Ծանրամարտի ԵԱ. Աննա Ամրոյանը՝ արծաթե, Դավիթ Հովհաննիսյանը՝ բրոնզե մեդալակիր

Ապրիլի 21, 2025

Սպորտային լուրեր

Եվրոպայի պատանեկան առաջնության հաղթող, երիտասարդների աշխարհի առաջնության բրոնզե մեդալակիր, 76 կգ քաշային Աննա Ամրոյանը Մոլդովայում անցկացվող Եվրոպայի մեծահասակների առաջնությունում երկամարտի 231 կգ արդյունքով դարձել է արծաթե մեդալակիր՝ առաջին մեդալը նվաճելով մեծահասակների պայքարում։

Պոկում վարժությունում Ամրոյանը ցույց է տվել 100 կգ արդյունք, իսկ հրում վարժությունում 131 կգ արդյունքով արժանացել է փոքր բրոնզե մեդալին։

Այս քաշային կարգում Հայաստանի մյուս ներկայացուցիչ Միլենա Խաչատրյանը երկամարտի 226 կգ արդյունքով զբաղեցրել է 6-րդ տեղը։ Պոկում վարժության արդյունքներով Խաչատրյանը գլխավերևում պահել է 95 կգ կշռող ծանրաձողը, իսկ հրում վարժությունում 131 կգ արդյունքով դարձել է փոքր արծաթե մեդալակիր:

Մոլդովայում ավարտին մոտեցող ծանրամարտի Եվրոպայի առաջնությունում 96 կգ քաշային հայ ծանրորդ Դավիթ Հովհաննիսյանն էլ երկամարտի 373 կգ արդյունքով զբաղեցրել է երրորդ տեղը՝ արժանանալով բրոնզե մեդալին։ Պոկում վարժությունում Հովհաննիսյանը, հաջող կատարելով բոլոր երեք մոտեցումները, գլխավերևում պահել է 173 կգ կշռող ծանրաձողը և արժանացել է փոքր բրոնզե մեդալին։ Հրում վարժությունում 203 կգ արդյունքով դարձյալ բրոնզե մեդալ է նվաճել։

Այսօր ավելի վաղ պայքարի են դուրս եկել նաև 81 կգ քաշային կանայք:

Հայաստանի հավաքականի անդամ Էմմա Պողոսյանը երկամարտի 230 կգ արդյունքով զբաղեցրել է 5-րդ տեղը։ Պոկում վարժության ժամանակ Էմման բարձրացրել է 100, իսկ հրումում՝ 130 կգ կշռող ծանրաձողերը։

Հայաստանի մյուս ներկայացուցիչ Մարգարիտա Առաքելյանը երկամարտում ցույց է տվել 211 կգ արդյունք և 10-րդն էր (95+116 կգ):

Նյութի աղբյուրը. ՀՀ կրթության, գիտության, մշակույթի և սպորտի նախարարություն