«Ընտանիք» կենտրոն. «Կավե կամուրջ» խորագրով մասնագիտական դաս

Հունիսի 26, 2017

Լուրեր կազմակերպություններից

ՀՀ ԿԳՆ «Ընտանիք» մանկապատանեկան ստեղծագործական կենտրոնի խեցեգործության խմբակը հունիսի 23-ին Գյումրու «Սբ Հակոբ Մծբնեցի» եկեղեցու բակում կազմակերպեց «Կավե կամուրջ» խորագրով մասնագիտական դաս:

Բաց դաս-միջոցառման նպատակն էր դեռահասների մոտ առաջացնել հետաքրքրություն և սեր խեցեգործության նկատմամբ, արժևորել և գնահատել հայկական արհեստները, ազգային արժեքները, դաստիարակել գեղագիտական ճաշակ:

Խմբակի սաները մասնագիտական դասին մասնակից դարձրեցին ծնողներին, հարակից կրթօջախների դեռահասներին, թաղամասի բնակիչներին և անցորդներին: Կատարած անհատական գործնական աշխատանքների վրա սաները ցուցադրեցին իրենց կարողություններն ու հմտությունները, ծանոթացրին կավի առանձնահատկություններին, դրա հետ աշխատելու  նրբություններին, սիրով պատասխանեցին նրանց հետաքրքրող հարցերին:

Միջոցառումը մեծ հետաքրքրություն առաջացրեց ներկաների շրջանակում: Նրանք արտահայտեցին իրենց կարծիքը՝ նշելով, որ նմանատիպ միջոցառումները ոչ միայն հետաքրքիր ու գունեղ են դարձնում իրենց առօրյան, այլև  օգնում են մասսայականացնելու,  պահպանելու,  նոր շունչ հաղորդելու  ազգային արհեստներին:

Մասնագիտական դասի ընթացքում յուրաքանչյուր մասնակցի համար ուղեցույց դարձավ ասացվածք դարձած մեծն Շիրազի հետևյալ խոսքը. «Արհեստ սովորի՛ր, մի՛ լինիր նազուկ, արհեստն է մարդուն ոսկե բիլազուկ…»:

Ք. Նորատյան