Հանրության շրջանում առողջ ապրելակերպի խրախուսման և երթևեկության այլընտրանքային ձևերի խթանման միջոցառում. Կառավարության որոշումը

Օգոստոսի 14, 2025

Սպորտային լուրեր

ՀՀ կառավարության այսօրվա նիստում չզեկուցվող հարցերի փաթեթով հաստատվել է հանրության շրջանում առողջ ապրելակերպի խրախուսման և երթևեկության այլընտրանքային ձևերի խթանման միջոցառման անցկացման կարգը, որն ուղղված է հեծանիվները՝ որպես երթևեկության միջոց, առավել ակտիվ օգտագործելուն:

Ծրագրի շրջանակում ուսումնական հաստատությունների ուսանողները, աշխատակիցները և նրանց ընտանիքի անդամները հնարավորություն կունենան օգտվելու հեծանիվ ձեռք բերելու համար տրամադրվող վարկերի տոկոսադրույքների սուբսիդավորումից։ Ըստ հիմնավորման՝ միջոցառումը դրական ազդեցություն կունենա թե΄ հանրության շրջանում ֆիզիկական առողջ ակտիվության բարձրացման, թե΄ հանրային երթևեկության այլընտրանքային ձևերի զարգացման վրա:

Միջոցառման շրջանակում վարկառուն վարկ ստանալու նպատակով դիմում է ֆինանսական կազ­մակերպությանը՝ բացի բանկի ներքին ընթացակարգերով պահանջվող փաստաթղթերից ներկա­յացնելով հետևյալ փաստաթղթերը՝

ա. տեղեկանք ՀՀ տարածքում գործող արհես­տագործական, միջին մասնագիտական կամ բարձրագույն կրթական ծրագիր իրականացնող պետական կամ հավատարմագրված ոչ պետական ուսումնական հաստատությունից (այսուհետ՝ ուսումնական հաստատություն) տվյալ ուսումնա­կան հաստատության սովորող կամ աշխատող հանդիսանալու վերաբերյալ,

բ․ որպես վարկառու ուսումնական հաստատության սովորողի կամ աշխա­տողի ընտանիքի անդամ հանդիսանալու դեպքում՝ ընտանիքի անդամ հանդիսա­նալու փաստը հավաստող փաստաթուղթ:

Ֆինանսական կազմակերպության կողմից գնահատվում է վարկառուի վարկավորման պայմանների համապա­տաս­խանությունը միջոցառման և կարգի պայմաններին, որոշում է կայացվում վարկ տրամադրելու վերաբերյալ: Մինչև յուրաքանչյուր ամսվան հաջորդող ամսվա 5-րդ աշխատանքային օրը նախարարության պաշտոնական էլեկտրոնային փոստի հասցեով (secretariat@escs.am) պայմանագրով սահմանված ձևաչափով նախարարություն է ներկայացվում սուբսի­դավորման գումարի փոխանցման վերաբերյալ հայտ: Նախարարությունը հայտը ստանալուց հետո 10 աշխատանքային օրվա ընթացքում ուսումնասիրում է դրա համապատասխանությունը որոշման և սույն կարգով սահմանված պահանջներին (պահանջները բավարարող շահառուն ինքնաշխատ եղանակով համարվում է միջոցառման շահառու) և պայմանագրով սահմանված կարգով ու ժամկետում ապահովում է շահառուների մասով սուբսիդա­վորման ենթակա գումարների փոխանցումը ֆինանսական կազմակերպության հատուկ հաշվին: Վարկի հետ կապված ֆինանսական կազմակերպությունների ծառայու­թյուն­ների համար այլ վճարներ չեն գանձվում (սպասարկման վճար, միջնորդավճարներ): Վարկը տրամադրվում է միանվագ՝ միայն անկանխիկ եղանակով:

Միաժամանակ նշվում է՝ «Հանրության շրջանում առողջ ապրելակերպի խրախուսման և երթևեկության այլընտրանքային ձևերի խթանման միջոցառում» ծրագրի շրջանակում ՀՀ կրթության, գիտության, մշակույթի և սպորտի նախարարության, ՀՀ հեծանիվներ ներկրող և մեծածախ վաճառքով զբաղվող կազմակերպությունների, ինչպես նաև ՀՀ բարձրագույն ուսումնական հաստատությունների ռեկտորների հետ քննարկման արդյունքում ստացվել են մի շարք առաջարկություններ: Մասնավորապես՝ բուհերի ներկայացուցիչների կողմից առաջարկվել է հեծանիվ վարող դասախոսների և ուսանողների համար կազմակերպել hեծանվային կրթական արշավներ, ներբուհական զեղչեր կիրառել այն ուսանողների նկատմամբ, ովքեր կօգտվեն ծրագրից, պարգևատրել հեծանիվ վարող դասախոսներին, կազմակերպված հեծանվային միջոցառումների մասնակից բուհերի և քոլեջների ուսանողներին:

Որոշման ընդունմամբ նախատեսվում է 2025 թվականի համար պահանջվող ծախսերը (ըստ կից ներկայացված հաշվարկի՝ 11,3 մլն դրամ) կատարել ԿԳՄՍ նախարարության ընդհանուր հատկացումների շրջանակում, ինչպես նաև անհրաժեշտ ֆինանսական միջոցները կներառվեն 2026 թվականի բյուջետային հայտի նախագծում:

Նյութի աղբյուրը. ՀՀ կրթության, գիտության, մշակույթի և սպորտի նախարարություն