Բակային ճամբար ԻՄՓԱՔԹ ակումբի կողմից

Հունիսի 13, 2017

Լուրեր կազմակերպություններից

Տավուշի մարզի Բերդ համայնքի  ԻՄՓԱՔԹ  Պոզիտիվ   ակումբը, որի խնդիրն  է նպաստել երեխաների   քաղաքացիական  ու  հասարակական կարողությունների ձևավորմանը`  առաջնորդության, աշխատունակության, քաղաքացիական կրթության և այլ  ասպարեզներում, կյանքի կոչեց իր հերթական համայնքային նախագիծը: Ակումբի անդամներն՝ ակումբի առաջնորդ Լիանա Տերզիկյանի գլխավորությամբ  մշակեցին  երրորդ  համայնքային ծրագիրը «Դրական լիցքեր. Բակային ճամբար» անվամբ: Նախաձեռնության նպատակն էր եռօրյա բակային ճամբար  կազմակերպել  Բերդ համայնքում, որին մասնակցեցին համայնքի կրթական հաստատությունների սովորողներ: Ակումբականները պատշաճ կազմակերպել էին ճամբարը դպրոցի տարածքում, որի ընթացքում հաճելի ժամանցը համատեղվեց ոչ ֆորմալ կրթությամբ նոր հմտություններ և կարողություններ ձեռք բերելու հետ: 25 երեխայի հետ աշխատեցին ակումբի մոտ 22 անդամ, ովքեր կազմակերպեցին բավականին հետաքրքիր  սպորտային, ինտելեկտուալ և մշակութային մրցույթներ, կյանքի հմտություններին վերաբերող ներկայացումներ, թատերական փոքրիկ ուսոցողական բեմականացումներ, ուսանեցին ազգային պարեր:  Ծրագրի իրականացման ընթացքում ԻՄՓԱՔԹ-ցիները փոխանցեցին  իրենց ստացած գիտելիքները, որոնք ձեռք են բերել ակումբի գործունեության  ընթացքում, ինչպես նաև առաջին անգամ գործածեցին  իրենց առաջնորդության հմտությունները: Ճամբարի մասնակիցները նաև ստացան  նվերներ և պատվոգրեր: Ծրագրին աջակցեց նաև դպրոցի տնօրինությունը (տնօրեն՝ Ռուզան Թումանյան): 

Ակումբի անդամ , 13 ամյա Աննայի համար լինել պատանի առաջնորդ մեծ պատասխանատվություն է, որի  կապակցությամբ նշում է.«Ճամբարը լցված էր հիանալի տգրամադրությամբ և լուսավոր գաղափարներով: Ակումբի անդամներն ամեն ինչ անում էին փոքրիկների օրը յուրահատուկ և տարբերվող դարձնելու համար, և կարծես այն ստացվեց մեզ մոտ: Այս օրերի ընթացքում մենք երեխաներին փոխանցեցինք  բազմազան գիտելիքներ, ոգևորեցինք  մրցույթներով, նվերներով: Հուսով ենք, որ այդ օրերը  նրանց   մանկության հիշարժան օրերից կհամարվեն»:

ԻՄՓԱՔԹ  ծրագիրը մշակվել է Ռումինիայում «Նոր Հորիզոններ» հիմնադրամի կողմից և Հայաստանում իրականացվում է Վորլդ Վիժն Հայաստանի կողմից և  գործում  են 6 մարզերում: Նպատակն է համախմբել երիտասարդությանը  ԻՄՓԱՔԹ  խմբերում, աջակցել նրանց ձեռք բերել քաղաքացիական հասարակության և աշխատանքային շուկայում մրցունակ լինելու համար անհրաժեշտ կարողություններ:

ՎՎՀ Իջեւանի գրասենյակ