Ա. Սպենդիարյանի անվան օպերայի և բալետի ազգային ակադեմիական թատրոնի նոր թատերաշրջանը մեկնարկել է Ստեփանավանում

Օգոստոսի 29, 2025

Մշակութային լուրեր

Ա. Սպենդիարյանի անվան օպերայի և բալետի ազգային ակադեմիական թատրոնը Ստեփանավանում մեկնարկել է իր 93-րդ թատերաշրջանը՝ հանդիսատեսին ներկայացնելով թատրոնի այցեքարտային ներկայացումներից՝ Արամ Խաչատրյանի «Դիմակահանդես» բալետը։

Այսկերպ ազդարարվել է նաև «Արենա Լոռի» արվեստի միջազգային ամենամյա փառատոնի մեկնարկը։

Միջոցառմանը ներկա են եղել ՀՀ կրթության, գիտության, մշակույթի և սպորտի նախարարի տեղակալ Դանիել Դանիելյանը, ԱԺ պատգամավոր Արփի Դավոյանը, Ստեփանավանի համայնքապետ Արմեն Գրիգորյանը, Ա. Սպենդիարյանի անվան օպերայի և բալետի ազգային ակադեմիական թատրոնի տնօրեն Կարեն Դուրգարյանը, ստեփանավանցիներ, քաղաքի հյուրեր։

ՀՀ ԿԳՄՍ նախարարի տեղակալ Դանիել Դանիելյանը ողջունել է ներկաներին և կարևորել Օպերային թատրոնի նոր թատերաշրջանի բացումը Ստեփանավանում:

«Մշակութի ապակենտրոնացման քաղաքականությունը Կառավարության օրակարգում է: Դա նշանակում է, որ ՀՀ մարզերում, համայնքներում, ամենուրեք բարձր մշակույթը պետք է հասանելի լինի բոլոր քաղաքացիներին՝ դպրոցականներից մինչև թոշակառուներ: ՀՀ բոլոր վայրերում պետք է ապահովել բարձր կատարողական արվեստի ներկայացումը՝ Օպերային թատրոնի, Սունդուկյանի անվան ազգային ակադեմիական, Ստանիսլավսկու անվան ռուսական պետական դրամատիկական թատրոնների և նախարարության ենթակայության բոլոր թատերահամերգային կազմակերպությունների ներկայացումներն ու համերգները»,- ասել է Դանիել Դանիելյանը:

Թվարկելով մարզային միջոցառումները՝ նախարարի տեղակալը նշել է, որ «Հայաստանի ազգային ֆիլհարմոնիկ նվագախումբը սեպտեմբերի 2-ից Ստեփանավանում կմեկնարկի մարզային շրջագայությունը, այնուհետև հանդես կգա՝ Գյումրու Վ. Աճեմյանի անվան պետական դրամատիկական թատրոնում, ապա՝ Մեղրիի Մարզամշակութային կենտրոնում, Կապանի Մշակույթի մեծ դահլիճում, Գորիսի Վ. Վաղարշյանի անվան պետական դրամատիկական թատրոնում, Սիսիանի Հ. Սահյանի անվան մշակույթի կենտրոնում: Ստանիսլավսկու անվան ռուսական պետական դրամատիկական թատրոնն էլ իր նոր թատերաշրջանի մեկնարկը նախատեսել է Վանաձորում: Մարզային մշակութային կյանքի ակտիվացման քաղաքականությունը նաև դրվել է դրամաշնորհային ֆինանսավորման առանցքում. առաջնահերթությունը տրվում է այն ծրագրերին, որոնք ունեն մարզերում մշակութային միջոցառումներ իրականացնելու բաղադրիչ: Այն բոլոր մշակութային ծրագրերը, նախագծերն ու միջոցառումները, որոնք իրականացվում են երևանյան բեմերում, նույն բարձր կատարողական արվեստով ներկայացվում են նաև մարզերի և համայնքների բնակիչների համար: «Վստահորեն կարելի է ասել, որ մարզային մշակութային կյանքի ակտիվացման ուղղությամբ իրականացվող քայլերն աննախադեպ են»,- ասել է նախարարի տեղակալը։

Ա. Սպենդիարյանի անվան օպերայի և բալետի ազգային ակադեմիական թատրոնի տնօրեն Կարեն Դուրգարյանը վստահ է՝ մարզերի երաժշտասերները պատրաստ են հյուրընկալել ամենաբարձրակարգ երաժշտական թատրոններին։

«Այն համերգներով, ելույթներով, որոնցով Օպերային թատրոնը մարզերում ելույթ է ունեցել, փաստվում է, որ մարզերում կա բարձր ճաշակ ունեցող հանդիսատեսը: Մենք նույնիսկ մարզ ենք տարել Բելգիայից եկած նվագախումբ, որը Չայկովսկու 6-րդ սիմֆոնիան է կատարել։ Մենք հաճույքով էինք նայում հանդիսատեսին, որը խորասուզված էր այդ ելույթի մեջ: Պետք է հաճախակի լինել մարզերում»:

Նշենք, որ «Արենա Լոռի» արվեստի միջազգային ամենամյա փառատոնի շրջանակում օգոստոսի 29-ին Օպերային թատրոնը հանդես կգա Արմեն Տիգրանյանի «Անուշ» օպերայով։ Նորաստեղծ փառատոնի ծրագրում մինչև տարեվերջ երևանյան օպերան 10 բեմադրություն և համերգային ծրագիր կներկայացնի ստեփանավանցիների գնահատմանը, իսկ մյուս տարի կընդլայնեն և՛ ծրագիրը, և՛ աշխարհագրությունը:

Նյութի աղբյուրը. ՀՀ կրթության, գիտության, մշակույթի և սպորտի նախարարություն