Ազատամուտում երիտասարդները ձևավորում են համացանցից օգտվելու մշակույթ

Հոկտեմբերի 3, 2016

Դպրոցական անցուդարձ

Մերօրյա աշխարհում բավական մեծ տարածում ունեն ինտերնետային կիբերհանցագործությունները,երեխայի տարիքին ու կրթական առանձնահատկություններին ոչ հարիր կայքերի առկայությունը, առկա է համացանցի միջոցով երեխայի հանդեպ տարբեր հանցագործությունների հնարավոր վտանգները, սոցիալական ցանցերում երեխաների անձնական տվյալների ու այլ տեղեկատվության ապահովության խնդիրը: Նաև խնդիր է երեխայի սոցիալ-կրթական-դաստիարակչական գործընթացի խաթարումը համացանցի ու առհասարակ համակարգչից կախվածության պատճառով, որոնց թիրախ կարող է դառնալ յուրաքանչյուրը։ Այն հետևանք է ինչպես անիրազեկության, այնպես էլ ծնողների ուշադրության և հետևողականության անբավարարության։ Ազատամուտում գործող ԻՄՓԱՔԹ երիտասարդական ակումբը շարունակում է համալրել իր հաջողությունների պատմությունը։ Արդեն 1,5 տարի գործող ակումբը հաջողությամբ ավարտեց նաև երրորդ համայնքային ծառայության ծրագիրը, որը այս անգամ խորագրել էր «Անվտանգ և վտանգավոր համացանց»։ Նպատակն էր համայնքի մեծահասակներին և երեխաներին, իրազեկել համացանցի օգտակարության և հավանական վտանգների մասին, որոնց կարող են իրենց երեխաները առնչվել՝ օգտվելով դրանից։ Ծրագիրն իրականացվեց համայնքի բնակելի թաղամասերից մեկի փոքրիկ պուրակում, որտեղ տեղադրվեցին նստարաններ, ցուցանակ։ Վերջինիս վրա զետեղվեցին տեղեկություններով պաստառ համացանցի դրական և վտանգավոր կողմերը, նրանից օգտվելու կանոնները, որոնք ուղենիշ կլինեն ծնողների համար։

Ակումբի անդամ 14-ամյա Վիկան, ով հաճույքով է մասնակցում ակումբի աշխատանքներին, նշում է.<<Այս ծրագիրը մեծ նշանակություն ունի համայնքի համար։ Հաճելի է ժամանակ անց կացնել գեղեցիկ վայրում և միաժամանակ անհրաժեշտ տեղեկություններ ստանալ համացանցի մասին>>։ Այս ծրագիրն իրականացվեց Ազատամուտի համայնքապետարանի հետ համագործակցությամբ (համայնքի ղեկավար՝ Ժորա Մարտիրոսյան):

ԻՄՓԱՔԹ ակումբում երեխաները ոչ ֆորմալ կրթական մեթոդներով սովորում եւ ուժեղացնում են իրենց կարողություններն ու գիտելիքները առաջնորդության, ակտիվ քաղաքացիության, աշխատունակության եւ սոցիալական ձեռներեցության բնագավառներում՝ ուսումնական մոդուլների միջոցով և յուրաքանչյուր մոդուլի ավարտից հետո իրականացնում են համայնքային ծրագրեր:

ԻՄՓԱՔԹ ծրագիրը Ռումինիայում մշակվել է «Նոր Հորիզոններ» հիմնադրամի կողմից եւ Հայաստանում իրականացվում է Վորլդ Վիժն Հայաստանի աջակցությամբ: 2016 թ. դրությամբ 33 ԻՄՓԱՔԹ ակումբներ են գործում Հայաստանի 6 մարզերում, որոնք ունեն ավելի քան 500 անդամ: Ակումբների կողմից իրականացվել են 60-ից ավելի համայնքային ծրագրեր:

ՎՎՀ Իջևանի գրասենյակ