Մեկնարկում է «Դպրոցական լավագույն մինի այգի» հինգերորդ մրցույթը

Մայիսի 20, 2025

Լուրեր կազմակերպություններից

ՄԱԿ-ի Պարենի համաշխարհային ծրագիրը ՀՀ կրթության, գիտության, մշակույթի և սպորտի նախարարության, ինչպես նաև Ռուսաստանի ճյուղային սննդի ինստիտուտի և «Դպրոցական սնունդ և երեխաների բարեկեցության» հիմնարկի հետ համատեղ մեկնարկում են «Դպրոցականի հետ համատեղ լավագույն մինի այգի» ամենամյա մրցույթը:

Այս տարի մրցույթն անցկացվում է հինգերորդ անգամ՝ որպես «Դպրոցական սնունդ» ծրագրի անբաժանելի մաս։ 2021 թվականից մեկնարկած այս նախաձեռնությունը դպրոցների համար հարթակ է՝ ցուցադրելու իրենց ստեղծարարությունն ու նորարարությունը, տարածելու առողջ սննդի գաղափարախոսությունը, խթանելու գյուղատնտեսական կրթությունը:

2025 թ. մրցույթն իրականացվում է «Դպրոցական այգու պահապանը» խորագրով։ Աշակերտներին առաջարկվում է մտածել իրենց այգու յուրօրինակ կախարդական պահապանի մասին, որը կպաշտպանի այգին և կօգնի խնամել այն։ Այս կերպարը կլինի այգու պաշտպանն ու դրա զարգացման խորհրդանիշը՝ դառնալով հետաքրքիր պատմությունների, հեքիաթների և այգիներում գունեղ ձևավորումների թեմա։

Երկու անվանակարգ՝ մեկ նպատակ

Նպատակ ունենալով ընդգրկել բոլոր հանրակրթական դպրոցներին՝ այս տարի ևս մրցույթը կանցկացվի երկու հիմնական անվանակարգերով․

• դպրոցական լավագույն մինի այգի․ այն դպրոցների համար, որոնք ունեն այգի հիմնելու դպրոցին մոտ տարածք և պայմաններ,

• լավագույն այգին՝ պատուհանագոգին․ այն դպրոցների համար, որոնք չունեն դպրոցամերձ հարմար տարածք, սակայն կարող են ստեղծագործաբար ձևավորել փոքր այգիներ դպրոցի պատերի ներսում։

Մրցանակներ

• «Դպրոցական լավագույն մինի այգի» անվանակարգի հաղթողը կստանա 3,000 ԱՄՆ դոլարին համարժեք դրամ՝ դպրոցական այգին ընդլայնելու կամ բարելավելու նպատակով։

• Երկրորդ և երրորդ տեղերը զբաղեցրած դպրոցները կստանան այգեգործական գործիքներ կամ խոհանոցային սարքավորումներ։

• «Լավագույն այգին` պատուհանագոգին» անվանակարգի հաղթողը կստանա արժեքավոր մրցանակ՝ նախագծի շարունակականությանն ու զարգացմանը նպաստելու համար։

Նախատեսվում են նաև հատուկ անվանակարգեր՝ մրցույթի ամենաօրինակելի կամ ստեղծագործական նախագծերն առանձնացնելու համար։ Բոլոր հաղթողները և անվանակարգերում առաջադրված մասնակիցները կստանան շնորհակալագրեր։

Ժամկետներ

Մրցույթն անցկացվելու է երկու փուլով․

• 1-ին փուլ․ դպրոցները պետք է լրացնեն և ներկայացնեն գրանցման հայտ՝ մրցույթին մասնակցելու համար. գրանցման վերջնաժամկետը 2025 թվականի հուլիսի 1-ն է։

• 2-րդ փուլ՝ մրցույթին մասնակցող դպրոցները պետք է պատրաստեն և ներկայացնեն ամբողջական փաթեթ: Փաթեթում պետք է ներկայացված լինի մինի այգի կամ կամ պատուհանագոգի այգի ստեղծելու և խնամելու իրենց աշխատանքը՝ ընդգծելով կայուն գյուղատնտեսության, թիմային աշխատանքի և առողջ սննդի արժեքները։

Փաթեթների ներկայացման վերջնաժամկետը 2025 թվականի դեկտեմբերի 1-ն է։

Հաղթողների անունները կհրապարակվեն 2026 թվականի փետրվարին։

Ինչպես մասնակցել

Այն դպրոցները, որոնք ցանկանում են մասնակցել մրցույթին, կարող են գտնել մանրամասն տեղեկատվություն՝ ներառյալ մրցույթի ամբողջական ուղեցույցը, պայմանները և գրանցման պահանջները հետևյալ հղումով:

Հարցերի դեպքում կազմակերպիչների կողմից խորհրդատվություն ստանալու համար անհրաժեշտ է կապ հաստատել minigarden.armenia@gmail.com հետևյալ էլեկտրոնային փոստի միջոցով:

Նորություններին և թարմացումներին կարելի է ծանոթանալ՝ հետևելով մրցույթի պաշտոնական ֆեյսբուքյան էջին։

Նյութի աղբյուրը. ՀՀ կրթության, գիտության, մշակույթի և սպորտի նախարարություն