արաքսիա Սվաջյանը տեղեկացրել է՝ գումար է հատկացվում նաև որոշակի տեխնիկայի և գույքի գնման համար, մասնավորապես՝ թատերահամերգային կազմակերպությունների համար ձեռք կբերվի նոր, արդիական ձայնահնչյունային համակարգեր և լուսադիոդային էկրաններ:

Միջոցներ են նախատեսված նաև Տիգրան Պետրոսյանի անվան շախմատի-տուն մարզադպրոցի հիմնանորոգման և Անի համայնքի Մարալիկ քաղաքի մարզադաշտի վերակառուցման նախագծերի, ինչպես նաև Վանաձորի բռնցքամարտի մանկապատանեկան մարզադպրոցի ջեռուցման համար։ Նշված աշխատանքներին կհատկացվի շուրջ 63․8 մլն ՀՀ դրամ։

Նյութի աղբյուրը. ՀՀ կրթության, գիտության, մշակույթի և սպորտի նախարարություն