«Մրցաշարը ծառայել է իր նպատակին». «Դպրոցականների բասկետբոլի լիգա» մարզական խաղերի մասնակիցների մեկնաբանությունները

Հունիսի 25, 2025

Սպորտային լուրեր

Սպորտի կառավարման կենտրոնի ենթակայությամբ գործող «Միկա» մարզահամալիրում օրերս ավարտվել են ՀՀ վարչապետի հովանու ներքո անցկացվող «Դպրոցականների բասկետբոլի լիգա» մարզական խաղերը:

10-12 տարեկան (5-6-րդ դասարաններ) աշակերտների մրցապայքարում հաղթող է ճանաչվել Երևանի թիվ 174 հիմնական դպրոցի թիմը։ Դպրոցի ֆիզկուլտուրայի ուսուցիչ Մանուկ Գրիգորյանի խոսքով՝ նմանօրինակ մրցաշարերը մեծապես նպաստում են բասկետբոլի տարածմանը և մասսայականացմանը։

«Մրցաշարը, իսկապես, կազմակերպված էր շատ բարձր մակարդակով: Մեր դպրոցի սաներով մասնակցել ենք բազմաթիվ առաջնությունների, բայց շատ տպավորված ենք «Դպրոցականների բասկետբոլի լիգայով»: Արդեն իսկ զգալի է այն ազդեցությունը, որ մրցաշարն ունեցել է դպրոցականների շրջանում բասկետբոլի հանդեպ հետաքրքրության մեծացման ու մարզաձևի մասսայականացման առումով: Աննկարագրելի զգացողություններ ունենք և շատ ուրախ ենք հաղթանակի համար»,- նշում է Մանուկ Գրիգորյանը:

Երևանի Վարդգես Պետրոսյանի անվան թիվ 51 դպրոցի աշակերտուհի Նարե Սահակյանն էլ ընդգծել է մրցաշարի լարված ընթացքն ու թիմային ոգու կարևորությունը։

«Մրցակցությունն իսկապես թեժ էր։ Եզրափակիչ հասնելը հեշտ չէր, բայց մենք համառ գտնվեցինք և կարողացանք հաջողության հասնել։ Կարծում եմ՝ մրցաշարը լիովին ծառայել է իր նպատակին՝ դպրոցականներին տներից հանելու, բասկետբոլով և, առհասարակ, սպորտով զբաղվելու մեծ փորձ տալու առումով: Թիմում ունեինք սկսնակ խաղացողներ, բայց վստահ եմ՝ այս մրցաշարից հետո շատերի մոտ ցանկություն կառաջանա պրոֆեսիոնալ կերպով զբաղվելու բասկետբոլով»,- ասում է Նարե Սահակյանը, որն իր թիմի հետ հաղթող է ճանաչվել 7-9-րդ դասարանների պայքարում:

«Դպրոցականների բասկետբոլի լիգա» մարզական խաղերի եզրափակիչ փուլին, որը մեկնարկել էր հունիսի 17-ից, յուրաքանչյուր տարիքային խմբում 16-ական թիմեր են մասնակցել: Եզրափակիչ՝ 4-րդ փուլում, 1-ին, 2-րդ և 3-րդ տեղեր գրաված թիմերը կպարգևատրվեն ԿԳՄՍՆ հավաստագրով, գավաթով, մեդալով և դրամական պարգևով:

1-ին տեղ գրաված դպրոցը պարգևատրվում է 4,000,000 ՀՀ դրամով, 2-րդ տեղը՝ 2,500,000 ՀՀ դրամով, 3-րդ տեղը՝ 1,500,000 ՀՀ դրամով: Պարգևատրվում են նաև դպրոցի ֆիզկուլտուրայի ուսուցիչները՝ 1-ին տեղ՝ 700,000 ՀՀ դրամ, 2-րդ տեղ՝ 500,000 ՀՀ դրամ, 3-րդ տեղ 300,000 ՀՀ դրամ: Մրցաշարի հաղթող թիմերի աշակերտները պարգևատրվում են դրամական մրցանակներով՝ 1-ին տեղ (9 աշակերտ)՝ 150,000-ական ՀՀ դրամ, 2-րդ տեղ (9 աշակերտ)՝ 100,000-ական ՀՀ դրամ, 3-րդ տեղ (9 աշակերտ)՝ 75,000-ական դրամ:

Նյութի աղբյուրը. ՀՀ կրթության, գիտության, մշակույթի և սպորտի նախարարություն