Հաստատվել է Արարատ, Եղեգնաձոր և Մարտունի համայնքներում մարզահամալիրների կառուցման ծրագիրը

Օգոստոսի 28, 2025

Սպորտային լուրեր

ՀՀ կառավարության նիստում այսօր հաստատվել է Արարատ, Եղեգնաձոր և Մարտունի համայնքներում սիրողական սպորտի զարգացման ծրագիրը՝ մասնավորի հետ համագործակցությամբ:

Հարցը զեկուցել է ՀՀ կրթության, գիտության, մշակույթի և սպորտի նախարար Ժաննա Անդրեասյանը:

Ծրագրի նպատակն է սիրողական սպորտում ստեղծել կայուն և արդյունավետ համագործակցություն պետական և մասնավոր հատվածների միջև՝ նպաստելով զանգվածային սպորտի զարգացմանը, ֆիզիկական ակտիվության խթանմանը և առողջ ապրելակերպի տարածմանը։

ԿԳՄՍ նախարար Ժաննա Անդրեասյանի խոսքով՝ ՀՀ ֆիզիկական կուլտուրայի և սպորտի ոլորտների 2024-2030 թվականների զարգացման ռազմավարությամբ նախատեսված է յուրաքանչյուր խոշորացված համայնքում տիպային մարզահամալիրի կառուցում, որը պարտադիր պետք է ներառի խաղային մարզադահլիճ, տարբեր մարզաձևերի զարգացման համար լողավազան, ֆիտնես սրահ՝ ծառայելով հանրության շրջանում ֆիզիկական առողջ ապրելակերպի տարածմանը և սպորտի զարգացմանը։ Ժաննա Անդրեասյանի խոսքով՝ մարզահամալիրներում նախատեսված է նաև սրճարանային հատվածի և այլ անհրաժեշտ ենթակառուցվածքների առկայություն, ինչը շատ բնակավայրերում կարող է դառնալ նաև ժամանցի նոր միջավայր՝ խթանելով հանրային նոր մշակույթ։

«Ակնհայտ է, որ ֆիզիկական առողջ ապրելակերպի և սպորտի զարգացման համար անհրաժեշտ են համապատասխան ենթակառուցվածքներ, և այդ ենթակառուցվածքների զարգացումը, հաշվի առնելով դրանց առանձնահատկությունները և հետագա արդյունավետ շահագործման խնդիրները, նպատակահարմար է իրականացնել մասնավորի հետ համատեղ՝ ներգրավելով ոլորտում մասնագիտացված կազմակերպություններին»,- ասել է ԿԳՄՍ նախարարն՝ ընդգծելով, որ համագործակցության քննարկման նպատակով նախաձեռնվել է բաց հրավեր ոլորտի կազմակերպություններին, որին շուրջ 30 կազմակերպություն է արձագանքել:

Մրցակցային ընտրության արդյունքում համագործակցությունն իրականացվելու է «Հիլլզ» բրենդի ներքո մասնագիտացված ծառայություն իրականացնող ընկերության հետ:

Ներկայացնելով նախագիծը՝ Ժաննա Անդրեասյանը տեղեկացրել է՝ ընկերությունը մինչև 2025 թ. տարվա ավարտը պետք է տրամադրի տիպային մարզահամալիրների նախագծանախահաշվային փաստաթղթերը, որոնք մշակվում են ընկերության միջոցներով և պատվիրակմամբ՝ հաշվի առնելով մարզական ծառայությունների կազմակերպման ոլորտում նրանց փորձառությունը և նախագծման համար անհրաժեշտ մասնագիտական կարողությունները: Համալիր փորձաքննությունից հետո դրանք կդառնան տիպային նաև մյուս վայրերում մարզահամալիրների կառուցման համար։ Ձեռք բերված մեկ տիպային նախագծով Արարատ համայնքում կկառուցվի սպորտային համալիր, որը կտեղակապվի նաև մյուս երկու վայրերում:

Ժաննա Անդրեասյանը տեղեկացրել է՝ ծրագրի իրականացման առաջին փուլում նախատեսվում է ՀՀ պետական բյուջեով նախատեսված միջոցներով ԿԳՄՍՆ կողմից շինարարական աշխատանքների, տեխնիկական հսկողության և հեղինակային հսկողության գնումների գործընթացի կազմակերպում և իրականացում (հեղինակային հսկողությունը կիրականացվի նախագծողի կողմից), ինչի արդյունքում Արարատ, Եղեգնաձոր և Մարտունի համայնքներում կկառուցվեն սպորտային համալիրներ։ Առաջին փուլը կիրականացվի 2026 և 2027 թվականներին և կառուցված գույքի նկատմամբ կգրանցվի Հայաստանի Հանրապետության սեփականության իրավունքը։

Ծրագրի իրականացման երկրորդ փուլում նախատեսվում է ընկերության կողմից միջազգային չափանիշներին համապատասխան սպորտային և անհրաժեշտ այլ գույքի և սարքավորումների գնում և կառուցված սպորտային համալիրների ամբողջովին կահավորում։ Երկրորդ փուլը կիրականացվի մինչև 2027 թվականի ավարտը։ Նշված շարժական գույքը ձեռք է բերվելու ընկերության կողմից, որի փաստացի արժեքի 80 տոկոսը կփոխհատուցվի ՀՀ պետական բյուջեից (ձեռք բերված գույքի 80 տոկոսը կհանդիսանա պետական սեփականություն, 20 տոկոսը՝ ընկերության սեփականություն)։ Պլանավորված է նաև գույքի պարբերական թարմացման անհրաժեշտությունը՝ հաշվի առնելով շահագործման առանձնահատկությունները:

Ծրագրի իրականացման երրորդ փուլում նախատեսվում է՝ մինչև 2027 թվականի ավարտը կառուցված սպորտային համալիրները հավատարմագրային կառավարման կհանձնվեն ընկերությանը՝ մինչև 20 տարի ժամկետով։

«Ծրագրով ներկայացվում են նաև մարզահամալիրների շահագործման ընթացքում ընկերության և պետության պարտավորությունները: Մասնավորապես ընկերությունը հոգալու է աշխատակիցների վարձատրության և շահագործման այլ հարցերը, իսկ պետությունը մասնակցելու է ֆինանսավորմանը՝ միջոցներ տրամադրելով կոնկրետ խմբերի մարզաձևերով զբաղվելու համար»,- նշել է Ժաննա Անդրեասյանը։

ԿԳՄՍ նախարարի խոսքով՝ արդեն ընթացքում են նաև մարզահամալիրների համար հողահատկացման աշխատանքները. Արարատի մարզում համապատասխան հողահատկացումն արված է, Եղեգնաձորում և Մարտունիում տարածքները տեղորոշված են:

«Այս ձևաչափով համագործակցությունը կհանդիսանա փորձնական և հնարավորություն կտա նաև այլ համայնքներում կառուցել նմանատիպ մարզահամալիրներ՝ համագործակցելով նաև այլ ընկերությունների հետ»,- եզրափակել է Ժաննա Անդրեասյանը։

ՀՀ վարչապետ Նիկոլ Փաշինյանը, կարևորելով ՀՀ մարզերում առողջ ապրելակերպի զարգացմանն ուղղված նախաձեռնությունը, նշել է՝ ծրագիրը շրջադարձային է: Այս համատեքստում ՀՀ վարչապետը կարևորել է մասնավորի հետ համագործակցությունը՝ պայմանների մրցունակության և գրավչության բարձրացման նպատակով:

Նյութի աղբյուրը. ՀՀ կրթության, գիտության, մշակույթի և սպորտի նախարարություն