Դրական եզրակացություն է տրվել «Մշակութային աճուրդների կազմակերպման մասին» օրենքի նախագծին

Օգոստոսի 29, 2025

Մշակութային լուրեր

ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի՝ օգոստոսի 29-ի նիստում երկրորդ ընթերցմամբ քննարկվել է «Մշակութային աճուրդների կազմակերպման մասին» օրենքի և կից օրենքներում լրացումներ նախատեսող օրենսդրական փաթեթը:

Նախատեսվում է խթանել ստեղծարար ոլորտներում ներդրումային հոսքերը, նպաստել ժամանակակից արվեստագետների հանրայնացմանն ու ֆինանսական ինքնաբավությանը, կանխարգելել մշակութային ժառանգության ապօրինի տեղաշարժերը, զարգացնել միջազգային համագործակցությունը՝ մասնավորապես ապահովելով միջազգային հեղինակավոր աճուրդի տների ներգրավումը հայկական շուկա:

Հարցը զեկուցել է ՀՀ կրթության, գիտության, մշակույթի և սպորտի նախարարի տեղակալ Ալֆրեդ Քոչարյանը:

Նախարարի տեղակալի ներկայացմամբ՝ ՀՀ ազգային ժողովը մայիսի 7-ին առաջին ընթերցմամբ ընդունել է «Մշակութային աճուրդների կազմակերպման մասին» օրենքի նախագիծը, որը նպատակ ունի ոչ միայն կանոնակարգել արվեստի շուկայում տնտեսական հարաբերությունները, այլև խթանել արվեստի պատկերասրահների, աճուրդային տների և արվեստի կետերի միջև համագործակցության էկոհամակարգի ձևավորումը, որը կարևոր նշանակություն ունի ընդհանուր արվեստի դաշտի դինամիկ զարգացման, արվեստագետի վարկանիշի բարձրացման և արվեստի նոր միտումների ձևավորման գործում:

«Օրենքի հիմնական խնդիրներն են՝ խթանել ստեղծարար ոլորտներում ներդրումային հոսքերը, նպաստել ժամանակակից արվեստագետների հանրայնացմանը և ֆինանսական ինքնաբավությանը, կանխարգելել մշակութային ժառանգության ապօրինի տեղաշարժերը, զարգացնել միջազգային համագործակցությունը՝ մասնավորապես ապահովելով միջազգային հեղինակավոր աճուրդի տների ներգրավումը հայկական շուկայում, որն իր հերթին կնպաստի արվեստի միջազգային շուկայում Հայաստանի վարկանիշի բարձրացմանը»,- նշել է Ալֆրեդ Քոչարյանը։

Նա նաև հավելել է, որ նախագծով սահմանվում են մշակութային աճուրդների գործունեության կազմակերպմանը ներկայացվող ընդհանուր պահանջները, մասնավորապես՝ հիմնական հասկացությունները, մասնակիցների իրավունքները և պարտականությունները, մշակութային աճուրդի կազմակերպման և անցկացման ընթացակարգերը։

ԿԳՄՍ նախարարի տեղակալ Ալֆրեդ Քոչարյանի խոսքով՝ նախաձեռնությամբ սահմանվում է, որ մշակութային աճուրդների կազմակերպման ու անցկացման գործունեությունը ենթակա է լիցենզավորման:

Ալֆրեդ Քոչարյանը նաև տեղեկացրել է՝ փաթեթը լրամշակվել է պատգամավորների առաջարկների և դիտարկումների հիման վրա: Օրենքի նախագծի մշակման շրջանակում ուսումնասիրվել է միջազգային, մասնավորապես, եվրոպական երկրների՝ Ֆրանսիայի, Անգլիայի հեղինակավոր աճուրդների տների փորձը, կազմակերպել են քննարկումներ շահագրգիռ կողմերի հետ, այդ թվում՝ փորձագետների և շահառու մասնակիցների հետ։

Հանձնաժողովը դրական եզրակացություն է տվել օրենքի նախագծին:

Նյութի աղբյուրը. ՀՀ կրթության, գիտության, մշակույթի և սպորտի նախարարություն