Ծանրորդ Ալեքսանդրա Գրիգորյանը՝ երիտասարդների աշխարհի առաջնության բրոնզե մեդալակիր

Մայիսի 2, 2025

Սպորտային լուրեր

Հայ ծանրորդները սկսել են պայքարը Պերուի մայրաքաղաք Լիմայում ընթացող պատանիների և երիտասարդների աշխարհի առաջնությունում:

Մրցումային առաջին օրը կանանց 55 կգ քաշային կարգում Ալեքսանդրա Գրիգորյանը երիտասարդների պայքարում երկամարտի 204 կգ արդյունքով արժանացել է բրոնզե մեդալի: Պոկում վարժությունում Ալեքսանդրան գլխավերևում պահել է 85 և 88 կգ կշռող ծանրաձողերը: Հրում վարժությունում Ալեքսանդրան բարձրացրել է 116 կգ՝ այս վարժությունում նվաճելով ոսկե մեդալ:

Հայաստանի երիտասարդական հավաքականի անդամ Հովհաննես Հովհաննիսյանն աշխարհի առաջնության պոկում վարժությունում բարձրացրել է 125 կգ, իսկ հրում վարժությունում՝ 155 կգ: Երկամարտի 280 կգ արդյունքով Հովհաննեսը 10-րդն է երիտասարդների աշխարհի առաջնությունում:

Մայիսի մայիսի 2-ի լույս 3-ի գիշերը՝ ժամը 03:30-ին, Հայաստանը կունենա մեկ մասնակից: 81 կգ քաշային կարգում հարթակ դուրս կգա Նարեկ Մկրտչյանը:

Պատանիների ու երիտասարդների աշխարհի առաջնությունում մենք ունենք 7 մասնակից

Հայաստանի հավաքականը պատանիների և երիտասարդների աշխարհի առաջնությանը կմասնակցի ընդհանուր 7 մարզիկով` 5 տղա, 2 աղջիկ: Պերուի մայրաքաղաք Լիմայում ապրիլի 30-ից մայիսի 5-ը անցկացվող պատանիների և երիտասարդների աշխարհի առաջնությունում կմրցեն`

81 կգ` Նարեկ Մկրտչյանը (մրցման օրը` մայիսի 3, մեկնարկը` 03:30. երիտասարդներ),

89 կգ` Վալերի Մովսիսյանը (մրցման օրը` մայիսի 4, մեկնարկը` 01:00. երիտասարդներ)

96 կգ` Գրիգոր Ղազարյանը (մրցման օրը`մայիսի 3, մեկնարկը` 22:30. պատանիներ)

+102 կգ` Հարություն Հովհաննիսյանը (մրցման օրը` մայիսի 5, մեկնարկը` 03:30. պատանիներ)

81 կգ` Էմմա Պողոսյան (մրցման օրը` մայիսի 5, մեկնարկը` 01:00. երիտասարդներ)

Երիտասարդների հավաքականի մարզիչները Մելիք Ղուկասյանն ու Դավիթ Մուրադյանն են, պատանիներինը` Երվանդ Կիրակոսյանը, իսկ կանանց թիմինը` Տարոն Թովմասյանը:

Հայաստանի պատվիրակության ղեկավարը Ծանրամարտի ֆեդերացիայի գլխավոր քարտուղար Սամվել Գասպարյանն է:

Նյութի աղբյուրը. ՀՀ կրթության, գիտության, մշակույթի և սպորտի նախարարություն